ەلوردامىزداعى №4 قالالىق ەمحانا كوپ فۋنكتسيونالدى مەكەمەلەردىڭ ءبىرى بولىپ سانالادى. ەڭ باستىسى, بۇل ەمحانا لابوراتوريالىق قىزمەت كورسەتەتىن جاڭا زامانعى تەحنولوگيامەن قامتاماسىز ەتىلگەن. ءىSO 90001-2008 حالىقارالىق ساپا سەرتيفيكاتىن يەلەنگەن مەكەمەنىڭ بازاسىندا بيىلعى ناۋرىز ايىنان باستاپ ۇلى وتان سوعىسى ارداگەرلەرىنە جانە ولارعا تەڭەستىرىلگەندەرگە مەديتسينالىق قىزمەت كورسەتۋ بولىمشەسى جۇمىس ىستەي باستادى.
بۇگىنگى تاڭدا ايتۋلى بولىمشەدە 2830 ادام تىركەلگەن. ولاردىڭ جارتىسىنان استامى 60 جاستان اسقاندار بولسا, وسىندا قارالاتىن 780 ادامنىڭ جاسى 80-نەن اسىپ وتىر. بىلە بىلسەك, ارنايى ساناتتاعى ازاماتتارعا قىزمەت كورسەتۋدىڭ وزىندىك ەرەكشەلىگى بولاتىنى زاڭدىلىق. ويتكەنى, وسى بولىمگە كەلۋشىلەردىڭ ءبىرى قيان-كەسكى سوعىستى باستان كەشكەندەر بولسا, ەندى ءبىرى – چەرنوبىل اپاتى مەن سەمەي پوليگونى رادياتسياسى زاردابىن تارتقاندار, اسكەري قىزمەت بارىسىندا مۇگەدەكتەر بولىپ قالعاندار, دەربەس زەينەتكەرلەر. ال وسىنداي ءومىردىڭ بەينەتىن كورگەن ادامداردىڭ دەنساۋلىعىن قاداعالاۋ, دەر كەزىندە كومەك كورسەتۋ ۇلكەن بىلىكتىلىك پەن مەيىرىمدىلىكتى تالاپ ەتەتىنى ءسوزسىز. وسى ورايدا بولىمدە قىزمەت ەتەتىن دارىگەرلەر مەن مەدبيكەلەردىڭ جۇمىسىنا كوپشىلىكتىڭ كوڭىلى تولاتىنى اڭعارىلادى.
– مەن اۋعانستاندا بولدىم. سونداعى ءبىر سوعىس وپەراتسياسىندا جاراقاتتانعان ەدىم. قازىر ەكىنشى توپتىڭ مۇگەدەگىمىن. وسى ەمحاناداعى ارنايى بولىمگە كەلىپ قارالىپ تۇرامىن. كۇندىزگى ستاتسيوناردا ەم الدىم. قىزمەت كورسەتۋشى پەرسونالعا ءدان ريزامىن. قاشان كەلسەڭ دە قامقورلىقپەن جىلى قارسى الادى, – دەيدى «قىزىل جۇلدىز» وردەنى جانە «زا وتۆاگۋ» مەدالىنىڭ يەگەرى جاسۇلان سادىقوۆ ريزاشىلىق كوڭىلىمەن.
جالپى ايتىپ وتسەك, ايتۋلى ءبولىمشەدە تەراپەۆت, نەۆروپاتولوگ, كارديولوگ, ەندوكرينولوگ, حيرۋرگ, سۋردولوگ, پۋلمونولوگ, رەۆماتولوگ, ۋزي ماماندارى جان-جاقتى قىزمەت كورسەتەدى. ەمدەلۋشىلەر الدىمەن وتە كەڭ بولمەدە جايلى ورىندىقتارمەن, تەلەديدارمەن جابدىقتالعان تىركەۋ كابينەتىنە كەلەدى, ودان ءارى مەدبيكەلەردىڭ جەتەلەۋىمەن ءتيىستى دارىگەردىڭ قاراۋىنا جەتكىزىلەدى. قاجەت جاعدايدا پسيحولوگ پەن الەۋمەتتىك قىزمەتكەرگە دە جىبەرىلەدى. ءارى قاراي كەلۋشىنىڭ اۋرۋحاناعا جاتقىزىلاتىنى نەمەسە وسى ەمحاناداعى كۇندىزگى ستاتسيوناردا ەم الاتىنى انىقتالادى. ال ۇيىندە جاتىپ ەمدەلۋشىلەرگە ءتيىستى ءدارى-دارمەكتەر قاجەتىنشە بەرىلەدى.
– ارداگەرلەر ساناتىنداعى ادامدارعا قىزمەت كورسەتۋ – ءبىز ءۇشىن ۇلكەن جاۋاپكەرشىلىك. شىندىعىن ايتقاندا, سوعىس پەن باسقا دا قيىندىقتاردى باستان كەشكەن وتانداستارىمىزدى ەمدەۋدى ءبىر جاعىنان مارتەبە سانايمىز. بولىمشە اشىلعاننان بەرى مىڭداعان ادامنىڭ دەنساۋلىعىن, سونىمەن قاتار, الەۋمەتتىك جاعدايىن دا ءبىلىپ قالدىق. 259 ادامدى جان-جاقتى تەكسەرۋلەردەن وتكىزىپ, ەمدەۋ مەكەمەلەرىنە جولدادىق. بيىل كۇندىزگى ستاتسيوناردا 53 ادام ەم الدى. ولاردىڭ قاتارىندا 12 ۇلى وتان سوعىسى ارداگەرى بولدى. ءبولىم دارىگەرلەرى جىل باسىنان بەرى 2598 ادامنىڭ ۇيىنە بارىپ سانيتارلىق مەديتسينالىق كومەك كورسەتتىك, – دەيدى بىزبەن اڭگىمەسىندە بولىمشە مەڭگەرۋشىسى نۇرگۇل قاسەنباەۆا.
ارداگەر قاۋىمنىڭ دەنساۋلىعىن قاداعالايتىن بولىمشەنىڭ ەرتەمەن باستالىپ كەشكە دەيىن ءبىر تولاستامايتىن جۇمىسىن ۇزدىكسىز اتقارىپ جۇرگەن تاجىريبەلى دارىگەرلەر نۇرگۇل قاسەنباەۆا, كامشات باتىربەك, شولپان دۇيسەكەەۆا, مەيىرىمدى مەدبيكەلەر ايگەرىم ورمانوۆا, اجار باتمانوۆا جانە وكسانا نازاروۆا كوپشىلىكتىڭ العىسىن ارقالاپ جۇرگەن اق حالاتتى ابزال جاندار دەسە بولادى. تاعى ءبىر قوسارىمىز, بىلىكتى دارىگەر سەرىك شايمەردەنوۆ باسقاراتىن №4 قالالىق ەمحانادا ارداگەر-زەينەتكەر ەمدەلۋشىلەرگە قۇرمەت كورسەتۋدىڭ جاقسى ءداستۇرى قالىپتاسقانىن ايتقىمىز كەلەدى. اتاپ ايتقاندا, جەڭىس كۇنى, قارتتار كۇنى, مۇگەدەكتەر كۇنى, سونىمەن قاتار مەملەكەتتىك مەرەكەلەر مەن ۇلتتىق مەيرامداردا ءوز پاتسيەنتتەرىنە ارنالعان مەرەكەلىك شارالار ۇيىمداستىرىلادى. بۇگىنگى تاڭدا ەمحانا ۇجىمى الداعى جىلى اتالىپ وتىلەتىن ۇلى وتان سوعىسى جەڭىسىنىڭ 70 جىلدىعىنا وراي ازىرلىك جاساۋدا. وسىنداي ىزگىلىك شۋاعىن توگەتىن شارالار ناۋقاستىڭ تانىنە دە, جانىنا دا بىردەي شيپا بەرەتىن جاقسىلىقتىڭ كورسەتكىشى دەپ بىلەمىز.
عالىم قوجابەكوۆ
