15 اقپان – كەڭەس اسكەرىنىڭ اۋعانستاننان شىعارىلعان كۇنى. بۇل كۇن قر ۇكىمەتىنىڭ قاۋلىسىمەن ەلىمىزدەگى مەرەكەلىك جانە اتاۋلى كۇندەر تىزبەسىنە قوسىلعان. وتكەن عاسىردىڭ 1979-1989 جىلدارى ارالىعىندا ءوز اسكەري مىندەتىن اۋعانستاندا وتكەرگەن جاۋىنگەر-نتەرناتسيوناليستەر بۇگىنگى تاڭدا ارداگەرلەر قاتارىنان كورىنەدى.
جاستايىنان وق پەن وتقا شارپىلعان جاۋىنگەرلەر ءۇشىن 15 اقپان – ەسكە الۋ كۇنى. ويتكەنى اۋعانستاندا بولعان الاپات سوعىستا كەڭەس اسكەرىنىڭ 22 مىڭنان اسا ازاماتى مەرت بولدى, ونىڭ ىشىندە مىڭنان اسا قازاقستاندىق جىگىتتەر دە جات جەردە دۇشپان قولىنان قازا تاپتى. مىڭداعان ادام جاراقات سالدارىنان مۇگەدەك بولىپ ورالسا, بىرنەشە ادام ءىز-ءتۇسسىز جوعالىپ كەتتى.
اۋعانستان سوعىسىنا قاتىسقاندار بۇگىنگى تاڭدا ەلىمىزدەگى قوعامدىق-ساياسي, الەۋمەتتىك-رۋحاني ناۋقاندارعا بەلسەندى قاتىسادى. سونىمەن قاتار جاس ۇرپاقتى اسكەري-پاتريوتتىق تاربيەگە باۋلىپ جۇرگەندەر دە وسى جاۋىنگەر-ينتەرناتسيوناليستەر. استانا قالاسى بويىنشا 1500-گە جۋىق «اۋعاندىق» ارداگەرلەردىڭ باسىن قوساتىن «اۋعانستان سوعىسى مۇگەدەكتەرى مەن ارداگەرلەرى وداعى» قوعامدىق بىرلەستىگى جىل بويى بالالار مەن جاستار اراسىندا اسكەري-پاتريوتتىق شارالاردى, سپورت جارىستارىن ۇيىمداستىرادى. سوعىستا قازا تاپقان جاۋىنگەرلەردىڭ وتباسىنا, اتا-اناسىنا قايىرىمدىلىق كومەك كورسەتۋ – ۇيىمنىڭ الدىنداعى ەڭ قاسيەتتى مىندەتتىڭ ءبىرى.
استانا قالاسىنداعى سوعىس ارداگەرلەرىنە ارنالعان ورتالىق كلينيكالىق گوسپيتال وق پەن وتقا شارپىلعان مايدانگەرلەردىڭ دەنساۋلىعىن وڭالتاتىن بىردەن-ءبىر مەكەمە بولىپ وتىر.
ايتۋلى مەكەمەدە مەملەكەتتىك تاپسىرىس اياسىندا ۇلى وتان سوعىسىنىڭ مايدانگەرلەرى مەن تىل ەڭبەككەرلەرى, اۋعانستان سوعىسىنا قاتىسقان جاۋىنگەر-ينتەرناتسيوناليستەر, تاجىك-اۋعان شەكاراسىنداعى, يراكتاعى جانە تاۋلى قاراباقتاعى ۇرىس قيمىلدارىنا قاتىسۋشىلار, سونداي-اق چەرنوبىل اپاتىن جويۋعا قاتىسۋشىلار مەن سەمەي پوليگونىنان زارداپ شەككەندەر ەمدەلەدى. گوسپيتالعا كەلۋشىلەردىڭ ساناتىنا قاراي مۇنداعى دارىگەرلەر مەن مەدبيكەلەردىڭ قىزمەت كورسەتۋىنەن ەرەكشە ءبىر ىزگىلىكتى اڭعارۋعا بولادى. ءوز كەزەگىندە ارداگەر دەگەن ابىرويلى اتاقتى ارقالاعان ازاماتتار دا اق حالاتتى ابزال جانداردىڭ ەڭبەگىنە ءدان ريزاشىلىعىن ءبىلدىرىپ جاتادى.
– ءبىزدىڭ گوسپيتالدا ارداگەرلەر ەمدەلەتىن بولعاندىقتان, ولارعا ءبىز تەك قانا دارىگەرلىك تۇرعىدان قاراپ قانا قويمايمىز. اركىمنىڭ سىرقاتىنا قاراي كوڭىل كۇيىن تابۋعا تىرىسامىز. ويتكەنى سوعىس كورگەن, ءتۇرلى اۋىر تەحنوگەندى اپاتتى باسىنان كەشكەن ادامداردىڭ جان دۇنيەسى دە زارداپ شەگەتىنىن بىلەمىز, تۇسىنەمىز. وسىندا اۋىرىپ كەلىپ, ەم-دومىن العان سوڭ جادىراپ شىعىپ بارا جاتقانىن كورگەندە كادىمگىدەي قۋانىپ قالامىز. بۇل پاتسيەنتتەرگە دەگەن ۇجىمدىق كوزقاراسىمىز دەسەم دە بولادى, – دەيدى تاجىريبەلى دارىگەر-نەۆروپاتولوگ باعدات قۇسپانوۆ.
بۇگىنگى تاڭدا گوسپيتال ءبىر مەزگىلدە 104 ادامدى ەمگە قابىلدايدى. سونداي-اق 10 ادامعا كۇندىزگى ەمدەۋگە كەلۋگە مۇمكىندىك جاسالعان. سوڭعى جىلدارى مەكەمەنىڭ مەديتسينالىق قوندىرعىلارى مەن جابدىقتارى ەداۋىر جاڭارعان. قازىرگى زامانعى ۋدز, لور-كومباين, ەندوسكوپيا جانە باسقا اپپاراتتار ىسكە قوسىلعان. ەمدەۋ شارالارى بويىنشا كارديولوگ, وفتالمولوگ, ەندوكرينولوگ, حيرۋرگ, نەۆروپاتولوگ, گينەكولوگ, ستوماتولوگ, دەرماتولوگ, پسيحياتر, دياگنوستيكا, ەمدەۋ-دەنە شىنىقتىرۋ ماماندارى كەشەندى تۇردە قىزمەت كورسەتەدى.
گوسپيتال ديرەكتورىنىڭ مىندەتىن اتقارۋشى سەرىك شاحمانوۆ ءاربىر دارىگەردىڭ بىلىكتىلىگىن ارتتىرۋدى ۇنەمى نازاردا ۇستايدى. دارىگەرلەردىڭ جۇمىسىن ۇيلەستىرۋدە ەمحانالىق-دياگنوستيكالىق ءبولىم مەڭگەرۋشىسى قارلىعاش وماروۆا, ەمدەۋ بولىمدەرىنىڭ مەڭگەرۋشىلەرى ايگۇل ءجۇنىسوۆا, جانات بايكەنوۆا, ايگۇل قۇسپانوۆا, دارىگەرلەر باعدات قۇسپانوۆ, رۋسلان بەكەنوۆ, بوتاگوز داۋلەتبەكوۆا, دينارا ءجۇنىسوۆا, گۋليا شاكاريموۆا, جانارگۇل كىشكەنە جانە ەدىل جۇلدىز – ءوز ءىسىنىڭ بىلىكتى ماماندارى. كۇنى بويى ناۋقاستاردىڭ ەم-دومىن جاساپ, قاي كەزدە دە ەمدەلۋشىنىڭ جانىنان تابىلاتىن ولگا سەمەنوۆا, ايكۇمىس يبراەۆا, شايزات قاليەۆا, الماگۇل نۇرتاەۆا, جادىراسىن ەسەنعازينا, ارداق توقسانباەۆا جانە باسقالارى دا ارداگەرلەر العىسىنا كەنەلىپ جۇرگەن مەدبيكەلەر.
