جاڭالىقتارتاعزىم

انالار ءدان ريزا بولدى

a5a57a8c8a55653e4ea84db0d1f

استانا قالاسىنداعى اۋعانستان سوعىسىندا قازا بولعان جاۋىنگەرلەرگە ارنالعان ەسكەرتكىش-مەموريال الاڭىندا ەسكە الۋ ميتينگىسى ءوتتى. 1979 جىلدىڭ 25 جەلتوقسان كۇنى كەڭەس اسكەرىنىڭ شەكتەۋلى كونتينگەنتىنىڭ جاۋىنگەرلەرى اۋعانستان ەلىنە كىرگەن بولاتىن. سودان بەرى وسى كۇن سول سوعىستا قۇربان بولعان ساربازداردى ەسكە الۋ كۇنى بولىپ قالىپتاسقان.

استانا قالاسى اكىمدىگى, قالالىق ءماسليحات, «نۇر وتان» پارتياسىنىڭ قالالىق فيليالى وكىلدەرى, جاۋىنگەر-ينتەرناتسيوناليستەر, اۋعانستان سوعىسىندا قازا بولعان جاۋىنگەرلەردىڭ اتا-انالارى, اسكەريلەر مەن ستۋدەنت جاستار قاتىسقان جيىن اياسىندا العاش رەت «جانقيار روتا» رەسپۋبليكالىق اكتسياسى ۇيىم­داستىرىلدى. جىلداعى داستۇرمەن مەشىتتە جانە شىركەۋدە سوعىس بوزداقتارىنا قۇران باعىشتاعان جاۋىنگەر-ينتەرناتسيوناليستەر وسى جولى قازا بولعان جەرلەستەردىڭ بەينەسۋرەتتەرىن الىپ ءجۇردى.

ميتينگتى اشقان استانا قالاسىنىڭ «اۋعانستان سوعىسى مۇگەدەكتەرى مەن ارداگەرلەرى وداعى» قب توراعاسى سەرىك كەنجەبەكوۆ ەسكە الۋ كۇنىنىڭ ءمان-ماعىناسىن قىسقاشا بايانداپ بەردى. استانا قالاسى ءماسليحاتىنىڭ دەپۋتاتى, «نۇر وتان» پارتياسى  قالالىق فيليالى توراعاسىنىڭ ورىنباسارى مەيرامباي ورالوۆ جينالعان قاۋىم الدىندا اۋعانستاندا بولعان جاعدايدىڭ تاريحتاعى ورنىن, ونداعى قازاقستاندىق جاۋىنگەرلەردىڭ ەرلىگى حالىق جادىنان وشپەيتىنىن, جاۋىنگەر-ينتەرناتسيوناليستەردىڭ قالالىق ۇيىمى ەلوردامىزداعى  قوعامدىق شارالارعا بەلسەندى قاتىسۋشى ەكەنىن اتاپ ءوتتى. اۋعانستان دالاسىندا دۇشپان قولىنان قازا بولعان جاۋىنگەرلەردىڭ انالارى پەيشەنكۇل توقماعانبەتوۆا مەن نينا فەدوروۆنا نەستەروۆا جۇرەكجاردى سوزدەرىن ايتىپ, قانشاما جىلدار وتسە دە سوعىس دالاسىنان قايتپاعان بالالارىنىڭ اتىن ارداقتاپ جۇرگەن  جاۋىنگەر-ينتەرناتسيوناليستەرگە, بيلىك ورگاندارى مەن قوعامدىق ۇيىمداردىڭ وكىدەرىنە ريزاشىلىقتارىن ءبىلدىردى.

ەسكەرتكىشكە گۇل شوقتارىن قويۋ راسىمىنەن كەيىن انالار «اۋعانستان سوعىسى مۇگەدەكتەرى مەن ارداگەرلەرى وداعى» ۇيىمىندا قوناقتا بولدى. ءدامدى ءشاي ۇستىندە ەستەلىكتەر ايتىلىپ, ءان شىرقالدى. ۇيىم اتىنان بەرىلگەن  سىيلىقتار ءۇشىن انالار تىپتەن ءدان ريزا بولدى.

 عالىم قوجابەكوۆ

تاعىدا

عالىم قوجابەكوۆ

«استانا اقشامى» گازەتى باس رەداكتورىنىڭ ورىنباسارى

ۇقساس جاڭالىقتار

پىكىر ۇستەۋ

Back to top button