استاناداعى ۇلتتىق مۋزەيدە «National Geographic-ءتىڭ» ۇزدىك 50 سۋرەتى» اتتى فوتوكورمە اشىلدى. كورمە ورتالىق ازيا وڭىرىندە العاش رەت جارىق كورگەن «National Geographic قازاقستان» جۋرنالىنىڭ تۇساۋكەسەرى اياسىندا ۇيىمداستىرىلدى.
يگىلىكتى شاراعا «National Geographic» حالىقارالىق جۋرنالىنىڭ ۆاشينگتوننان كەلگەن باسشىلىعى, شەتەلدىك مەيماندار ەلىمىزدەگى زيالى قاۋىم وكىلدەرى قاتىستى. جۋرنالدىڭ تۇساۋكەسەرىندە قر اقپارات جانە كوممۋنيكاتسيا ءمينيسترى داۋرەن اباەۆ ىزگى لەبىزىن ءبىلدىردى.
سونداي-اق, حالىقارالىق جۋرنالدىڭ جاۋاپتى رەداكتورلارىنىڭ ءبىرى, باسىلىم ديرەكتورىنىڭ ورىنباسارى داررەن سميت قازاقستان تۋرالى مۇراعاتتان الىنعان ماقالالار جايىندا كەڭىرەك توقتالدى. ال جۋرنالدىڭ ماركەتينگ ديرەكتورى اريەل لور بەدەلدى برەندتىڭ تاريحىنا شولۋ جاسادى. سونىمەن بىرگە «National Geographic قازاقستان» جۋرنالىنىڭ باس رەداكتورى ەركىن جاقىپوۆ رەداكتسيانىڭ ۇستانىپ وتىرعان باعىتى تۋرالى ايتىپ بەردى.
شارادا كوڭىلىمىزدە تولقىتقان ساتتەر دە بولدى. بۇگىندە جاسى سەكسەننەن اسقان فازيلا جانالتاي اجەمىزدىڭ سۋرەتى «National Geographic» جۋرنالىنىڭ 1954 جىلى شىققان سانىندا جاريالانعان ەكەن. ول ماقالادا التايدان اسىپ, تۇركياعا بارعان قانداس باۋىرلاردىڭ تاعدىر تاۋقىمەتى جازىلعان. تاريحتىڭ ءتىرى كۋاگەرىنە اينالعان اجەمىز بۇگىندە ەلوردادا تۇرادى.
كورمەگە حالىقارالىق جۋرنالدىڭ الەم جۇرتشىلىعىن ءتانتى ەتكەن ۇزدىك فوتولار قويىلعان. ولاردىڭ قاتارىندا ستيۆ ماككارريدىڭ دۇنيەنى شارلاعان ايگىلى «اۋعان قىزى» سۋرەتىنەن باستاپ, دجەين گۋدوللدىڭ تاڭعاجايىپ كادرلارى, توماس ابەركرومبيدىڭ 1965 جىلى تۇسىرىلگەن مەككە كورىنىسى بار. تاڭعاجايىپ كورمە ەكى ايعا دەيىن جالعاسادى.
ازامات ەسەنجول
