بۇگىندە باس قالاداعى جەكە مەنشىك بالاباقشالاردىڭ قىزمەت كورسەتۋ ساپاسى جاقسارا تۇسكەنى بايقالادى. ءبىلىم باسقارماسى تاراپىنان قويىلاتىن تالاپتاردى ۇقىپتى ۇستاناتىن ءبىرقاتار بالاباقشالار مەملەكەتتىك تاپسىرىستى دا ابىرويمەن ورىنداپ كەلەدى. سولاردىڭ ءبىرى دەپ «ەركەتاي» بالاباقشاسىن ايتۋعا بولادى.
وسىدان ءۇش جىل بۇرىن اشىلعان ايتۋلى مەكەمەدە بۇگىنگى تاڭدا 210 ءبۇلدىرشىن تاربيەلەنۋدە. وقۋ-تاربيە جۇمىسى قازاق جانە ورىس تىلدەرىندە جۇرگىزىلەدى. ەرەسەك توپتاردىڭ تاربيەلەنۋشىلەرى قالاۋىنا قاراي اعىلشىن ءتىلىن دە ۇيرەنۋدە.
– بالاباقشامىز اشىلعان كەزدە جۇزدەن استام بالا قابىلدايتىن ەدىك. ۋاقىت وتە كەلە اتا-انالار تاراپىنان سۇرانىستار كوبەيە ءتۇستى. سودان ءبىز كورشى تۇرعان عيماراتتى دا بالاباقشاعا اينالدىرۋعا ۇسىنىس تۇسىردىك. ءبارى ويداعىداي بولىپ, بۇگىندە قاناتتاس تۇرعان ەكى عيماراتتا قاتار جۇمىس جۇرگىزۋدەمىز. ءبولمەلەرىمىز دە, ويىن الاڭدارىمىز دا كەڭەيدى, – دەيدى بىزبەن اڭگىمەسىندە بالاباقشا مەڭگەرۋشىسى ناتاليا رۋساك.
ءبىز بالاباقشاعا كەلگەندە ءدال مەرەكەنىڭ ۇستىنەن تۇستىك. تاربيەشى گۇلجان كوگەنباەۆا جەتەكشىلىگىندەگى ورتاڭعى توپتىڭ بالدىرعاندارى «التىن كۇز» مەرەكەسىن وتكىزىپ جاتىر ەكەن. اسەم بەزەندىرىلگەن ويىن-ساۋىق بولمەسىنىڭ ءدال ورتاسىندا «كۇز حانشايىمى» وتىر. بالالار بولسا, حانشايىم
الدىندا كەزەكتەسىپ ولەڭ وقىپ, ءان سالادى. ءبىر ساتتە بالالار جامىراپ كۇزگى ونىمدەردى كورسەتىپ جاتتى.
وسى كۇنى مەكتەپالدى دايارلىق توبىندا دا «قىز سىنى» بايقاۋى ءوتتى. ساليما شاركەنوۆا تاربيەسىندەگى بالالار كۇزگى جەمىس-جيدەكتەن سالاتتار جاساۋدان, كەستە توقۋ, ولەڭ ايتۋدان سىنعا ءتۇستى. كوڭىلدى ءارى ماعىنالى وتكەن بايقاۋعا قاتىسقان بارلىق بالالارعا سىيلىقتار بەرىلدى.
عالىم قوجابەكوۆ
