الەمدىك جانە ءداستۇرلى دىندەر ليدەرلەرىنىڭ ءىV سەزىنە قاتىسۋشىلارىنىڭ الدى استاناعا كەلدى. قۇرمەتتى قوناقتاردىڭ ءبىرى – امەريكالىق دەلەگاتسيانىڭ مۇشەسى, پراۆوسلاۆ وكىلى, امەريكالىق حريستياندىق شىركەۋلەرى وداعىنىڭ پرەزيدەنتى لەونيد كيشكوۆسكي قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىندا بولىپ, پروفەسسورلىق-وقىتۋشىلىق قۇرامى مەن جانە دوكتورانتتارمەن كەزدەستى.
ول «امەريكاداعى جانە قازاقستانداعى دىنارالىق ۇنقاتىسۋعا سالىستىرمالى تالداۋ» تاقىرىبىندا ءدارىس وقىدى. دىنارالىق, مادەنيەت ارالىق وركەنيەتتى ۇنقاتىسۋدى قالىپتاستىرۋدىڭ الەمدىك تاجىريبەلەرىنە توقتالىپ, دۇنيە جۇزىندە بولىپ جاتقان ۇردىستەرگە ءوز باعاسىن بەردى.
«مەن ەكىنشى مارتە استاناداعى سەزگە قاتىسىپ وتىرمىن. دىنارالىق بايلانىستار ماسەلەسى ءسوز بولىپ, وسى سۇراقتىڭ شەشىمىن بىرلەسە ىزدەگەنىمىز مەنى قۋانتادى. بۇل كوپتەگەن جيىنداردىڭ وزەكتى تاقىرىبىنا اينالدى. بۇل ءبىزدى بىرلەسكەن ارەكەتتەرىمىزگە دايىندايدى. الداعى ۋاقىتتاردا ارقايسىمىز ءوز سەنىمىمىزدىڭ تۇعىرتاسىندا تۇرىپ, الەم بولاشاعى ءۇشىن ارەكەتىمىزدى بىرىكتىرۋدە وسىنداي باسقوسۋلاردىڭ ارتىقشىلىعى كوپ. استانا مەن ءۇشىن بوتەن قالا ەمەس. مەنىڭ وتباسىم كەڭەستەر كەزەڭىندە ەكى ايىرىلىپ جارتىسى باتىسقا, جارتىسى شىعىسقا جەر اۋدارىلعان بولاتىن. قازاق جەرىندە تۇراقتاپ قالعان تۋىستارىممەن بايلانىسىمدى ۇزگەن ەمەسپىن», -دەدى لەونيد كيشكوۆسكي.
ايگۇل ۋايسوۆا
