«ارمانداستارعا» اسىعادى
ەلوردانىڭ دامۋى جونىندە وتكىزىلگەن كەڭەستە ەلباسى جاستاردىڭ بوس ۋاقىتىن ءتيىمدى وتكىزۋدى قولعا الۋ كەرەكتىگىن تاپسىرعان بولاتىن. «بىزگە اۋلا كلۋبتارى قاجەت. سەبەبى, مۇنداي بىرلەستىكتەر جاستاردىڭ ومىردەگى ءوز جولىن ايقىنداۋعا جول اشادى. ءتىپتى, الەمگە بەلگىلى ايپادتاردى شىعارۋشى ستيۆ دجوبس ونەرتاپقىشتىعىن اۋلا كلۋبىندا دوستارىمەن بىرگە باستاعان دەسەدى. سوندىقتان, بىزگە دە مەكتەپتەر مەن كوللەدجدەردە وسىنداي كلۋب اشۋ كەرەك» دەگەن نۇرسۇلتان نازارباەۆ ساباقتان تىس ۋاقىتتا وسىنداي كلۋبتاردىڭ جۇمىسىن جانداندىرۋ ىسىنە ايرىقشا ءمان بەرگەن.
بۇگىنگى تاڭدا ينتەرناتسيونالنىي كەنتىندە بالالار مەن جاسوسپىرىمدەردىڭ «ارمانداستار» كلۋبى جۇمىس ىستەپ جاتىر. وعان 200-دەن اسا بالا بارىپ ءجۇر. كلۋبتىڭ اشىلۋىنا سول جەردىڭ تۇرعىندارى, ولاردىڭ ءىشىندە ارداگەر قوجانتاي بايكەنوۆ باستاماشى بولىپ ەدى.
ول استانا قالالىق ءماسليحاتىنا №25 وكرۋگتەن سايلانعان دەپۋتات توكەن ەگىنباەۆتىڭ قابىلداۋىندا بولىپ, قالانىڭ شەتكەرى تۇرعىن الابىندا بالالارعا نە ەرەسەكتەرگە ارنالعان مادەني وشاقتىڭ جوقتىعىن ايتتى. ال, جالعىز مەكتەپتىڭ وندايعا مۇمكىندىگى شەكتەۋلى, سوندىقتان «ەسكەندىر» تۇرعىن ءۇي كەشەنىندە بوس جاتقان جەرتولەنىڭ بارىن, سونى جوندەپ بەرەتىندەي دەمەۋشى ازامات بولسا دەگەن تىلەگىن جەتكىزدى.
توكەن جىلقىايدارۇلىنىڭ ايتۋىنشا, كەنت تۇرعىندارى اۋلا كلۋبىنا اسا زارۋلىگىن وزدەرىنىڭ بەلسەندىلىگىمەن كورسەتە الدى. ماسەلەن, ازامات كارىموۆ دەگەن سپورتشى جىگىت بالالاردى سپورتقا باۋلۋعا قۇلشىنىپ تۇرعانى قۋانتتى. ساباقتى ينە ساتىمەن دەپ, ءىستىڭ تەز شەشىلۋىنە الماتى اۋدانى ينتەرناتسيونالنىي تۇرعىن الابىنداعى ارداگەرلەردىڭ باستاۋىش ۇيىمىنىڭ ءتورايىمى مايرا الىمحانقىزىنىڭ سول ورتالىقتى ەگدە جاندار مەن بالالارعا ورتاق قىلساق دەگەن ۇسىنىسى قوزعاۋ سالدى.
قالالىق ءماسليحاتتىڭ دەپۋتاتى, «قۇلاگەر» قۇرىلىس كورپوراتسياسىنىڭ باسقارما توراعاسى ءتوكەن ەگىنباەۆ ەكى سوزگە كەلمەي, «ەسكەندىردەگى» 400 شارشى مەتر ايدىك جەرتولەگە كۇردەلى جوندەۋ جاساپ, جارىق, جىلۋىنا دەيىن ءوتكىزىپ بەردى.
اكىمدىك تاراپىنان دا قولداۋ تابىلا كەتىپ, جاستار ساياساتى ماسەلەلەرى باسقارماسىنىڭ ارالاسۋىمەن, نەشە ءتۇرلى جابدىقتار مەن سپورتتىق قۇرالدار الىنىپ جاتىر.
«ءالى تولىقتاي جابدىقتالماعانىنا قاراماستان, بوس سەلتەڭدەپ جۇرگەن بالالار بىردەن قىزىقتى ورتاعا اعىلدى. مۇندا قازاقشا كۇرەستەن باستاپ, بوكس, كاراتە, تاەكۆوندو, دومبىرا, بي ۇيىرمەلەرى جۇمىس ىستەي باستادى. دويبى, شاحمات, توعىزقۇمالاق سياقتى وي ەڭبەگىنە باۋليتىن جاتتىقتىرۋشى دا تابىلا كەتتى. تاعى دا قوسىمشا ۇسىنىستار ءتۇسىپ جاتسا, قول ۇشىن بەرۋدەن تارتىنىپ قالمايمىز» دەيدى توكەن جىلقىايدارۇلى.
ال, ارداگەرلەر باستاۋىش ۇيىمىنىڭ ءتورايىمى مايرا ءالىمحانقىزى:
«ارداگەرلەر بولعان سوڭ, ءبىز تىكەلەي وسى جەردەگى جاستارمەن, مەكتەپپەن تىعىز بايلانىستامىز. ىرگەمىزدەگى №42, 43, 44 مەكتەپتەردە ءجيى-ءجيى كەزدەسۋلەر ءوتىپ تۇرادى. كەشە عانا مەكتەپپەن بىرلەسىپ ءبىر ءىس-شارا وتكىزدىك.
ءبىزدىڭ وسىنداي كەڭ جەرگە كەلىپ, ارقا-جارقا بولىپ جاتقانىمىزدىڭ بارلىعى ءماسليحات دەپۋتاتى توكەن جىلقىايدارۇلىنىڭ ارقاسى. ارداگەرلەر مۇنداي جاقسىلىقتى ۇمىتپايدى. ويتكەنى, بولمەمىز تەگىن. ءىشى جىلى, جارىق, كەڭ. بۇل جەردە ءبىز تۇساۋكەسەر, باتىر انالارمەن باسقوسۋ, سپورتتىق شارالاردى ءۇزبەي وتكىزىپ تۇرامىز دەپ ۇيعاردىق. ايتا كەتەرلىگى, ارداگەرلەرىمىز بەلسەندى. مىسالى, بيىل قالا بويىنشا شاڭعىدان جارىس ءوتتى. جەتپىستىڭ جوتاسىنا شىققان قاريامىز ەكىنشى ورىندى قانجىعاسىنا بايلادى. وسىنىڭ ءوزى كەيىنگى بۋىنعا دەگەن تاربيە, ۇلگى ونەگە» دەيدى.
بۇگىندە ۇيىرمەنىڭ كوپشىلىگى – اقىلى. ال, بالاسىن قالتاسىنان اقشا شىعارىپ, قوسىمشا بىلىممەن قامتاماسىز ەتۋگە كەز كەلگەن اتا-انانىڭ شاماسى جەتە بەرمەيدى. ال, «ارمانداستار» كلۋبىنداعى ۇيىرمەلەر تەگىن, سوندىقتان دا بولار بالالاردىڭ ىقىلاسى اۋىپ, جاڭا ورتاعا تەز ۇيىرسەكتەنىپ كەتتى.