اتا-انالاردى بالاعا قامقور بولۋعا مىندەتتەۋ ماقساتىندا سارىارقا اۋدانى پروكۋراتۋراسى «اليمەنت تولە!» ۇرانىمەن تۇراقتى تۇردە شارالار وتكىزىپ كەلەدى. اكتسيا ناتيجەسىن ءبىلۋ ءۇشىن استانا قالاسى سارىارقا اۋدانى پروكۋرورىنىڭ كومەكشىسى, ءبىرىنشى ساناتتى زاڭگەر ەلدار سۋتتىباەۆتى اڭگىمەگە تارتتىق.
– وسى اكتسيانىڭ جۇزەگە اسىرىلۋ بارىسىمەن تانىستىرىپ وتسەڭىز…
– پروكۋراتۋرا ورگاندارى قر كونستيتۋتسياسىنا سايكەس جۇمىس ىستەيدى. ال, اتا زاڭىمىزدىڭ 27-بابىندا «بالالارىنا قامقورلىق جاساۋ جانە ولاردى تاربيەلەۋ اتا-انانىڭ ەتەنە قۇقىعى ءارi مiندەتi» دەلىنگەن. وكىنىشكە قاراي, سارىارقا اۋدانىنىڭ وزىندە اليمەنت تولەمەيتىن بورىشكەرلەر سانى ازايار ەمەس. تۇراقتى تۇردە جۇرگىزىلەتىن «اليمەنت تولە! ويتكەنى, بالا – ەل بولاشاعى» اتتى اكتسيا بارىسىندا اتا-انالاردى زاڭنىڭ نەگىزگى تالاپتارىنا باعىنۋدى عانا ەمەس, قاراپايىم قامقورلىق جاساۋعا شاقىرامىز. وسىعان بايلانىستى سارىارقا اۋداندىق اكىمدىگى, قورعانشىلىق پەن قامقورشىلىق ورگاندارى, سارىارقا اۋدانىنىڭ ىشكى ىستەر باسقارماسى, قالالىق سوت اكتىلەرىن ورىنداۋ دەپارتامەنتى قىزمەتكەرلەرىنەن تۇراتىن جۇمىس توبى قۇرىلىپ, بورىشكەرلەردىڭ تۇرعىلىقتى مەكەنجايى بويىنشا رەيد جۇرگىزىلدى. ولاردىڭ تابىس كوزدەرىن انىقتاۋ ءۇشىن مۇلىكتىك جاعدايلارى تەكسەرىلىپ, اليمەنتتى جالاقىسىنان ۋاقىتىندا ۇستاۋ بويىنشا ۇيىمداردىڭ بۋحگالتەريالارىنا ەسكەرتۋ جىبەرىلدى.
– بورىشكەرلەرگە قانداي جازا قولدانىلادى?
– ستاتيستيكاعا سۇيەنسەك, وسى جىلدىڭ 1 قازانىندا اتقارۋشىلىق وندىرىستە بورىشكەرلەردىڭ 8493 قۇجاتى جاتتى. وسى ارالىق ىشىندە ونىڭ 572-ءسى قارالدى. جىل باسىنان بەرى 33 اكىمشىلىك قۇقىق بۇزۋشىلىق تۋرالى حاتتاما تولتىرىلدى. بۇل قۇجاتتار استانا قالاسىنىڭ مامانداندىرىلعان اكىمشىلىك سوتىنا جىبەرىلدى. ماسەلەن, 28 ازاماتقا اكىمشىلىك ايىپپۇل سالىنسا, 5 بورىشكەر 5 كۇنگە قاماۋعا الىندى. بورىشكەرلەرگە قولدانىلاتىن نەگىزگى شارالار – ولاردى اكىمشىلىك نەمەسە قىلمىستىق جاۋاپكەرشىلىككە تارتۋ بولىپ تابىلادى.
– اتا-انالاردىڭ اليمەنت تولەۋدەن قاشۋ سەبەبى نەدە؟
– اتا-انالىق مىندەتىن ورىنداۋدان بولەك, ولار تىركەۋدەگى مەكەنجايىنان دا تابىلماي, پانالاعان جەرىن جاسىرىپ, زاڭ الدىنداعى جاۋاپكەرشىلىكتەن قاشىپ جاتادى. تابىسى بولا تۇرا, اليمەنت دەسە ازار دا بەزەر بوپ جۇرگەندەردىڭ نەگىزگى سەبەپتەرىنىڭ ءبىرى – وتباسىنداعى كەلىسپەۋشىلىكتەر. ماسەلەن, ورتادا قالعان بالانى اكەسىمەن كەزدەستىرمەۋ, بۇرىنعى ەرلى-زايىپتىلاردىڭ ءبىر-بىرىنە كەك ساقتاۋى دا سەبەپ بولىپ جاتادى. وندايدا ءبىز ەكى جاقتى شاقىرىپ, كەزدەسۋ بارىسىندا بارىنشا تۇسىنىستىككە شاقىرۋعا تىرىسامىز. ازاماتتاردىڭ جۇمىسسىزدىعى مەن تابىستىڭ جوقتىعى دا اليمەنتتى ۋاقىتىمەن تولەمەۋگە اسەر ەتەدى. وندايدا ءبىز بورىشكەرلەردى جۇمىسسىز ەسەبىندە تىركەۋگە الامىز.
جالپى, مۇندايعا سانالى تۇردە باراتىندار كوپ. قالاي بولعانمەن, سوڭىندا زاڭمەن جازالاناتىنى انىق.
ءمادينا جاقىپ
