قازاقستان رەسپۋبليكاسى تۇڭعىش پرەزيدەنتىنىڭ مۋزەيىندە كونستيتۋتسيا جانە ءبىلىم كۇنىنە ارنالعان «تاۋەلسىزدىگىمنىڭ تىرەگى – اتا زاڭ» اتتى مەرەكەلىك ساباق ءوتتى.
مەرەكەلىك شارانى قازاقستان رەسپۋبليكاسى تۇڭعىش پرەزيدەنتىنىڭ مۋزەيى مەن «نۇر وتان» پارتياسىنىڭ «جاس وتان» جاستار قاناتى» قوعامدىق بىرلەستىگى ۇيىمداستىردى.
«بۇل ساباقتا بالالار اتا زاڭ تۋرالى جان-جاقتى ماعلۇمات الدى. بيىل بىزدە العاشقى پاتريوتتىق ساباق ج.جاباەۆ اتىنداعى №4 مەكتەپ-گيمنازيانىڭ ءبىرىنشى سىنىپقا باراتىن بۇلدىرشىندەرگە وتكىزىلىپ وتىر. ورتالىعىمىزدىڭ اعا وقىتۋشىسى ءاسيا ادىلقىزى ەلىمىزدىڭ باس زاڭدىق قۇجاتىن بالالارعا ۇعىنىقتى تىلدە جەتكىزە الدى» دەيدى مۋزەي پەداگوگيكاسى ورتالىعىنىڭ جەتەكشىسى راۋزا قازبەكوۆا.
مۋزەيدە وتكەن ساباقتان ەستەلىك رەتىندە ۇيىمداستىرۋشىلار مەكتەپ تابالدىرىعىن العاش اتتاعالى تۇرعان وقۋشىلارعا ارناپ سىيلىقتار تابىستادى.
