«بۇلاق كورسەڭ, كوزىن اش…» دەيدى دانا حالقىمىز. ءدال وسى اتالى ءسوزدى ماقسات ەتكەن «زەردەلى» اقىل-وي دامىتۋ ورتالىعىنىڭ ديرەكتورى ىرىسبەك ءماۋىتۇلىنىڭ باستاماسىمەن وتەتىن ءاربىر شارا مەكتەپ وقۋشىلارىنىڭ بىلىمگە دەگەن قۇشتارلىعىن ارتتىرۋعا باعىتتالعان.
جۋىردا جىل سايىن داستۇرگە اينالعان «التىن ساقا» ماتەماتيكالىق وليمپياداسىنىڭ ماراپاتتاۋ ءراسىمى ءوتتى. «استانا دارىنى» وڭىرلىك عىلىمي-پراكتيكالىق ورتالىعىنىڭ قولداۋىمەن جاس دارىنداردىڭ قابىلەتىن ارتتىرۋ ماقساتىندا ۇيىمداستىرىلعان وليمپياداعا استانا قالاسى ءبىلىم بەرۋ مەكەمەلەرىنىڭ 5-6-سىنىپ وقۋشىلارى قاتىستى. وليمپيادانىڭ ەرەكشەلىگى – تاپسىرمالار «جۇزدىك باقىلاۋ جانە ءجۇز بالدىق باعالاۋ جۇيەسى» فورماسى تۇرىندە بەرىلدى. سايىستىڭ ءبىرىنشى كەزەڭى مەكتەپ بازاسىندا وتكىزىلىپ, قاتىسۋشى 1500-دەن استام وقۋشىنىڭ ىشىنەن جوعارى ۇپاي جيناعان 300-گە جۋىق وقۋشى ەكىنشى كەزەڭگە جىبەرىلگەن بولاتىن. وليمپيادانىڭ قورىتىندىسى بويىنشا جۇلدەلى ءى, ءىى, ءىىى ورىن يەگەرلەرى انىقتالىپ, جەڭىمپازدار ارنايى سىيلىقتارعا يە بولدى. ءدۇبىرلى دودادا توپ جارىپ, ءى ورىن يەلەنگەن 4 وقۋشىعا – 50000 تەڭگە سىيلىق سەرتيفيكاتى, ءىى ورىن العان 15 وقۋشىعا – 10000 تەڭگە كولەمىندە سىيلىق سەرتيفيكاتى, ءىىى ورىن العان 25 وقۋشىعا 5000 تەڭگە سىيلىق سەرتيفيكاتى تابىستالدى.
قازىرگى تاڭدا بولاشاق ۇرپاقتىڭ ءبىلىمدى, باسەكەگە قابىلەتتى بولۋى ءۇشىن جەكەلەگەن اتا-انالاردىڭ تاراپىنان دا يگى ىستەر جاسالىپ جاتىر. ەگەمەندى ەلىمىزدىڭ ەرتەڭىنە بەيجاي قارامايتىن ۇلتجاندى ازاماتتاردىڭ ءبىرى ومار جۋسانبايۇلى ءى ورىن يەلەنگەن ءتورت وقۋشىعا بەرىلگەن قارجىلاي سىيلىققا دەمەۋشىلىك جاساپ, «ۇلتتىڭ ەرتەڭى – وسى جاس بالالاردىڭ قولىندا. ەرتەڭ وسى وقۋشىلاردىڭ اراسىنان حالىقارالىق سايىستاردا ۇزدىك ناتيجەلەرگە جەتىپ, ەلىمىزدىڭ عىلىمى مەن مادەنيەتىنىڭ دامۋىنا ۇلەستەرىن قوسسا دەپ تىلەيمىن» دەگەن تىلەك ءبىلدىردى.
دەڭگەيى جوعارى دەپ تانىلعان 40 وقۋشى ارنايى گراموتالارمەن ماراپاتتالىپ, «ماتەماتيكا وليمپياداسىنا دايىندىق باستامالارى» اتتى وقۋ قۇرالى سىيعا تارتىلدى. وليمپياداعا قاتىسقان مەكتەپ وقۋشىلارىنىڭ ورتاشا ۇپايى جانە ورىندار سانى بويىنشا جاقسى ناتيجە كورسەتكەن №73 فيزيكا-تەحنيكالىق ليتسەيىنە «التىن ساقا» كۋبوگى تابىستالدى.
مەكتەپ وقۋشىلارىن ىنتالاندىرىپ, قابىلەتىن ارتتىرۋعا باعىتتالعان وليمپيادالار مەن سايىستار ورتالىقتىڭ ۇيىمداستىرۋىمەن ءالى دە جالعاسىن تابادى.
گۇلجان راحمان
