جاسىراتىنى جوق, كەيدە وسىنداي مادەني باعدارلامالار مەن بايقاۋلاردى «سانى كوپ, ساپاسى جوق» ناۋقاندىق ءىس-شارالاردىڭ ءبىرى عوي دەپ جاقتىرا قويمايسىڭ… بىراق باستىعىڭ ايتقان سوڭ, امال جوق بارۋعا تۋرا كەلەدى. ونىڭ ۇستىنە, بۇل – تىكەلەي وزىمىزگە قاتىستى قالالىق اكتسيا!..
بۇل جولى دا ۇيدەن «نە بولسا دا بارا كورەرمىز» دەگەن ويمەن كوڭىلسىزدەۋ شىقتىم…
ەسىكتەن كىرەر-كىرمەستەن كوكتەم كۇنىندەي جادىراپ قارسى العان مەكتەپ وقۋشىلارىنىڭ جارقىن ءجۇزى, اكتسيا اشىلىمىنا قاتىسىپ, كونتسەرت كورۋگە كەلگەن ارداگەرلەر مەن اتا-انالاردىڭ قۋانىشتى ءۇنى ويىمدى وزگەرتتى.
قازاق «تاس تۇسكەن جەرىنە اۋىر» دەيدى. سوندىقتان ەكى اي بويى جالعاساتىن پاتريوتتىق باعدارلامانىڭ اتاق-ابىرويى عانا ەمەس, بارلىق جاۋاپكەرشىلىگى دە موينىنا جۇكتەلگەن ماحامبەت وتەمىسۇلى اتىنداعى وقۋشىلار سارايىنىڭ ديرەكتورى قۇرالاي بالعابايقىزىن اڭگىمەگە تارتتىق:
«قالالىق ءبىلىم باسقارماسىنىڭ ۇيىمداستىرۋىمەن وتەتىن ۇلى جەڭىستىڭ 70 جىلدىعىنا ارنالعان ءداستۇرلى پاتريوتتىق اكتسيا «كوكتەمنىڭ شۋاقتى كۇندەرى» دەپ اتالادى. بۇگىن باعدارلامانىڭ سالتاناتتى اشىلىمى. اكتسيا ەكى كەزەڭنەن تۇرادى. ءبىرىنشىسى – ىرىكتەۋ كەزەڭى. وعان مەكتەپ, ليتسەي, گيمنازيا جانە قالا كوللەدجدەرىنىڭ شىعارماشىلىق ۇجىمدارى قاتىسادى. ىرىكتەۋ جارىسىنىڭ ناتيجەسى بويىنشا, ەكىنشى, باستى كەزەڭگە 7 قويىلىم جولداما الادى. ەڭ ۇزدىك نومىرلەر 2015 جىلدىڭ 6 مامىرىندا وسى ارادا وتەتىن مەرەكەلىك گالا-كونتسەرتكە قاتىسادى.
سونداي-اق, ساراي فويەسىندە ۇيىرمە تاربيەلەنۋشىلەرى مەن قوناقتاردىڭ سوعىس ارداگەرلەرىنە دەگەن ىستىق تىلەكتەرى جازىلاتىن «مايدان پوشتاسى» جۇمىس ىستەيدى. اكتسيا بارىسىندا «مايدان بريگادالارى» ارنايى بەزەندىرىلگەن شاعىن اۆتوبۋسپەن سوعىس جانە ەڭبەك ارداگەرلەرى تۇراتىن مەكەن-جايلارعا بارىپ, ولارعا «مايدان پوشتاسىنا» تۇسكەن جىلى لەبىزدەر جازىلعان حاتتار مەن سىيلىقتاردى تابىس ەتەدى…»
يگىلىكتى ىسكە ساتتىلىك تىلەپ, سالتاناتتى مەرەكە بەتاشارىنا ارنايى شاقىرىلعان قۇرمەتتى قوناقتاردىڭ ءبىرى, سوعىس ارداگەرى قادان بەكەنوۆ اقساقالمەن تىلدەستىك. قادىرلى قاريا: «بالام-اۋ, نەسىن سۇرايسىڭ؟ كوپتەن كورمەگەن قۇرداستارىمىزبەن كەزدەسىپ, امان-ساۋلىق بىلىسكەنىمىزدىڭ ءوزى ءبىز ءۇشىن مەرەكە ەمەس پە!» دەدى اعىنان جارىلا.
ءيا, قۋانىشتىڭ ۇلكەن-كىشىسى بولمايدى… ءبىر ادامعا شاتتىق سىيلاۋدىڭ ءوزى – قانداي باقىت!..
ارداگەر اڭگىمەسىنەن كەيىن «اتىنا زاتى ساي» ءداستۇرلى بايقاۋدىڭ بۇل جولى دا تابىستى وتەتىنىنە ءبىز دە ءشۇباسىز سەندىك!..
تۇرماعانبەت كەنجەباەۆ
