باس قالاداعى №2 كوپبەيىندى قالالىق اۋرۋحانانىڭ دارىگەرلەرى پانكرەاتيتپەن اۋىراتىن جۇكتى ايەلدى امان الىپ قالدى. بۇل پانكرەاتيتتىڭ اۋىر اسقىنعان ءتۇرى كوپ جاعدايدا ناۋقاستى ءولىم جاعدايىنا اپارۋى مۇمكىن.
جۇكتىلىكتىڭ 39-اپتاسىندا كەلىنشەكتىڭ بويىندا پانكرەونەكروز ورشىگەن, بۇل – جەدەل پانكرەاتيتتىڭ ومىرگە قاۋىپ توندىرەتىن اسقىنعان ءتۇرى, ۇيقى بەزى ءتىنىنىڭ ولگەنىن بىلدىرەدى. باسىم كوپشىلىگىندە دەنە مۇشەسىنىڭ جەتكىلىكسىز دامۋىنا, قاننىڭ ۋلانۋىنا جانە ناۋقاستىڭ ولىمىنە اكەلەدى. ناۋقاس ايەلدى ءىشىنىڭ جوعارعى بولىگى قاتتى شانشىپ اۋىرىپ, جۇرەك اينۋ, قۇسۋ بەلگىلەرى مازالاعان. ناۋقاس شۇعىل تۇردە جانساقتاۋ بولىمىنە جاتقىزىلدى. انا مەن بويىنا بىتكەن ءسابي ومىرىنە قاۋىپ تونگەنىنە بايلانىستى جان ساقتاۋ بولىمىندەگى اكۋشەر-گينەكولوگتار بريگاداسى جەدەل بوساندىرۋ تۋرالى شەشىم قابىلدادى.
بوسانعاننان كەيىن كەلىنشەكتىڭ جاعدايى اۋىر بولدى, اۋرۋحانانىڭ باس دارىگەرى نۇربول تۇرسىنباەۆ ارىپتەستەرىمەن بىرلەسە دياگنوستيكا جۇرگىزىپ, كلينيكالىق جاعدايدىڭ كۇردەلىلىگىنە قاراماستان, حيرۋرگيالىق ارالاسۋسىز ەمدەۋ تۋرالى شەشىم قابىلدادى.
«جۇرگىزىلىپ جاتقان ەم اياسىندا جاعدايدى تۇراقتاندىرىپ, ايەلدى جالپى حيرۋرگيا بولىمشەسىنە اۋىستىرۋعا مۇمكىندىك تۋدى. باقىتىمىزعا وراي, وپەراتسيا قاجەت بولمادى, كوپ ۇزاماي ايەلدىڭ جاعدايى وڭالدى» دەدى ەمدەۋشى دارىگەر ايدار جۇماعاليەۆ.
قازىر انا مەن بالا ءوزىن جاقسى سەزىنەدى جانە اۋرۋحانادان شىعۋعا دايىندالىپ جاتىر.
