كوللەدج تۇلەكتەرى كەشەندى تەست تاپسىرۋى كەرەك پە؟
راحمان الشانوۆ,
قر جوو قاۋىمداستىعىنىڭ توراعاسى:
بارىمىزگە بەلگىلى, جوعارى وقۋ ورنىنا تۇسۋگە نيەتتى مەكتەپ تۇلەكتەرى بىرىڭعاي ۇلتتىق تەستىلەۋدەن وتەدى. ال, مەكتەپتى 2-3 جىل بۇرىن ءبىتىرىپ قويعاندار وقۋعا ءتۇسۋ ءۇشىن بەلگىلەنگەن جوعارى وقۋ ورىندارىنىڭ قابىرعاسىندا كەشەندى تەست تاپسىرادى.
ال, كوللەدج تۇلەكتەرى وسى ۋاقىتقا دەيىن جوعارى وقۋ ورنىنا ەمتيحانسىز قابىلدانىپ كەلدى.
ءبىز وسى ولقىلىقتىڭ ورنىن تولتىرىپ جاتىرمىز. بيىلدان باستاپ كوللەدج بىتىرۋشىلەرى دە كوپپەن بىرگە تەستىلەۋدەن وتەدى.
كوللەدج ستۋدەنتتەرىنڭ اراسىندا 9-سىنىپتى, 11-سىنىپتى ءبىتىرىپ كەلگەندەرى بار. ولاردىڭ ارقايسىسىنا لايىقتى باعدارلاما جاسالادى.
بۇل وزگەرىستى بيىل ەنگىزۋدىڭ قاجەتى جوق دەيتىندەر ارامىزدان تابىلىپ جاتىر. بىراق, ساننان گورى ساپاعا قول جەتكىزۋدى ويلاساق, مۇنى سوزباقتاي بەرۋدىڭ قاجەتى جوق.
نەگە دەسەڭىز, سوڭعى 7-8 جىلدا كوللەدج بىتىرگەن جاستاردىڭ سانى 130 مىڭنان اسىپ كەتىپتى. ولاردىڭ 100 مىڭى ءبىلىمىن جوعارى وقۋ ورنىندا ودان ءارى جالعاستىرعان. ماماندىق الدىم, جۇمىس ىستەيمىن دەيتىندەرى نەبارى 30 پايىزدىڭ و جاق بۇ جاعىندا. بۇدان نە تۇيۋگە بولادى؟ كوللەدجدەر مامان ەمەس, جوعارى وقۋ ورنىنا تۇسەتىن ستۋدەنتتەردى دايارلاۋمەن اينالىسىپ كەلگەن دەگەن ءسوز. ۇبت مەن كەشەندى تەست تاپسىرۋدان قاشقان وقۋشىلاردىڭ ءبارى كوللەدجدى ساعالاعان. جوعارى وقۋ ورنىنا ەشقانداي ەمتيحانسىز ءتۇسۋدى عانا كوزدەگەن. ونىڭ ۇستىنە كوللەدج تۇلەكتەرىنىڭ بىردەن ەكىنشى كۋرسقا قابىلداناتىن باسىمدىعى تاعى بار.
ەگەر ءوز بىلىمىنە سەنىمدى بولسا, تەست تاپسىرۋدىڭ قورقاتىنداي دانەڭەسى جوق. جاقىندا عانا كوللەدج تۇلەكتەرىنىڭ ءبىر توبى بايقاۋ تەستتەرىن تاپسىرىپ كوردى. ناتيجەسى جامان ەمەس. 60 پايىزى 50-دەن جوعارى بالل جينادى. ەگەر تەستتەن وتە الماعان ەكەن, وندا قولىندا كوللەدجدىڭ ديپلومى بار, جۇمىس جاساسىن. كوللەدجدى نە ءۇشىن وقىدى؟ جۇمىس ىستەيمىن دەپ پە, الدە جوعارى وقۋ ورنىنا ءتۇسۋدىڭ وڭاي جولى وسى ەكەن دەپ پە؟
ەنگىزىلگەن وسى وزگەرىسكە قاتىستى پاۆلوداردىڭ ستۋدەنتتەرى ءتىپتى اشتىق جاريالاۋعا دەيىن بارىپتى. جالپى, ءدال وسى ماسەلەدەن داۋ-داماي تۋدىرۋدىڭ ەش قيسىنى جوق.
جارىلقاسىن ورالبايۇلى,
كوللەدج تۇلەگى:
مەكتەپ وقۋشىلارى كوللەدجگە تەك ۇبت-دان قۇتىلۋ ماقساتىمەن تۇسەدى ەكەن دەگەن پىكىرمەن كەلىسپەس ەدىم. مەكتەپ بىتىرگەن سوڭ, جيناعان بالىم مەملەكەتتىك گرانت نەگىزىندە وقۋعا تۇسۋىمە جەتپەدى. ال, اقىلى وقۋدى جاعدايىم كوتەرمەيدى. امال جوق, كوللەدجگە تۇسۋگە ءماجبۇر بولدىم. مىنە, قازىر تاڭداعان ماماندىعىم بويىنشا كوللەدج ديپلومىن الدىم. ءوز سالام بويىنشا ءتاپ-ءتاۋىر ءبىلىمىمدى جەتىلدىردىم. جۇمىس تا تاپتىم. ءبارى دە جاقسى. بىراق, ءومىر ءبىر ورىندا تۇرمايدى. قىزمەت تە سولاي. جۇمىس اۋىستىرۋ كەرەك, بۇدان دا جاقسى قىزمەتتە ىستەگىڭ كەلەدى. ول ءۇشىن ارينە قولىڭدا جوعارى وقۋ ورنىنىڭ ديپلومى بولۋ كەرەك. بۇرىن, كوللەدج ءبىتىرىپ كەلگەن جاستارعا جوعارى وقۋ ورنىنا ءتۇسۋ ءۇشىن ءبىرشاما جەڭىلدىكتەر جاسالاتىن. ال, بيىلدان باستاپ كوللەدج بىتىرۋشىلەرىن بۇدان ايىرماقشى. ياعني, كەشەندى تەست تاپسىرۋ كەرەك ەكەن.
وقۋشى كوللەدجدە العان ءبىلىمىنىڭ نەگىزىندە تەست تاپسىرسا, جارايدى دەر ەدىك.
وسىدان ءۇش جىل نەمەسە ودان دا كوپ جىل بۇرىن وقىپ كەتكەن مەكتەپ باعدارلاماسىنداعى قازاق ءتىلى, ماتەماتيكا, تاريح سەكىلدى نەگىزگى پاندەردەن قالاي كەشەندى تەست تاپسىرا الادى؟ قانشا جەردەن ءبىلىمدى دەسەك تە, بۇل كوللەدج تۇلەگى ءۇشىن وڭاي نارسە ەمەس. كوللەدج بىتىرگەن سوڭ, مەكتەپتەگى ءبىلىمىن قايتا تەكسەرەتىن بولسا, كوللەدجدەگى ءبىلىمدى نە ءۇشىن الدى؟ ءبارىنىڭ ناتيجەسىن ۋاقىت كورسەتە جاتار. ءوز باسىم بۇل وزگەرىستى اسا قۇپتاي قويمايمىن.
