استانادا ءداستۇرلى تۇردە وتەتىن قازاقستان حالقى تىلدەرىنىڭ ءXىV قالالىق فەستيۆالى بەيسەنبى كۇنى مارەسىنە جەتتى. ءبىر اي بويى مەملەكەتتىك ءتىلدىڭ شاشباۋىن كوتەرىپ, ۇلتتىق رۋحتى سەرپىلتكەن فەستيۆال اياسىندا 300-دەن استام شارا ۇيىمداستىرىلىپ, ونىڭ 70-كە جۋىعى ۇلت قايراتكەرى احمەت بايتۇرسىنۇلىنىڭ 140 جىلدىعىنا ارنالىپتى.
22 تامىز كۇنى «ءتىل – اسا قادىرلەپ ۇستايتىن بايلىعىمىز!» دەگەن اتپەن سالتاناتتى تۇردە اشىلعان فەستيۆال شەڭبەرىندە «جۇرەكتىڭ ءسوزىن سويلە, ءتىل!» اتپەن اباي وقۋلارى, «قازاقشا سويلەيمىز, وينايمىز!» بالالار مەرەكەسى, «ۇزدىك جەكسەنبىلىك مەكتەپ», «مەملەكەتتىك ءتىل – مەملەكەتتىك قىزمەتتە» بايقاۋلارى, ادەبي-مۋزىكالىق «ولەڭگە اركىمنىڭ-اق بار تالاسى» , «تاعدىرىم – تىلىمدە, سىرىم – كۇيىمدە!» سىندى قازاق ءتىلىنىڭ مەرەيىن اسىرعان كوپتەگەن كەشتەر ۇيىمداستىرىلدى. كۇنى كەشە ەۋرازيا ۇلتتىق ۋنيۆەرسيتەتىندە بەلگىلى عالىمداردىڭ باسىن قوسىپ, كەلەلى اڭگىمەگە ارقاۋ بولعان «احمەت بايتۇرسىنۇلى: قايراتكەر اماناتى جانە ۇلت مۇراتى» تاقىرىبىنداعى عىلىمي-تەوريالىق كونفەرەنتسيا دا فەستيۆال اياسىنداعى ءىرى شارالاردىڭ ءبىرى. بۇدان بولەك, ەلوردانىڭ تۇكپىر-تۇكپىرىندە قازاق ءتىلىنىڭ قولدانىلۋ اياسىن كەڭەيتۋگە باعىتتالعان دوڭگەلەك ۇستەل جيىندارى, القالى باسقوسۋلار, پىكىر الماسۋلار وتكەن.
قالالىق تىلدەردى دامىتۋ باسقارماسى وكىلدەرى فەستيۆالگە بالاباقشادان باستاپ, مەكتەپتەر, جوعارى وقۋ ورىندارى, مەملەكەتتىك مەكەمەلەر مەن ۇيىمدار, قوعامدىق بىرلەستىكتەر بەلسەنە قاتىسقانىن ايتادى. ولار, اسىرەسە, الماتى اۋدانى اكىمدىگىنىڭ ەڭبەگىن ايرىقشا اتاپ وتىر.
وقۋشىلار سارايىندا وتكەن فەستيۆالدىڭ جابىلۋ راسىمىندە ەلىمىزگە ەڭبەك سىڭىرگەن قايراتكەر ابيىربەك تىناليەۆ, رەسپۋبليكالىق بايقاۋلاردىڭ لاۋرەاتتارى پەريزات تۇراروۆا, قۇرماش ىبىشەۆتار اننەن شاشۋ شاشسا, ق.قۋانىشباەۆ اتىنداعى قازاق اكادەميالىق مۋزىكالىق دراما تەاترىنىڭ ارتىستەرى احمەت بايتۇرسىنۇلىنىڭ قايراتكەرلىك قىرىنان سىر شەرتەتىن كورىنىس قويدى. جۇرتشىلىق الدىندا «مەملەكەتتىك ءتىل – مەملەكەتتىك قىزمەتتە» بايقاۋىنىڭ جەڭىمپازى – استانا قالالىق سوتى قىزمەتكەرلەرى دە ونەر كورسەتتى.
جىل سايىن قىركۇيەك ايىنىڭ ءۇشىنشى جەكسەنبىسىندە اتالىپ وتەتىن قازاقستان حالقى تىلدەرىنىڭ كۇنىنە ورايلاستىرىلعان ءXىV قالالىق فەستيۆالىن قورىتىندىلاعان ۇيىمداستىرۋشىلار اۋقىمدى شاراعا بەلسەنە قاتىسقان مەكەمە باسشىلارىن العىس حاتپەن ماراپاتتادى.
ءتىل فەستيۆالىنىڭ جابىلۋ راسىمىنە جينالعان جۇرتشىلىقتىڭ اراسىندا جاستاردىڭ قاراسى كوپ بولدى.ءتىپتى بالاباقشا جاسىنداعى بالدىرعانداردى دا كوزىمىز شالدى. مۇنداي شارالاردىڭ ادامنىڭ سانا-سەزىمىن سەرپىلتىپ, ۇلتتىق رۋحىن وياتۋعا كومەگى كوپ ەكەندىگىن ەسكەرسەك, وعان جاستاردىڭ كوپتەپ كەلۋى قۇپتارلىق ءىس. وسكەلەڭ ۇرپاقتىڭ ساناسىنا جاستايىنان «سەن – قازاقسىڭ, سەنىڭ انا ءتىلىڭ – قازاق ءتىلى» دەگەن ۇعىمدى سىڭىرە بىلسەك, كەلەشەكتە ۇلتجاندى ازاماتتاردىڭ تاربيەلەنىپ شىعۋىنا ۇلەس قوسارىمىز انىق.
قىمبات نۇرعالي
