شەتەلدە وقيتىن قازاق ستۋدەنتتەرىنىڭ كەيبىرى تىلدىك پراكتيكانى جوعالتىپ الماس ءۇشىن قوسىمشا جۇمىسقا ورنالاسادى. ويتكەنى اكادەميالىق وقۋ جىلى كەزىندە جازاتىن ەسسەلەر كوپ, بىراق اۋىزشا تالقىلاۋ از بولاتىندىقتان, ستۋدەنتتىڭ اعىلشىنشا سويلەۋ قابىلەتى اقساپ قالۋى مۇمكىن. سونى ەسكەرىپ, مەن دە انگليادا جۇرگەنىمدە جۇمىسقا تۇرعانمىن. ونداعى ءبىر جىلدىق تاجىريبەم بارىسىندا بريتانيالىق ءومىردىڭ ءبىز بىلە بەرمەيتىن جاقتارىمەن جاقىنىراق تانىسۋدىڭ ءساتى ءتۇستى.
مينيمالدى جالاقى – ساعاتىنا 7,83 فۋنت
ماعان جۇمىس ۇسىنعان مەكەمە تاماق سەرۆيسىمەن اينالىساتىن اگەنتتىك ەدى. ونداعى قىزمەتكەرلەردىڭ تۇگەلگە جۋىعى شەففيلد قالاسىنىڭ ستۋدەنتتەرى بولدى. سەبەبى جۇمىس ىستەۋ كەستەسى مەن شارتتارى جاستارعا وتە ىڭعايلى. ماسەلەن, ءار دۇيسەنبى تاڭەرتەڭ مەنەدجەرگە قاي كۇندەرى بوس بولاتىنىڭدى جازاسىڭ. سوعان سايكەس مەنەدجەر سەنى سول اپتاداعى ءىس-شارالارعا بەلگىلەيدى. جالاقىنى جاس ەرەكشەلىكتەرىنە قاراي تولەيدى. ەگەر جاسىڭ 25-تەن اسسا, وندا ساعاتىنا 7,83 فۋنت ستەرلينگ الاسىڭ (شامامەن 3800 تەڭگە), رەسمي دەمالىس كەزىندەگى ءار جۇمىس ساعاتىڭ 11 فۋنت ستەرلينگكە (شامامەن 5300 تەڭگە) باعالانادى. بۇل – انگلياداعى ەڭ مينيمالدى جالاقى. ساباعىنا دا كەسىرى تيمەيتىن ءارى قالتاسىنا دا ەداۋىر كومەك بولاتىندىقتان, مۇنداي جۇمىستار جەرگىلىكتى ستۋدەنتتەر اراسىندا دا, شەتەلدىك ستۋدەنتتەر اراسىندا دا تانىمال. بىزدەر, ياعني سىرتتان كەلۋشىلەر, ءۇشىن ۆيزا بويىنشا اپتاسىنا 20 ساعاتقا دەيىن جۇمىس ىستەۋگە رۇقسات ەتىلگەن.
جالدانعان اگەنتتىگىمىز تاماق سەرۆيسىمەن اينالىساتىن بولعاندىقتان, كوبىنەسە داياشىلىق مىندەتتى اتقاردىق. سونىمەن قوسا, كەي كەزدەرى فۋتبول ماتچتارى مەن ات جارىستارىندا فاست-فۋد ساتىپ, كاسسير رەتىندە دە جۇمىس ىستەيتىنبىز.
اعىلشىن تويلارىنىڭ داستارقانى قانداي؟
مەرەكەلىك كەشتەر مەن بانكەتتەردە ءجيى قىزمەت كورسەتكەنىمىز سەبەپتى, ونداعى ەرەكشە جايتتاردى كوپ بايقاپ جۇردىك. جالپى, اعىلشىن تويلارىنىڭ بىزدەگىدەن ەڭ ۇلكەن ايىرماشىلىعى اسىندا ەكەن. مەرەكەلىك داستارقاننىڭ ءمازىرى ءۇش بولىكتەن تۇرادى. اۋەلى ستارتەر رەتىندە ادام باسىنا ءبىر-ءبىر كىشىگىرىم ءبالىش نە سالات, سوسىن نەگىزگى اس, سوڭىنان دەسەرت تاراتىلادى. تاماقتى داياشىلار ءار كىسىگە جەكەلەي ۇلەستىرەدى. ياعني قوناقتار ۇستەلگە ەندى جايعاسقاندا, وندا نان مەن مايدان باسقا جەيتىن ەشتەڭە تۇرمايدى. ال تاماقتىڭ پورتسيالارى شاپ-شاعىن. ماسەلەن, نەگىزگى اس رەتىندە 100 گرامم ەت, 1 بۇقتىرىلعان كارتوپ جانە 2-3 ءسابىز ءتىلىمىن تارەلكەگە سالىپ, ۇستىنەن سوۋس قۇيىپ, جانىنا يوركشير پۋددينگىن قوسىپ اكەلە سالۋى مۇمكىن. ەسەسىنە, تاۋ-تاۋ تاماق جەلىنبەي قالىپ, ىسىراپ بولمايدى.
تويلارىنان اسابالاردى دا كورمەدىك. بانكەت باستالعاندا, ءبىر كىسى ساحناعا شىعىپ ءسوز سويلەۋى مۇمكىن. بىراق بۇكىل كەش بويى ەشكىم ميكروفون ۇستاپ ورتادا جۇرمەيدى. ۇزىن-سونار توست ايتىپ جاتاتىن ادام دا جوق. سالتاناتتى كەشتەردە ەليزاۆەتا پاتشايىمنىڭ قۇرمەتىنە جاي عانا ءبارى ءبىراۋىزدان «The Queen!» دەپ بوكال سوعىستىرادى دا, ۇستەل-ۇستەلدەرىنە تاراسادى.
تويباستارعا – «Gucci» ءيىسسۋى
ايتپاقشى, بىزدەگى تويباستارعا ۇقساس ءداستۇر اعىلشىنداردا دا بار بولىپ شىقتى. بىراق ولارداعى تويباستارعا بەرىلەتىن سىيلار قۇنى جاعىنان الدەقايدا قىمباتتاۋ. مىسالى, مەن قاتىسقان بانكەتتەردىڭ بىرىندە ءار قوناققا ەستەلىك رەتىندە «Gucci» ءيىسسۋىن سىيلادى.
تاعى ءبىر قىزىعى, بريتانيالىقتار توي بولاتىن مەيرامحانانىڭ ادەمىلىگىنە اسا ءمان بەرمەيدى. داڭعاراداي زالدىڭ ىشىنە كىشىگىرىم ۇستەلدەردى قويىپ, قابىرعالارعا تۇگەلدەي ماتا ءىلىپ تە توي وتكىزە بەرەدى. بىراق داستارقاننىڭ ورتاسىنا شىراعدان جاعىپ قويۋ, تاقىرىپتىق فوتو-زونالار دايىنداۋ, وركەستر شاقىرۋ سياقتى دەتالدارعا ەرەكشە كوڭىل بولەدى.
ءبيدى ولار قاتتى جاقسى كورەدى. جاقسى كورەتىنى سونشالىق, بيكەشتەر بيىك وكشەلى تۋفليلەرىن شەشىپ تاستاپ, جالاڭاياق بيلەۋگە قۇمار. الگى شەشىلگەن تۋفليلەرى كەي كەزدەرى شەشىلگەن جەرىندە قالىپ كەتەدى. تويدان كەيىن زالدى جيناعاندا, بۇرىش-بۇرىشتا جايراپ جاتقان تۋفليلەردى جيناپ الاتىنبىز. سوندا وزدەرى ۇيلەرىنە قالاي قايتادى دەپ ويلايسىزدار عوي؟ سومكەلەرىندە ىڭعايلى باتەڭكەلەرى بولۋى مۇمكىن. ال كەيبىر بانكەتتىڭ قىزعان تۇسىندا جاعاجايعا كيەتىن كادىمگى سۇيرەتپە اياق كيىمدەردى ساتاتىن ءبىر كىسى كەلىپ, ىڭعايسىز تۋفلي يەلەرىن «قۇتقارادى».
كۇن سايىن – 300 العىس
داياشىلىق قىزمەتتىڭ ەڭ تاماشا تۇسى – ادامداردىڭ العىسىن كۇنىنە مىڭ رەت ەستيسىڭ. ءوزىم ءۇشىن قىزىق بولسىن دەپ, بەس ساعاتتىق جۇمىس كۇنىمدە ەستىگەن «راقمەتتەردى» ساناعانىمدا, 300-دەن اسىپ جىعىلدى. جالپى, «thank you» مەن «sorry» اعىلشىنداردىڭ ەڭ كوپ ايتاتىن ءسوزى سەكىلدى. العىسقا تويىپ جۇرەتىن بولعان سوڭ با, جۇمىستىڭ دا اۋىرتپالىعىن اڭعارا بەرمەيسىڭ. تارەلكەلەردى ۇستەلدىڭ ۇستىنەن جيناپ الۋعا بارساڭ, ونى قوناقتاردىڭ ءوزى-اق الدەقاشان ساتىلاي جيناپ, سەنىڭ الىپ كەتۋىڭە دايىنداپ قويعان بولىپ شىعادى. ءتورت-بەسەۋىن بىردەي كوتەرسەڭ, «ءالىڭ جەتە مە؟ كوتەرە الاسىڭ با؟ سەنىمدىسىڭ بە؟» دەپ پالەن قايتارا سۇرايدى. ءتىپتى داستارقاننىڭ بەتىنە كوفەنى اۋدارىپ العان كەزىم دە ەسىمدە. «ەشتەڭە ەتپەيدى. بارىندە بولىپ تۇرادى عوي. قولىڭ كۇيىپ قالمادى ما؟» دەپ قۇددى سوعان وزدەرى كىنالى ادامداي بايەك بولدى.
مەنەدجەرلەرىمىزدىڭ قاي-قايسىسى دا ەرەجەگە بەرىك ەدى. ءار شارا باستالاردان بۇرىن وتەتىن كىشىگىرىم جينالىستا مىندەتتى تۇردە «الدا-جالدا ءورت بولا قالسا, قاي ەسىكتەن شىعۋ كەرەك؟» دەگەن نارسەنى تۇسىندىرەتىن. بۇزۋعا بولمايتىن تاعى ءبىر قاعيدا بار. بانكەت بىتكەن سوڭ, داياشىلار تاماقتاناردا, ولارعا ەشقاشان بالىقتىڭ ەتىن جەگىزبەيدى. ويتكەنى 3-4 ساعات بويى توڭازىتقىشتا تۇرماعان بالىقتى جەگەن ادام ۋلانىپ قالۋى مۇمكىن.
يتتەر دە قوناققا بارادى
قالا مەرى سياقتى قۇرمەتتى لاۋازىمداعى كىسىلەر كەيدە تويعا يتتەرىمەن بىرگە كەلەدى. ويتكەنى ول يت جاڭاعى كىسى ءۇشىن وتباسىنىڭ ءبىر مۇشەسى بولىپ كەتكەن. ونداي اۋلەتتىڭ يتتەرى دە «سالماقتى», كوپشىلىك الدىنداعى مادەنيەتتەن حابارى بار ماقۇلىقتار ەكەن. يەسىنىڭ اياعىنىڭ تۇسىندا توي تاماشالاپ تىپ-تىنىش جاتادى. قارنى اشسا نە شولدەسە, وعان دا داياشىلار تاماق-سۋىن اكەلىپ بەرەدى.
جالپى, يتتەردىڭ اعىلشىن قوعامىنداعى قۇرمەتى جوعارى. كىشىگىرىم كافەلەردىڭ كوپشىلىگى كىرەبەرىسكە «Dogs welcome» («يتتەرگە ەسىگىمىز اشىق») دەگەن تاقتايشالاردى ءىلىپ قويادى. بالا جەتەكتەگەن كىسىلەردەن گورى يت جەتەكتەگەن ادامدار كوپ. فاست-فۋد ساتاتىن دۇڭگىرشەكتەردە جۇمىس ىستەگەنىمىزدە, يتتەرگە ارنالعان بالمۇزداق تا ساتىلىمدا بار ەدى. ونىڭ ەرەكشەلىگى, لاكتوزاعا اللەرگياسى بار جانۋارلاردىڭ جەي بەرۋىنە بولادى. بۇعان قوسا, «Butternut Box» سەكىلدى كومپانيالار «يتتەرگە ارنالعان تاماقتى ءبىز ۇيدە دايىندايمىز» دەپ جار سالا جارناما جاساپ, مەرەكەلىك شارالار كەزىندە ونىمدەرىن ساتادى. ونى كورىپ «ءبىزدىڭ قازاقتىڭ يتتەرى ءومىر بويى ۇيدە دايىندالعان تاماقتى جەيدى عوي وندا» دەپ ءبىر كۇلىپ قالاسىڭ.
سىرا جاۋسا – جەڭىستىڭ بەلگىسى
جۇمىستىڭ رەتىمەن كەيدە ستاديوندارداعى تاماق ساتاتىن ءدۇڭگىرشەكتەرگە شىعاتىنبىز. «شەففيلد ۋەنسدەي», «روتەرحەم يۋنايتەد» سياقتى فۋتبول كلۋبتارى وينايتىن كۇنى ستاديوندا ينە شانشار ورىن بولمايدى. چەمپيونشيپتە ونەر كورسەتەتىن كوماندالاردىڭ وزىنە جەرگىلىكتى تۇرعىندار وسىلاي قولداۋ كورسەتەدى. ولاردىڭ اراسىندا ەر كىسىلەرمەن بىرگە, سۇيىكتى كومانداسىنىڭ شارفىن جامىلعان اجە-اپالار دا جۇرەدى.
ماتچ الدىنداعى جارتى ساعاتتان باستاپ دۇڭگىرشەك الدىنداعى كەزەك كوبەيەدى. ءار بەس ادامنىڭ تورتەۋى سىراعا تاپسىرىس بەرەدى. سىرادان كەيىنگى ەڭ كوپ سۇرانىسقا يە سۋسىن – «Bovril». بۇل – ەتتىڭ ءدامى بار قويۋ قوڭىر ءتۇستى بريتانيالىق سورپا.
قىزىقتىڭ كوكەسى ءبىرىنشى تايم بىتكەندە باستالادى. ويىن كەزىندە تاماعى قارلىققانشا جانكۇيەرلىك ەتكەن جۇرت جاپا-تارماعاي دۇڭگىرشەكتەرگە قاراي جۇگىرەدى. ەگەر سۇيىكتى كومانداسى ۇتا باستاسا, بوتەلكەدەگى سىرانى جان-جاعىنداعىلارعا اتىپ, ءدالىزدىڭ ويران-توپانىن شىعارادى. جالپى, سىرادان جاڭبىر جاۋىپ جاتسا, جەرگىلىكتى كلۋب جەڭىپ جاتىر دەگەن ءسوز. كەيدە ەكى جاقتىڭ جانكۇيەرلەرى ءبىر-بىرىمەن تەكەتىرەسىپ قالادى. ونداي كەزدەرى دەرەۋ كۇزەت قىزمەتكەرلەرى كەلىپ, دۇڭگىرشەكتەردىڭ ەسىك-تەرەزەلەرىن قىمتاپ تاستايدى.
بوتاگوز ماراتقىزى
