«استانا وپەرا» تەاترىنىڭ يتالياعا جاساعان گاسترولدىك ساپارى اياقتالدى. استانالىق ونەر ۇجىمى گەنۋيا قالاسىنداعى «كارلو فەليچە» تەاترىندا ا.جۇبانوۆ پەن ل.ءحاميديدىڭ «اباي» وپەراسىن (ليبرەتتوسىن جازعان م.اۋەزوۆ) جانە الەمدىك كلاسسيكا سانالاتىن ل.ۆ.بەتحوۆەننىڭ №9 سيمفونياسىن تالعامپاز جۇرتتىڭ نازارىنا ۇسىندى
«استانا وپەرانىڭ» اپپەنين تۇبەگىنە بۇل العاشقى ساپارى ەمەس. وسىدان ءۇش جىل بۇرىن باس قالا ونەرپازدارى يتاليالىقتاردى ونەرىمەن ءتانتى ەتكەن ەدى. وسى جولى ارنايى شاقىرتۋمەن وپەرا سوليستەرى, سيمفونيالىق وركەستر مۋزىكانتتارى, حور, بالەت جانە ميمانس ارتىستەرى, گريمدەۋشىلەر, جارىقتاندىرۋشىلار, رەكۆيزيتورلار مەن ساحنا ماشينيستەرى باردى.
بۇدان بۇرىن «اباي» وپەراسى گەرمانيادا نەمىس تىلىندە ورىندالدى. ال يتاليادا بۇل وپەرا قازاق تىلىندە تۇڭعىش رەت شىرقالدى. اباي پارتياسىن قازاقستاننىڭ ەڭبەك سىڭىرگەن قايراتكەرلەرى, «استانا وپەرا» تەاترىنىڭ جەتەكشى سوليستەرى سۇندەت بايعوجين مەن جانات شىبىقباي ورىندادى. اجار پارتياسى قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى مايرا مۇحامەدقىزى جانە قازاقستاننىڭ ەڭبەك سىڭىرگەن ءارتىسى جاننات باقتايعا بۇيىردى. سيمفونيالىق وركەسترگە وسى سپەكتاكلدىڭ قويۋشى ديريجەرى, قازاقستاننىڭ ەڭبەك سىڭىرگەن قايراتكەرى, «استانا وپەرا» تەاترىنىڭ باس ديريجەرى الان بورىباەۆ جەتەكشىلىك ەتتى.
«استانا وپەرا» تەاترى ءباسپاسوز قىزمەتىنىڭ حابارلاۋىنشا, «ابايدى» تاماشالاۋعا حالىق وتە كوپ جينالىپ, زالدا ينە شانشار ورىن قالمادى. وپەرانى كورۋگە احمەت جۇبانوۆتىڭ نەمەرەسى تۇرار ارنايى ۇشىپ كەلدى. قويىلىم اياقتالعان سوڭ, كورەرمەندەر ارتىستەردەن قولتاڭبا الۋعا اسىقتى.
ءتورت بولىمنەن تۇراتىن, شيللەردىڭ «شاتتىق» وداسىنىڭ ماتىنىنە جازىلعان ل.ۆ.بەتحوۆەننىڭ №9 سيمفونياسىنا دا جۇرتتىڭ ىقىلاسى تاماشا بولدى. ولار العان اسەرلەرىمەن كونتسەرت اياقتالعان سوڭ ءبولىسىپ جاتتى. اتالمىش شىعارما ءدال وسى زالدا ءۇش جىل بۇرىن دا ورىندالعان. كورەرمەندەر استانالىق ونەرپازدارمەن ساعىنىسا قاۋىشتى. ونەردە شەكارا بولمايتىنىن وسى گاسترولدىك ساپار قايتا دالەلدەدى.
