Sport

التىنمەن اپتاFان ازيادا

ينچحوندا وتكەن ازيا ويىندارىندا 28 التىن, 23 كۇمىس جانە 33 قولا مەدال يەلەنگەن قازاقستان جالپى جۇلدە سانى بويىنشا وسىعان دەيىنگى ازيادا ويىندارىنداعى ءوز رەكوردىن جاڭارتتى. بۇعان دەيىنگى ەڭ ۇزدىك جەتىستىك 1994 جىلى حيروسيمادا تىركەلگەن بولاتىن. وندا قازاقستاندىق سپورتشىلار 27 التىن, 25 كۇمىس پەن 27 قولا جۇلدە ەنشىلەگەن ەدى.

تريۋمفاتورلار

ينچحوندا دانيار ەلەۋسىنوۆ (69 كگ) ازيا ويىندارىندا قاتارىنان ەكى مارتە چەمپيون بولعان العاشقى قازاقستاندىق بوكسشى اتاندى.

– قازىر الەمدە «69 كيلوگرامم – قازاقستاننىڭ سالماعى» دەگەن پىكىر قالىپتاسقان. قازاقستان وسى سالماق دارەجەسىندە قاتارىنان ءۇش ازيادادا التىندى جەڭىپ الدى. 2006 جىلى دوحادا باقىت سارسەكباەۆ, 2010 جىلى – سەرىك ساپيەۆ, بيىل دانيار ەلەۋسىنوۆ چەمپيون بولدى. ءۇش وليمپيادادا (2004, 2008, 2012) وسى سالماقتا قازاقستان بوكسشىلارى جەڭىمپاز اتاندى, – دەيدى الماتىلىق بوكس باپكەرى ساپار المۇحامەدوۆ.

جەڭىل اتلەتيكادان ولگا رىپاكوۆا ء(ۇش قارعىپ سەكىرۋ) دوحا, گۋانجوۋ, ينچحونداعى ازيا ويىندارىنىڭ ۇشەۋىندە دە التىن الىپ وتىر. گرەك-ريم كۇرەسىنەن نۇرماحان تىناليەۆ تە (120 كگ) ەكى بىردەي ازيا ويىندارىنىڭ چەمپيونى اتاندى.

44 جاستاعى نىسانا كوزدەۋشى ولگا دوۆگۋن العاش رەت ازيا ويىندارىنا 1998 جىلى قاتىسقان. سودان بەرى ول قاتارىنان بەس ازياداعا بارىپ, بارلىعىندا مەدال العان. دوۆگۋن ءوزى قاتىسقان بەس ازيادادا ەكى التىن, ەكى كۇمىس, ءتورت قولا يەلەنسە, ونىڭ ءبىر التىنى مەن ءبىر قولاسى – ينچحوننان.

قازاقستان بوكس قۇراماسى دا ءوز تاريحىندا العاش رەت ازيا ويىندارىندا التى التىن الدى.

جۇلدەگەرلەر

وزگە چەمپيوناتتاردا توپ جارسا دا, ازيا ويىندارىندا التىنعا قول جەتكىزە الماي جۇرگەن قازاقستاندىق سپورتشىلار بار. ماسەلەن, بوكستان الەم چەمپيوناتىن ۇتقان ءبىرجان جاقىپوۆ قاتارىنان ەكى ازيا ويىندارىندا كۇمىستى  قاناعات تۇتتى. ول ەكى جولى دا جارىس وتكەن ەلدىڭ بوكسشىلارىنان ۇتىلدى.

اۋىر اتلەتيكادان ەكى دۇركىن الەم چەمپيو­نى, لوندون وليمپياداسىنىڭ جەڭىمپازى ءزۇلفيا چينشانلو 2010 جىلى گۋانجوۋدا العان كۇمىسىن ينچحوندا دا موينىنا ءىلدى. 2001-2013 جىلدارى رەگبيدەن ازيا چەمپيوناتىندا الدىنا قارا سالماعان, 2010 جىلى گۋانجوۋداعى ازيا ويىندارىن ۇتقان قازاقستان ايەلدەر قۇراماسى بيىل ينچحوندا قىتاي قۇراماسىنان ۇتىلىپ, قولا مەدال ەنشىلەدى.

– رەگبيدەن ايەلدەر قۇراماسى ازيادا ءسوزسىز كوشباسشى بولعان. مەملەكەت ولارعا التىن الۋدى مىندەتتەگەن. بىراق, ورىنداي المادى. ودان كەيىن قازاقستاندىق جانكۇيەرلەر سۋ دوبىنان ايەلدەر قۇراماسىنان دا التىن كۇتتى. ولار قولامەن شەكتەلدى. كانوە مەن بايداركا قايىقپەن جارىستا جاقسى ناتيجە كورسەتكەنىمىزبەن, اكادەميالىق ەسكەك ەسۋدە التىن بۇيىرمادى. تاەكۆوندودان ءبىر التىن الۋدى جۇكتەگەن. ول دا ورىندالمادى. تەننيس­تەن ايەلدەر قۇراماسىنان دا التىن كۇتتىك, ولار قولامەن شەكتەلدى. ال ەركىن كۇرەستەن قازاقستان 1994 جىلعى ازيا ويىندارىنان بەرى التىنعا قول جەتكىزە الماي كەلە جاتىر, – دەيدى سپورت ءجۋرناليسى  راۋان وقاس.

مۋلتيمەداليستەر

ازيا ويىندارىندا قازاقستاننىڭ ءبىراز سپورتشىسى بىرنەشە مەدال جەڭىپ الىپ, «ازيادانىڭ مۋلتيمەداليستەرىنىڭ» قاتارىنا ەندى. جۇزۋدەن دميتري بالاندين 50, 100, 200 مەترگە براسس ادىسىمەن ءجۇزۋ جارىستارىندا ءۇش التىن قانجىعاسىنا بايلادى. ال جەڭىل اتلەت ولگا سافرونوۆا ازيا ويىندارىنىڭ التىن (200 مەترگە جۇگىرۋ), كۇمىس (ەستافەتا), قولا (100 مەترگە جۇگىرۋ) مەدالدارىن يەلەندى. كانوە ەسۋ جارىسىندا ناتاليا سەرگەەۆا, ەۆگەني الەكسەەۆ, الەكسەي دەرگۋنوۆتار ءبىر التىن, ءبىر كۇمىستەن جەڭىپ الدى.

دزيۋدودان ەلدوس سمەتوۆ جەكەلەي سىندا ازيا چەمپيونى اتانسا, كوماندالىق جارىستا كۇمىسكە قول جەتكىزدى. سونداي-اق, ماكسيم راكوۆ (دزيۋدو) پەن ەكاتەرينا رۋدەنكو ء(جۇزۋ) ەكى كۇمىس, اپالى-ءسىڭلى ەكاتەرينا جانە الەكساندرا نەميچتەر (سينحروندى ءجۇزۋ) جانە باقتيار يبراەۆ (نىسانا كوزدەۋ) ەكى قولا يەلەندى.

ازيا رەكوردتارى

ينچحوندا قازاقستان سپورتشىلارى ازيا ويىندارىنىڭ عانا ەمەس, قۇرلىقتىق جانە الەم رەكوردتارىن جاڭارتتى. ماسەلەن, اۋىر اتلەتيكادان ءزۇلفيا چينشانلو سەرپە كوتەرۋدە 132 كەلىنى باعىندىرىپ, الەم رەكوردىن جاڭارتتى. ال, جۇزۋدەن دميتري بالاندين ءوزى التىن العان ءۇش قاشىقتىقتا دا (50, 100, 200 مەترگە براسس ادىسىمەن ءجۇزۋ) ازيا ويىندارىنىڭ رەكوردىنا وزگەرىس ەنگىزدى. سونىمەن قاتار, ستەند اتۋدا قازاقستان ايەلدەر قۇراماسى كوماندالىق جارىستا 203 ۇپاي جيناپ, قىتاي قۇراماسىنا تيەسىلى (201 ۇپاي) رەكوردتىڭ مۇرتىن بۇزدى. جالپى ەسەپ بويىنشا, ينچحوندا بارلىعى الەم رەكوردى 14 رەت جاڭارسا, ازيا رەكوردى 28 مارتە بۇزىلدى.

كەرەك دەرەك

مەدال داۋى جانە تاريحي جەتىستىكتەر

ايەلدەر بوكسىنان ۇندىستاندىق ساريتا دەۆي جارتىلاي فينالدا جارىستى ۇيىمداستىرۋشى ەل وڭتۇستىك كورەيا سپورتشىسى جي نا پاكتان ۇتىلىپ قالدى. بىراق ول ماراپاتتاۋ كەزىندە مەدالدى موينىنا ىلۋدەن باس تارتىپ, جۇلدەسىن جي نا پاككە ۇستاتۋ ارقىلى تورەشىلەردىڭ شەشىمىنە قارسىلىق ءبىلدىردى. كەيىن بۇل قارسىلىققا ايبا (حالىقارالىق بوكس فەدەراتسياسى) ارالاسىپ, ساريتا دەۆيدىڭ جۇلدەسى ءۇندىستان بوكس فەدەراتسياسىنا تاپسىرىلدى.

2010 جىلعى ازيا ويىندارىندا جۇلدەسىز قالعان ەكى ەل – تۇركىمەنستان مەن تاجىكستان ينچحوندا جاقسى ناتيجە كورسەتتى. العاشقىلارى ءبىر كۇمىس ەنشىلەسە, تاجىكتەر ءبىر التىن, ءبىر كۇمىس, ءۇش قولاعا قول جەتكىزدى. ال گۋانجوۋدا ءبىر التىن, ەكى كۇمىس جانە ەكى قولا العان قىرعىزستان قۇراماسى ينچحوندا بار بولعانى ەكى كۇمىس پەن ءتورت قولا مەدالدى قاناعات تۇتسا, وزبەكستان 9 التىنمەن وندىققا كىرە الماي, گۋانجوۋداعى جەتىستىگىن (11 التىن) قايتالاي المادى.

1994 جىلدان بەرى قازاقستان ازيا ويىندارىندا بارلىعى 140 التىن, 141 كۇمىس جانە 200 قولا (بارلىعى 481 مەدال) يەلەنگەن. ال بۋتان, مالديۆ ارالدارى جانە شىعىس تيمور ءالى كۇنگە ازيا ويىندارىنىڭ تاريحىندا بىردە-ءبىر مەدال الىپ كورمەگەن.

كەلەسى XVIII جازعى ازيا ويىندارى 2018 جىلى يندونەزيا استاناسى دجاكارتادا وتەدى.

 

دوپينگ داۋى

ازيا ويىندارىندا التى سپورتشى دوپينگ داۋىنا ۇرىندى. قىتايلىق جەڭىل اتلەت چجان ۆەنسيۋ (بالعا لاقتىرۋ) ازيادانىڭ چەمپيونى اتانعانىمەن, كەيىن قانىنان دوپينگ تابىلعاندىقتان, ءوز ورنىن كۇمىس العان وتانداسى ۆانگ چەنگكە بەرۋگە ءماجبۇر بولدى. ۋ-شۋ شەبەرى مالايزيالىق تاي چەي حۋەننىڭ دە قانىنان دوپينگ تابىلىپ, التىننان قاعىلدى.

سونداي-اق, ازيا ويىندارى كەزىندە كۋرشەد بەكنازاروۆ (تاجىكستان, فۋتبول), نوۋرادين ءال-كۋردي (سيريا, كاراتە), يۋ سوپحانۋ (كامبودجا, سوفت تەننيس), موحاممەد جاسسيم (يراك, اۋىر اتلەتيكا) ەسىمدى سپورتشىلار دوپينگپەن ۇستالدى.

 

رۋسلان مەدەلبەك, ارنايى «استانا اقشامى» ءۇشىن

تاعىدا

admin

«استانا اقشامى» گازەتى

ۇقساس جاڭالىقتار

پىكىر ۇستەۋ

Back to top button