«استانا-ءونىم» اكتسيونەرلىك قوعامى – «اركىمنىڭ داۋىسى ماڭىزدى!» اتتى «اتامەكەن» ۇلتتىق كاسىپكەرلەر پالاتاسى ۇيىمداستىرعان اكتسيانى العاشقىلاردىڭ ءبىرى بولىپ قولدادى.
«اكتسياعا قاتىسۋ – ارقايسىمىزدىڭ ازاماتتىق مىندەتىمىز. بۇل شارانى قولداۋ ارقىلى ءبىز ەلدىڭ دامۋىنا ءوز ۇلەسىمىزدى قوسامىز. بارلىق وتانداستارىمىزدى, ءوزىمىز سياقتى كاسىپكەرلەردى ەلىمىزدىڭ ومىرىندەگى ەڭ ماڭىزدى شاراعا بەلسەندى قاتىسۋعا شاقىرامىن» دەدى «استانا-ءونىم» كومپانياسىنىڭ باس ديرەكتورى عالىمجان ابدىحالىقوۆ.
1998 جىلى قۇرىلعان «استانا ءونىم» برەندىمەن ءسۇت ونىمدەرىن ءوندىرەتىن اتتاس كومپانيا – قالاداعى بەلدى شارۋاشىلىقتاردىڭ ءبىرى. كاسىپورىن قىمىز, شۇبات, ايران, قۇرت, ماي, ىرىمشىك, قايماق ءتارىزدى اعارعاننىڭ 20-دان استام ءتۇرىن شىعارادى. ونىڭ ونىمدەرىن قالانىڭ 150-دەن استام مەكەمەلەرى پايدالانادى ەكەن. ەندى تۇتىنۋشىلارعا جاقسى تانىس «استانا-ءونىم» ءسۇت تاعامدارى «اركىمنىڭ داۋىسى ماڭىزدى!» دەگەن ستيكەر جاپسىرىلعان كۇيىندە قالا دۇكەندەرىنە تۇسەتىن بولادى. اكتسيانىڭ ماقساتى دا ءوزىمىزدىڭ ءونىم ارقىلى استانالىقتاردى الداعى قازاقستان رەسپۋبليكاسى پرەزيدەنتىن سايلاۋعا قاتىسۋعا ۇندەپ, قوعام الدىنداعى ازاماتتىق پارىزىن اتقارۋعا شاقىرادى.
اكتسيانى قولداۋ شاراسى اياسىندا جۋرناليستەر «استانا-ءونىم» اق عيماراتىنا اپارىپ, ءونىم دايىنداۋ ۇدەرىسى مەن «اركىمنىڭ داۋىسى ماڭىزدى!» ستيكەرى باسىلعان وتاندىق ءونىم تۇرلەرىمەن تانىستى.
ايگۇل ۋايسوۆا
