كەشە «پريگورودنىي» تۇرعىن ءۇي الابىنداعى ارناساي كوشەسى مەن قابانباي باتىر داڭعىلىنىڭ تۇيىسكەن تۇسىندا جاڭا مەشىت جاماعاتقا ەسىگىن ايقارا اشتى.
ءبىر ۋاقىتتا مىڭ جارىمعا جۋىق ادام ساجدەگە جىعىلا الاتىن قۇلشىلىق ءۇيى كۇللى مۇسىلمان قاۋىمىنا قۇرمەتتى رامازان ايىنىڭ قارساڭىندا, قادىرلى جۇما كۇنىندە اشىلىپ وتىر. قاشاندا انا ەسىمىن ارداقتاعان ازاماتتار قۇلشىلىق ۇيىنە «ءالجان انا» اتاۋىن لايىق كورىپتى.
جاڭا مەشىتكە ارنايى ات باسىن بۇرعان مەملەكەت باسشىسى نۇرسۇلتان نازارباەۆ: «مەشىت ەلوردامىزعا كەلەتىن قوناقتار ءۇشىن قولايلى. بولاشاقتا بۇل مەشىت تەك ىزگىلىك پەن بىرلىكتىڭ قۇتتى مەكەنى بولادى دەپ سەنەمىن» دەپ ىزگى تىلەگىن ءبىلدىردى.
مەشىتتىڭ اشىلۋ سالتاناتىنا ارنايى الماتىدان كەلگەن قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجىۇلى جۇرتشىلىقتى قۇتتى كۇنمەن قۇتتىقتاپ: «اللانىڭ قالاۋىمەن قاسيەتتى ورازا ايىنىڭ قارساڭىندا وسىناۋ ءزاۋلىم مەشىت بوي كوتەردى. بۇگىن اق تۇيەنىڭ قارنى جارىلعان قۋانىشتى كۇن. مۇباراك ايدىڭ الدىندا استانا جۇرتشىلىعىنا بۇل ۇلكەن سىيلىق بولدى. البەتتە, جەر-جەردە وسىنداي مەشىتتەرىمىزدىڭ بوي كوتەرۋى ەل تىنىشتىعىنىڭ ارقاسى» دەدى.
ەلوردانىڭ سەگىزىنشى جاڭا مەشىتىنىڭ باس يمامدىعىنا ءدىن سالاسىندا ءبىراز جىلدار ەڭبەك ەتكەن ەرمەك مۇقاتاي تاعايىندالدى.
1 087 شارشى مەتر اۋماقتى قامتيتىن مەشىتتىڭ ىشكى بولمە قابىرعالارى شىعىس ستيلىندەگى سۋرەتتەرمەن بەزەندىرىلىپ, ەدەنىنە كەراموگرانيت تاقتا توسەلگەن.
جايىق ناعىماش
