الەۋمەت

الەم حالىقتارى قالاي دەمالادى؟

f15779

قازىر جۇرت جاپپاي ەڭبەك دەمالىسىنان ورالىپ, ەندى بىرەۋلەرى قارا كۇزدە ەنشىسى تيگەنىنە قۋانىپ وتىرعان جايى بار. وسى رەتتە كەيبىر مەملەكەتتەرگە قاراپ شۇكىرشىلىك ەتۋىمىزگە دە بولادى. ويتكەنى, ەڭبەك دەمالىسىنا از مەرزىمگە عانا جىبەرەتىن نەمەسە ونى مۇلدە بەرمەيتىن دە مەملەكەتتەر بار ەكەن. ماسەلەن…

ءوزىمىز قىزىعا قارايتىن ەۋروپالىق مەملەكەتتەردىڭ كوبىندە ازاماتتار مەرەكە كۇندەرى جۇمىس ىستەپ, كەيىن ونى جىلدىق دەمالىسىنا قوسىپ الادى. فيلليپيندىك بولساڭىز, جاعدايىڭىز ودان دا ناشار بولار ەدى, ويتكەنى, ولارعا جىلىنا باس-اياعى بەس-اق كۇن اقىلى دەمالىس تيەدى. قازاقستاندا قىزمەتكەرلەرگە ۇزاقتىعى 24 كۇنتiزبەلiك بولاتىن جىل سايىنعى اقىلى ەڭبەك دەمالىسى تيەسىلى (قازاقستان رەسپۋبليكاسى ەڭبەك كودەكسىنىڭ 101-بابىنا سايكەس, ەگەر قىزمەتكەرلەردiڭ جەكەلەگەن ساناتتارى ءۇشiن كوپ كۇن سانى كوزدەلمەسە). ونىڭ سىرتىندا كەيبىر سالادا كادىمگىدەي كەڭشىلىك بار. مىسالى, مەملەكەتتىك قىزمەتشىلەرگە – 30 كۇن, اسكەريلەرگە – 30 كۇننەن 45 كۇنگە دەيىن (قىزمەت اتقارعان ەڭبەك ءوتىلى مەن ەڭبەكتەرىنە بايلانىستى),  پەداگوگتەرگە – 56 كۇن; مەكتەپكە دەيىنگى جانە قوسىمشا ءبىلىم بەرۋ ۇيىمدارىنىڭ پەداگوگ ماماندارى ءۇشىن 42 كۇن ماۋسىمدىق دەمالىس بەرىلەدى. ال, 1 جانە 2-توپتاعى مۇگەدەك قىزمەتكەرلەردىڭ مەجەلى كۇننەن تىس كەمىندە 15 كۇن قوسىمشا دەمالىس الۋىنا قۇقىعى بار.

يزرايلدە ازاماتتارعا جۇمىس وتىلىنە بايلانىستى 10 كۇن مەن 24 كۇن اراسىندا اقىلى دەمالىس بەرىلەدى (مىس.:1-4 جىل اراسىندا جۇمىس ىستەگەندەر –  12 كۇن, 5 جىل جۇمىس ىستەگەندەر – 14 كۇن. ونىڭ سىرتىندا كەيبىر ماماندىقتار بويىنشا ساۋىقتىرۋعا ارنالعان دەمالىسقا – 6 كۇن, دەنساۋلىققا زياندى جۇمىستارعا 12 كۇنمەن قوسا 500 دوللارداي جاردەماقى بەرىلەدى. جاپونيادا دا وسىعان ۇقساس دەففەرەنتسيالدى ءتارتىپ ورناعان. ياعني, اركىمگە – ەڭبەگىنە قاراي. بىراق, ءبىر قىزىعى, جاپوندىقتاردىڭ باسىم بولىگى دەمالىستىڭ جارتىسىن عانا پايدالانادى ەكەن. ويتكەنى, ەكى قولدى بوس قويىپ, ەمىن-ەركىن ءجۇرۋ بۇل حالىقتىڭ ءومىر ىرعاعىنا مۇلدە قايشى.

كەرىسىنشە, كەيبىر ەۋروپالىق ەلدەردە بىزگە ءتان جايباراقاتتىق بار سياقتى. ماسەلەن,  رەسەيدە 28 كۇنتىزبەلىك ەڭبەك دەمالىسى بەرىلەدى. وعان 14 مەملەكەتتىك رەسمي مەرەكە كۇندەرىن قوسساق, رەسەيلىكتەر جىلىنا باقانداي 42 كۇن تىنىعادى ەكەن. اعىلشىندار دا ايعا جۋىق اياق سۋىتادى. وعان 8 مەملەكەتتىك رەسمي مەرەكە كۇندەرىن قوسساق, ۇزىن-ىرعاسى 36 كۇن دەمالادى. يتاليالىقتار 11 مەملەكەتتىك رەسمي مەرەكە كۇنىن ەسەپكە العاندا,  31 كۇن جۇمىسقا باس قاتىرماي ءومىر ءسۇرۋ باقىتىنا يە بولادى.

ال, الەمنىڭ كەيبىر حالىقتارى جىل ون ەكى ايدى قىبىر-قىبىر تىرشىلىكپەن وتكىزە مە دەگەن اسەردە قالاسىڭ. مىسالى, زاڭ بويىنشا سينگاپۋر مەن گونكونگتا – 7 كۇن, وڭتۇستىك كورەيادا – 10 كۇن, قىتايدا – 11 كۇن, ينديادا 12 كۇن اقىلى دەمالىس بەرىلەدى ەكەن. اقش-تا ارنايى اقى تولەنەتىن جىلدىق دەمالىس زاڭ بويىنشا مۇلدەم بەكىتىلمەگەن. قىزمەتكەرىن قاشان, قانشا مەرزىمگە جىبەرەتىندەرىن ءار مەكەمە ءوز بەتىنشە شەشەدى. سوعان سايكەس, اقش ازاماتتارىنىڭ 25 پايىزى بەل جازباي جۇمىس ىستەۋگە داعدىلانعان.

قاراپ وتىرساق, حالقىن سيرەك «ەركەلەتەتىن» ەلدەردىڭ قاي-قايسى دا ەكونوميكالىق جاعىنان قۋاتتى. ولار بەينەبىر ۇزدىكسىز مەحانيزم ىسپەتتەس, ەنجارلىققا ۇرىنسا, قارقىن العان شارۋاشىلىعىن قوجىراتىپ الۋى كادىك. دەگەنمەن, اركىم «كورپەسىنە قاراي كوسىلەدى» ەمەس پە؟ ءبىزدىڭ حالىققا دا سونداي ەڭبەكسۇيگىشتىك  قاسيەت تىلەيمىز.

دايىنداعان ەرلان جۇرىنباەۆ

تاعىدا

admin

«استانا اقشامى» گازەتى

ۇقساس جاڭالىقتار

پىكىر ۇستەۋ

Back to top button