اناعا قامقورلىق ارتىق بولمايدى
حالىقارالىق ايەلدەر مەرەكەسى كەزىندە استاناداعى №1 قالالىق بالالار ەمحاناسىندا اشىق ەسىك كۇندەرى ءوتتى.
بۇل – قالاداعى №1 ەمحانانىڭ تۇراقتى وتكىزەتىن ءداستۇرى. ايەلدەر مەرەكەسى قارساڭىندا وتكەندىكتەن بولار, وسى جولى دارىگەرلەر جۇكتى جانە جاڭا بوسانعان ايەلدەردى تولعاندىرىپ جۇرگەن سۇراقتارعا جاۋاپ بەردى. شاراعا جاس بالاسى بار اتا-انالار بەلسەنە قاتىستى. ولار نارەستەنىڭ ءوسىپ-جەتىلۋى جونىندە, تاماقتاندىرۋ, ويناتۋ, وي-ءورىسىن دامىتۋ جونىندەگى مامانداردىڭ كەڭەسىنە جۇگىندى.
ەمحانانىڭ ۋچاسكەلىك دارىگەرى شولپان ساحيەۆانىڭ ايتۋىنشا, جاڭا بوسانعان ايەلدەر كۇيزەلىسكە ءجيى ۇشىرايدى ەكەن. سونىڭ الدىن الۋ ءۇشىن اق حالاتتىلار ارنايى دارىستەر وقىپ, بولاشاق انالارعا اقىل-كەڭەستەرىن ايتتى. «كەيبىر وتباسىلار جاس بوسانعان ايەلدى قامقورلىققا الۋدىڭ ورنىنا بار شارۋانى سونىڭ موينىنا ارتىپ قويادى. بالاسىن دا باعىپ, ءۇيدىڭ كۇيبەڭ تىرشىلىگىن دە جايعاعان ايەل قالجىراماي قايتسىن؟! ەگەر شارشاۋ ۇزاققا سوزىلا بەرسە, ونىڭ سوڭى كۇيزەلىسكە ۇشىراتۋى مۇمكىن. سوندىقتان, قول-اياعىن جاڭا باۋىرىنا العان ايەلگە جاقىندارى جاناشىرلىقپەن قاراپ, كومەكتەسۋى كەرەك. حالقىمىز بالا قىرقىنان شىققانعا دەيىن ايەل ادام كۇتىمدە بولۋى كەرەك دەپ تەگىن ايتپاعان. ال, ەگەر انا كۇيزەلىسكە تۇسسە, ەمحاناعا كەلۋى كەرەك. مۇندا ارنايى پسيحولوگ-مامانداردىڭ, وتباسىن جوسپارلاۋ جونىندەگى دارىگەرلەردىڭ كومەگىن الا الادى» دەيدى شولپان ساحيەۆا.
شارانىڭ سوڭىندا دارىگەرلەر ەمحاناعا كەلۋشىلەردىڭ سۇراقتارىنا جاۋاپ بەرىپ, قولدارىنا قاجەتتى اقپاراتتار توپتاسقان كىتاپشالار ۇستاتتى.
قىمبات نۇرعالي