ارداگەرلەر ۇيىندە التى جاۋىنگەر تۇرادى
2 مامىردا سارىارقا اۋدانىنىڭ اكىمى ەرمەك وسپانوۆ كوكتال كەنتىندەگى قارتتار ۇيىنە بارىپ, ۇلى وتان سوعىسىنىڭ ارداگەرلەرىن جەڭىستىڭ 68 جىلدىعىمەن قۇتتىقتاپ قايتتى.
– ەلدىك پەن ەرلىكتىڭ ۇلى مەرەكەسى – بارشامىزعا قاستەرلى كۇن. جەڭىس ءۇشىن جانقيارلىقپەن ارپالىسقان انالارىمىز بەن اكەلەرىمىزدىڭ, اعا ۇرپاق وكىلدەرىنىڭ ەرلىگىنە باس يەمىز, – دەپ تىلەگىن ءبىلدىردى ەرمەك سابىربەكۇلى ارنايى جايىلعان مەرەكەلىك داستارحان ۇستىندە. قارتتار ۇيىندە قاندى مايدانعا قاتىسقان التى ارداگەر تۇرادى. ولار – ولەگ لىننيك, اننا پاۆلوۆا, يۆان پيشۋگين, الەكساندر پودوپريگورا, ەكاتەرينا پوپوۆا, ەكاتەرينا تىششەنكو. استانا قالالىق ارداگەرلەر ۇيىمىنىڭ ءتوراعاسى بەكەن ءالىمجانوۆ: «بيىل ارالارىنداعى اقىن اننا پاۆلوۆانىڭ ولەڭ جيناعى شىعارىلعالى جاتىر» دەپ, كوڭىلى جارتىكەش قاريالاردى ءبىر كوتەرىپ تاستادى. جالپى, سارىارقا اۋدانىندا 120 ۇلى وتان سوعىسى ارداگەرى, 2568 تىل ەڭبەككەرى تۇرادى ەكەن. وسى ون شاقتى كۇندە اكىمدىك قىزمەتكەرلەرى بارلىق ارداگەرلەردى قۇتتىقتاپ, حال-احۋالدارىن ءبىلىپ شىعۋدى جوسپارلاپ وتىر.
ەركەجان ساتىمبەك