استانا قالاسىنداعى الكەي مارعۇلان اتىنداعى № 40 ورتا مەكتەپتە «قازاقتىڭ اقتاڭگەرى, عۇلاماسى» اتتى ادەبي-تاريحي كەش ءوتتى. ءدال وسى كۇنى 2006 جىلى مەكتەبىمىزدە اكادەميكتىڭ مۇراجايى اشىلعان ەدى. الكەي حاقانۇلى مارعۇلان – حالقىمىزدىڭ تاريحىن, مادەني شەجىرەسىن جالىقپاي زەرتتەپ, توم-توم كىتاپتار جاريالاعان عالىم. عىلىمنىڭ تەرەڭىنە سۇڭگىگەن پاراساتتى جاننىڭ قۇرمەتىنە گۇل شوعى قويىلىپ, 11-سىنىپتار ازىرلەگەن شاعىن باعدارلاما ۇسىنىلدى. كەشتە اتاقتى تۇلعالاردىڭ اتامىز تۋرالى ايتقان پىكىرلەرى, بەلگىلى اقىنداردىڭ ولەڭدەرى وقىلدى. «اتانىڭ ءسوزى, كونەنىڭ كوزى» دەمەكشى الكەي مارعۇلاننىڭ ءتىرى كەزىندە جازىلىپ, مۇراعاتتا ساقتالعان جاندى داۋىسى تىڭدالدى.
سونداي-اق, جىل سايىن ءداستۇرلى تۇردە «اكادەميك الكەي مارعۇلان اتىنداعى سىيلىق» تاپسىرىلىپ, «مارعۇلان» جۋرنالى جارىق كورۋدە. قالالىق, رەسپۋبيكالىق دەڭگەيدە الكەي مارعۇلان وقۋلارى وتكىزىلدى. «الكەي الىپپەسى» ادىستەمەلىك كومەكشى قۇرال ازىرلەندى. «اكادەميك الكەي مارعۇلان ىزىمەن» اتتى تۋريستىك-ولكەتانۋ ەكسپەديتسياسى ۇيىمداستىرىلىپ كەلەدى. جاقىندا عانا تاۋەلسىزدىك سارايىندا «الكەي مارعۇلان مۇراسى – ۇرپاققا ۇلاعات» اتتى كورمە وتكىزىلدى.
ىرىستى جالعاسباي,
الكەي مارعۇلان اتىنداعى №40 ورتا مەكتەپتىڭ 11 «ءا» سىنىپ وقۋشىسى
