بۇرناعى كۇنى استانا قالاسى اكىمىنىڭ ورىنباسارى ايدا بالاەۆا قالالىق ارداگەرلەر كەڭەسىنىڭ مۇشەلەرىمەن كەزدەستى. تاۋەلسىزدىك سارايىندا وتكەن باسقوسۋدا الدىمەن كەڭەس توراعاسى امانگەلدى سىزدىقوۆ ءسوز سويلەپ, ەلوردالىق قاريالاردىڭ حال-احۋالىن اڭگىمەلەدى.
«ارداگەرلەردىڭ قانداي ساۋالى, پروبلەماسى بولسا دا, باسشىلىق تاراپىنان ەسكەرىلىپ, جاۋاپسىز قالمايتىنى ءبىزدى قاتتى قۋانتادى. استانا اكىمدىگى مەن ءماسليحاتى ەگدە بۋىننىڭ ءار سوزىنە ءمان بەرىپ, تۇرعىن جايلارىنا, تۇرمىس-تىرشىلىگىنە ۇنەمى قولعابىس ەتەدى. جاقىندا عانا ەسكى پاتەرلەردە تۇراتىن قارتتاردىڭ باسپانالارى تەگىن جوندەۋدەن ءوتتى. سوڭعى ەكى جىلدان بەرى ارداگەرلەردىڭ دارىگەرلىك قامقورلىققا الىنىپ, ساۋىقتىرۋ ورىندارىنا جىبەرىلىپ تۇرۋى دا كوڭىل-كۇيىمىزدى كوتەردى. وسى سياقتى قانداي ماسەلەمىزدىڭ دە وڭ شەشىمىن تاۋىپ, نازاردان تىس قالمايتىنىنا كەڭەس مۇشەلەرى اركەز العىس ايتادى» دەدى امانگەلدى سىزدىقوۆ.
جيىندا ءسوز العان ايدا عالىمقىزى مۇنداي كەلەلى وتىرىستاردىڭ ءداستۇرگە اينالۋى يگى باستامالارعا سەبەپ بولاتىنىن, كوپتەگەن ءتۇيىندى ماسەلەلەردىڭ شەشىلۋىنە جول اشاتىنىن اڭگىمەلەدى. «كەلەسى جىلى ۇلى جەڭىستىڭ جەتپىس جىلدىعىن, كونستيتۋتسيانىڭ جيىرما جىلدىعىن تويلايمىز. جوعارى دەڭگەيدە اتاپ ءوتۋ ءۇشىن ءبارىمىز كۇش بىرىكتىرىپ, جۇمىلا جۇمىس ىستەۋىمىز كەرەك. سونداي-اق, قازاقستان حالقى اسسامبلەياسىنىڭ جيىرما جىلدىق مەرەيتويىن
«استانا – بەيبىتشىلىك پەن كەلىسىم قالاسى» ۇرانىمەن وتكىزەمىز. بۇل اۋقىمدى شارالاردى جوسپارلاۋدى قازىردىڭ وزىندە باستاپ كەتتىك. ءسىزدەردىڭ قوسار تىلەك, ۇسىنىستارىڭىز بولسا, ورتاعا سالىڭىزدار.
ۇلى جەڭىستىڭ جەتپىس جىلدىعىن تويلاۋعا دايىندىقتى 1 قاڭتاردان باستايمىز. جوسپار, نەگىزىنەن, دايىن. ءبىز وسى شارانىڭ وتۋىنە بەلسەندى اتسالىسساق دەيمىز. ارداگەرلەرىمىز مەملەكەتتىڭ قامقورلىعىن سەزىنگەنى دۇرىس» دەدى قالا اكىمىنىڭ ورىنباسارى.
ايدا بالاەۆا ءسوزىنىڭ بارىسىندا ەلوردامىزدىڭ قارقىندى دامىپ كەلە جاتقانىن دا ايتىپ, اعىمداعى جىلى اتقارىلعان شارۋالاردىڭ لەگىن دە سانامالاي كەتتى. «بيىل جارتىجىلدىقتا 700 000 شارشى مەتر تۇرعىن ءۇي تاپسىرىلدى. الدا ءالى يگەرىلمەگەن اۋقىمدى جەرلەر بار. «ەكسپو-2017» حالىقارالىق كورمەسىنە وراي كوپتەگەن جوبالار ءوز جۇمىسىن باستادى. ەكى-ءۇش جىلدان سوڭ ءبىز بۇدان دا گورى دامىعان جاڭا قالاعا كۋا بولامىز. بۇل, ارينە, ءبىزدىڭ ەلدىڭ الەمدەگى كوكجيەگىن كەڭەيتەدى.
استانادا حالىقتىڭ سانى كوبەيىپ جاتىر. جىلىنا 20 مىڭنان اسا ءسابي دۇنيەگە كەلەدى. بۇل – قۋانارلىق جايت. جاس وتباسىلار كوپ بالالى بولىپ جاتىر. بۇل جاستار اراسىندا ماقتانىشقا, ۇردىسكە اينالدى دەسەك تە بولادى» دەگەن ا.عالىمقىزى وزگە دە جەتىستىكتەردى سارالادى.
وتىرىس سوڭىندا اقساقالدار ۇسىنىس-تىلەكتەرىن ءبىلدىرىپ, قالا اكىمىنىڭ ورىنباسارىنا كوكەيلەرىندەگى ساۋالدارىن قويدى. ايدا بالاەۆا بارلىق سۇراقتارعا جان-جاقتى جاۋاپ بەردى.
اسحات رايقۇل
