ەلىمىزدە دارىندى بالالار وتە كوپ. بۇگىندە ولار ونەر مەن سپورتتا, عىلىم مەن تەحنيكادا جەتىستىككە جەتۋدە. «ءبىز ولاردىڭ ەسىمىن تەك ەلگە ەمەس, الەمگە تانىتقىمىز كەلەدى. تالابى مەن تالانتى ۇشتاسقان دارىندى بالالاردى انىقتاۋعا بارلىق قازاقستاندىقتاردى شاقىرامىز» دەپ مالىمدەيدى «بولاشاقتىڭ 50 ەسىمى» اكتسياسىن ۇيىمداستىرۋشىلار.
ول ءۇشىن «تاڭعاجايىپ قازاقستان» سايتى قولعا العان جوباعا ەلىمىزدىڭ تالانتتى بالالارى تۋرالى مالىمەت جولداۋ كەرەك. وعان ءارتۇرلى سالادا جەتىستىككە جەتكەن 16 جاسقا دەيىنگى بالالار قاتىسا الادى.
ءبىرىنشى كەزەڭدە اعىمداعى جىلدىڭ قىركۇيەك ايىنىڭ سوڭىنا دەيىن «Facebook» الەۋمەتتىك جەلىسىنە نەمەسە سايتتىڭ رەسمي پاراقشاسىنا تالانتتى بالا تۋرالى تولىق مالىمەت پەن فوتوسىن جاريالاۋ كەرەك.
ەكىنشى كەزەڭدە سۇرىپتاپ الىنعان وتىنىمدەر «تاڭعاجايىپ قازاقستان» (uniguekazakhstan.info) سايتىندا جاريالانادى. داۋىس بەرۋ 1 قاراشا مەن 10 جەلتوقسانعا دەيىن جالعاسادى. ەڭ كوپ داۋىس جيناعان بالالار «بولاشاقتىڭ 50 ەسىمى» اكتسياسىنىڭ جەڭىمپازى اتانادى.
اكتسيا قورىتىندىسى بويىنشا جەڭىمپاز 50 بالانىڭ قابىلەتىن ودان ءارى جەتىلدىرىپ, تالانتىن الەمگە تانىستىرۋعا دەمەۋشىلەر اتسالىساتىن بولادى.
گۇلميرا شارحانقىزى
