«استانا وپەرا» تەاترىنىڭ ابىرويىن اسقاقتاتۋ ءۇشىن اتاجۇرتقا ورالدى
وسىناۋ ايتۋلى ۋاقيعاعا وراي قۋانىشىمىز قويىنىمىزعا سىيماي, گازەتىمىزدىڭ وتكەن نومىرىندە قالىڭ وقىرمان قاۋىمنان ءسۇيىنشى سۇراعان ەدىك.
ەندى مىنە, «استانا وپەرا» تەاترىنىڭ ديرەكتورى تولەۋبەك الپيەۆ تالانتتارىن تورتكۇل دۇنيە تانىعان ونەردىڭ قوس تارلانىن قولدارىنان جەتەكتەپ اكەلىپ, جۋرناليستەرمەن جۇزدەستىرىپ وتىر.
الدىمەن ءسوز العان رەسەيدىڭ حالىق ءارتىسى, رف مەملەكەتتىك سىيلىعىنىڭ لاۋرەاتى, ۇزاق جىلدار بويى سانكت-پەتەربۋرگتەگى ماريا تەاترىنىڭ پريما-بالەريناسى اتانىپ, كەيىننەن ا.ۆاگانوۆا اتىنداعى ورىس بالەت اكادەمياسىنىڭ كوركەمدىك جەتەكشىسى بولعان جەرلەسىمىز التىناي اسىلمۇراتوۆا مارتەبەلى
پرەزيدەنت نۇرسۇلتان نازارباەۆتىڭ ۇلت مادەنيەتىن دامىتۋعا ايرىقشا ءمان بەرەتىندىگىن ايرىقشا اتاپ ءوتتى. تۋعان ەلىن وركەنيەت ورىنە باستاعان تۇعىرى بيىك تۇلعانىڭ قابىلداۋىندا بولىپ, قۇرمەتىنە بولەنگەنىن اسقاق ابىروي كورەتىنىن ۇلكەن تەبىرەنىس ۇستىندە جەتكىزدى. ايدىنىنا ورالعان اققۋداي التىناي بۇدان بىلاي اتالمىش تەاتردىڭ بالەت ترۋپپاسىنىڭ كوركەمدىك جەتەكشىسى ەسەبىندە جاس بيشىلەرىمىزدىڭ شەبەرلىگىن شىڭداۋعا قوماقتى ۇلەس قوسپاق.
ال, قازاق رۋحانياتىنىڭ قابىرعالى قايراتكەرى احمەت جۇبانوۆتىڭ شوبەرە جيەنى, بۇگىندە بۇكىل دۇنيە جۇزىنە بەلگىلى مۋزىكانت الان بورىباەۆ «استانا وپەرا» تەاترىنىڭ باس ديريجەرى قىزمەتىنە شاقىرىلىپتى.
توقسان اۋىز ءسوزدىڭ توبىقتاي ءتۇيىنى, بۇعان دەيىن قازاقستاننان تىسقارى جەردە ءجۇرىپ, قازاق بالاسىنىڭ قانداي بيىكتەردە سامعاي الاتىنىن دالەلدەگەن ەكى ساڭلاق ەندى ەلورداعا قونىس تەۋىپ, تاريحي وتان يگىلىگىنە ەڭبەك ەتپەك.
ەندەشە, ىسكە ءسات!
تالعات باتىرحان
