استانادا ۇلى وتان سوعىسى ارداگەرلەرىنە ارنالعان اتاۋلى تاقتايشالار ورناتىلا باستادى. مايدانگەرلەردىڭ اتى-ءجونى جازىلعان تاقتايشالار سارىارقا اۋدانىنداعى 67 سوعىس ارداگەرىنىڭ ءۇي ىرگەسىنە ىلىنەدى.
جەڭىستىڭ 71 جىلدىعىنا ارنالعان تاعىلىمدى شارانىڭ ۇيىتقىسى بولعان – استانا قالاسىنىڭ ءماسليحاتى مەن قالالىق ارداگەرلەر كەڭەسى.
– بۇل وي ءۇيدىڭ قاسىنان ءوتۋشىلەر مۇندا كىم تۇراتىنىن ءبىلىپ ءجۇرسىن دەگەن نيەتتەن تۋىندادى. ارداگەرلەردىڭ ەرلىگىنە تاعزىم رەتىندە جاسالعان مۇنداي اكتسيالار جاستاردى پاتريوتتىققا تاربيەلەيدى, – دەيدى استانا قالاسى سارىارقا اۋدانىنا قاراستى ارداگەرلەر كەڭەسىنىڭ توراعاسى ەبەنعاپپاس احمەتوۆ.
اتاۋلى تاقتايشانىڭ العاشقىسى ارداگەر فرولوۆ الەكسەي فەدوروۆيچتىڭ ۇيىنە ءىلىندى. قوناقتاردى قۋانا قارسى العان ول يگى باستاماعا رازىلىعىن ءبىلدىرىپ, «جاستارعا وقۋدى تەرەڭ مەڭگەرىپ, جاقسى اسكەري ءبىلىم الۋدى تىلەيمىن, ساعىمىز ەشقاشان سىنباسىن!» دەگەن باتاسىن بەردى.
قالالىق جانە اۋداندىق ارداگەرلەر كەڭەستەرى ۇلى وتان سوعىسى ارداگەرلەرىنە بەلسەندى قولداۋ كورسەتۋدە. الداعى ۋاقىتتا مۇنداي تاقتايشالار استاناداعى بارلىق ارداگەردىڭ ۇيىنە ورناتىلماق.
