استانانىڭ ون بەس جىلدىعىنا وراي اتىراۋ وبلىسى قۇرمانعازى اۋدانىنىڭ ءبىر توپ ارداگەرلەرى باس قالاعا ارنايى كەلدى.
قوعامدا قازىنالى قارتتارعا قۇرمەت كورسەتۋ قاشاندا بار ءۇردىس. كەزىندە اۋداننىڭ كوركەيۋىنە ۇلەس قوسقان زەينەتكەرلەر ەلوردانىڭ بۇگىنگى بەت-بەينەسىمەن تانىسىپ, توي الدىنداعى دايىندىقتىڭ كۋاسى بولدى. اتىراۋ وبلىسىنىڭ اكىمى باقتىقوجا ىزمۇحامەدوۆ قاريالارعا ەلىمىزدىڭ باس قالاسى استانانى ارالاۋعا وسىنداي جاعداي تۋعىزدى.
«استانا –ەلباسىنىڭ ەرلىگى. قالانىڭ بۇگىنگى تىنىس-تىرشىلىگىمەن تانىسۋعا ەلۋ التى مىڭ حالقى بار قۇرمانعازى اۋدانى اكىمدىگىنىڭ ۇسىنىسىمەن جيىرماعا جۋىق اقساقالدى استاناعا الىپ كەلدىك. ماقساتىمىز – ەلوردانى تانىستىرۋ, وركەندەۋ جولىنداعى وزگەرىستەردى كورسەتۋ. وسى شارا بارىسىندا ارداگەرلەردى پارلامەنت سەناتى توراعاسىنىڭ ورىنباسارى قايرات يششانوۆ, ءماجىلىس دەپۋتاتتارى اسحات بەكەنوۆ پەن جالعاس دۇيسەنعاليەۆ قارسى الىپ, سىي-قۇرمەت كورسەتتى. ارداگەرلەر ەلوردانىڭ كورىكتى جەرلەرىن ارالاپ, قالانىڭ باس جوسپارىمەن تانىستى. سونداي-اق, قاريالارىمىزعا ۇلكەن قولداۋ بىلدىرگەن سارسەنباي قۇرمانۇلىنا جانە ارداگەرلەردىڭ باسى-قاسىندا جۇرگەن بولات تەمىروۆ اعامىز بەن جەرلەس كاسىپكەرلەرگە العىسىمىز شەكسىز» دەيدى قۇرمانعازى اۋدانى اكىمىنىڭ ورىنباسارى ءابدىراحمان راحمەتۇلى. يگىلىكتى شارانىڭ ۇيىتقىسى بولا بىلگەن اۋدان باسشىلارىنا ارداگەرلەر العىس ايتىپ, اق باتاسىن بەردى.
گۇلميرا شارحانقىزى
قادىرباي جارمۇحانبەتوۆ:
–ارايلى استانانىڭ ەڭ كورىكتى جەرلەرىن ارالادىق. پارلامەنت ۇيىندە بولدىق. تەلەديداردان كورىپ جۇرگەن بەيبىتشىلىك جانە كەلىسىم سارايىمەن تانىستىق. «حان شاتىر» ورتالىعىندا قىدىردىق. وسى جەردەن اۋىلداستارىمىزعا بازارلىق الدىق. قۋانىشىمىزدا شەك جوق. اركىمنىڭ ءارتۇرلى جاعدايى بار. كەيدە ادامعا دۇنيە جەتىپ جاتسا دا, مارتتىك, جومارتتىق, كەڭ جۇرەكتىلىك, ۋاقىت جەتپەي جاتادى. سوعان قاراماستان ءبىزدى باستاپ الىپ كەلگەن اۋدان باسشىلارىنا ايتار العىسىمىز كوپ. استانا اسقاقتاي بەرسىن دەگىم كەلەدى.
امانكەلدى حيلاۋ:
–استانانىڭ جەتىستىگىنە تىلەكشىمىز. ون بەس جىلدىق مەرەيتويى قارساڭىندا وسىنداي قۇرمەتكە بولەندىك. جالپى, ەلورداعا تۇرلى مەملەكەت باسشىلارى كەلەدى. ەلدىڭ قۋانىشى, ماقتانىشىنا اينالعان قالانى كورىپ, كوڭىلىمىز ابدەن تولدى. ازىرەت سۇلتان مەشىتىندە بولىپ, باس قالامىزدىڭ ودان ءارى وركەندەۋىن, قاناتىن كەڭگە جايۋىن ءبىر اللادان تىلەدىك. بۇگىنگى بيلىك باسىندا جۇرگەن ازاماتتارىمىزعا العىستان باسقا ايتارىمىز جوق.
