«كونگرەسس-حولل» سارايىندا استانا قالاسى اكىمدىگىنىڭ قولداۋىمەن ەلوردانىڭ تۋعان كۇنىنە ارنالعان «باعانالى وردام – باستى وردام» اتتى رەسپۋبليكالىق ايتىس دۇركىرەپ ءوتتى. الامان سايىستىڭ الدىندا استانا قالاسى اكىمىنىڭ ورىنباسارى ەرمەك امانشاەۆ جينالعان قاۋىمدى ەلوردامىزدىڭ ءتول مەرەكەسىمەن قۇتتىقتاپ, ايتىسكەر اقىندارعا ساتتىلىك تىلەدى.
بابادان قالعان باعزى ونەردىڭ دامۋىنا ۇلەس قوسىپ, ايتىستىڭ «اتاسى» اتانعان كورنەكتى اقىن ءجۇرسىن ەرمان ايتۋلى ايتىس تاقىرىبىن ايشىقتاپ, ارايلى استانا تۋرالى جۇرەكجاردى لەبىزىن ءبىلدىرىپ, اقىندارعا اق باتاسىن بەردى.
ەلوردا مەرەكەسى اياسىندا جىل سايىن داستۇرگە اينالعان شاراعا بيىل شاشاسىنا شاڭ تيمەس جۇيرىكتىگىمەن تانىلعان ون ەكى اقىن قاتىستى. ولار ەسىلدىڭ جاعاسىنا قونىس تەپكەن ەلوردانىڭ كەلبەتى مەن جەتىستىگىن ولەڭمەن ورنەكتەپ, كوركەم ءسوزدىڭ كەستەسىن ءتۇزدى. تاۋەلسىزدىكتىڭ دە تۋىن جەلبىرەتىپ, جىرعا قوستى.
بۇگىندە ايتىستاعى ورتا بۋىن وكىلى اتانىپ قالعان تالانتتى اقىن ايبەك قاليەۆتىڭ دە شابىسى بابىندا ەكەن. ال مەيىربەك سۇلتانحان, اسپانبەك شۇعاتاەۆ, ەركەبۇلان قاينازاروۆ سەكىلدى جاس پەرىلەردىڭ قيىننان قيىستىرىپ ايتقان ورنەكتى سوزدەرى جۇرتشىلىقتىڭ دەلەبەسىن قوزدىردى. سارا توقتامىسوۆا دا سارا اپاسىنىڭ ءىزىن جالعاپ, تاماشا ايتىستىڭ ورنەگىن كورسەتتى.
اقىنداردىڭ ونەرىن باعالاپ, سارالاپ وتىرعان قازىلار القاسى دا كىلەڭ مىقتىلاردان قۇرالعان. دارىندى اقىن امانجول التاەۆ باستاعان قازىلار قۇرامىندا قازاقستاننىڭ حالىق اقىنى قونىسباي ءابىل, ايگىلى جىراۋ الماس الماتوۆ, ايتىس تۋرالى عىلىمي ەڭبەك جازىپ, دوكتورلىق ديسسەرتاتسيا قورعاعان عالىم قويلىباي اسانوۆ, بەلگىلى اقىندار داۋلەتكەرەي كاپۇلى مەن سەرىكزات دۇيسەنعازين سەكىلدى ءسوزدىڭ ءدامى مەن ءباسىن بىلەتىن ازاماتتار جينالعان.
سونىمەن باس قالانى جاۋھار جىرعا بولەگەن ايتىس كەش اياقتالعاندىقتان, ءبىز گازەتىمىزدىڭ الداعى سانىندا وعان تەرەڭىرەك توقتالىپ, ونىڭ جۇلدەگەرلەرى تۋرالى كەڭىرەك ءسوز قوزعاماقپىز.
ازامات ەسەنجول
