ەلوردا ساحناسىندا رەسەيدىڭ ەڭبەك سىڭىرگەن ءارتىسى الەكساندر يۆانوۆتىڭ جەتەكشىلىگىمەن «ارقان ۇستىندەگى ايۋلار» تسيركتىك قويىلىمى ءوتىپ جاتىر.
استانا تسيركىندە الىس-جاقىن ەلدەردەن كوپتەگەن ونەرپازدار كەلىپ, ەلوردالىقتارعا قويىلىمىن ۇسىنۋدا. بىراق, رەسەيدىڭ وسى تسيركىنىڭ ونەرى وزگەلەردەن ەرەك بولىپ شىقتى. سەبەبى, الەم بويىنشا ارقان ۇستىندە الۋان ءتۇرلى اكروباتتىق ويىن كورسەتەتىن ونەرلى ايۋلار تەك وسى رەسەيلىك توپتا عانا بار. استانالىقتاردىڭ بۇل قويىلىمعا بۇرىن-سوڭدى بولماعان قىزىعۋشىلىقپەن بارۋى سوندىقتان.
29 قازان كۇنى ءبىز دە اتالعان رەسەي مەملەكەتتىك تسيركىنىڭ قويىلىمىن تاماشالادىق. ارتىستەر بوياۋى قانىق, ابدەن كەمەلىنە جەتكەن تسيرك ونەرىنىڭ جارقىن باعدارلاماسىن جۇرتشىلىققا ۇسىندى.
اسىرەسە, «تەڭىزدەگى ويىن» كۇردەلى تريۋكتەرگە تولى بولدى. اسقان ەپتىلىك پەن كۇشتىلىككە نەگىزدەلگەن شاباندوزدىق جانە جونگلەرلىك ونەر كىم-كىمدى دە بەي-جاي قالدىرعان جوق. ءبىرىنىڭ ۇستىنە ءبىرى ءمىنىپ, اكروباتتىق گيمناستيكالار جاساعان ارتىستەرگە كىشكەنتاي كورەرمەندەر ەرەكشە قوشەمەت كورسەتتى. جالپى, بۇل قويىلىم جوعارى دەڭگەيدەگى حالىقارالىق فەستيۆالدەردە بىرنەشە رەت جۇلدەگەر اتانىپتى. دەمەك, «تەڭىزدەگى ويىنعا» الەمدىك كورەرمەندەر باياعىدا-اق لايىقتى باعاسىن بەرىپ قويعان.
قويىلىم ارقىلى استانالىق كورەرمەن يۋري سوسين مەن يرينا سوسينا سىندى رەسەيدىڭ ەڭبەك سىڭىرگەن ارتىستەرىن, حالىقارالىق كونكۋرستاردىڭ لاۋرەاتى, بەلگىلى جونگلەر-ەكۆيليبريستەر اليونا سوسينا, ميحايل يۆانوۆ, گيمناستشىلار ەۆگەنيا نۋيانزينا, ميحايل ەلاگين, اڭدارعا ءتىل ۇيرەتۋدىڭ شەبەرلەرى ولگا, ميحايل ۆولوجانيندەردى, رەسەيدىڭ ەڭبەك سىڭىرگەن ءارتىسى ارسەن باتيەۆ جەتەكشىلىك ەتەتىن «الانيا» ات ءانسامبلىن, جونگلەر-اكروباتتار يرينا, گەورگي جانە يۋري پريلەپولاردى, تانىمال شاباندوز ۆەرا مەششانوۆانى تانىپ ءبىلدى. سايقىمازاق-ارتىستەر انجەليكا مەن
سەرگەي كليۋەۆتەردىڭ دە ادەمى ازىلدەرى كورەرمەنگە كوتەرىڭكى كوڭىل-كۇي سىيلادى.
بارىنەن بۇرىن تسيركتىك قويىلىمنىڭ ءتۇپ قازىعى – ارقان ۇستىمەن ەركىن ءجۇرىپ, نەبىر شالت قيمىل جاساپ, ەلدى كۇلدىرتكەن سۇيكىمدى ايۋلاردىڭ قىلىعى كىشكەنتاي استانالىقتاردىڭ جۇرەگىندە ۇزاق ۋاقىت ساقتالارى ءسوزسىز. «بىزگە استانادا ونەر كورسەتۋ ۇنادى. «ارقان ۇستىندەگى ايۋلار» باعدارلاماسى «رەسەيمەمتسيركى» جەتەكشىلىگىندەگى جاڭا تۇجىرىمدامامەن ءوتىپ جاتىر» دەيدى الەكساندر يۆانوۆ.
ايتپاقشى, قويىلىم 9 قاراشاعا دەيىن جالعاسادى ەكەن.
قىمبات نۇرعالي
