اسەت يسەكەشەۆ «فۋتبول جولى – 2026» باعدارلاماسىمەن تانىستى

استانا اكىمى اسەت يسەكەشەۆ قازاقستان فۋتبول فەدەراتسياسىنىڭ «فۋتبول جولى – 2026» بۇقارالىق سپورتتى دامىتۋ جونىندەگى باعدارلاماسىمەن تانىستى.

استانادا 300-گە جۋىق بالا اۋلادا اپتاسىنا ءبىر­نەشە رەت كاسىپقوي باپكەرلەرمەن تەگىن جاتتىعادى. تۇرعىن ۇيلەردىڭ اۋلا­لارىنداعى 13 فۋتبول الاڭىندا (سونىڭ ىشىندە «لەسوزاۆود», «كوكتال» جانە گەرتسەن كوشەسى سياقتى شالعاي جاتقان شاعىن اۋدانداردا) فۋتبولدان با­لا­لارعا ارنالعان تەگىن جات­تىعۋلار تۇراقتى تۇردە وتكىزىلەدى.
– مەملەكەت باسشىسىنىڭ بۇقارالىق سپورتتى دامىتۋ جونىندەگى تاپسىرماسىمەن 2026 جىلعا دەيىنگى فۋتبولدى دامىتۋ ستراتەگياسى ازىرلەندى. بۇل ستراتەگيانىڭ باعىتتارىنىڭ ءبىرى بالالار مەن جاسوسپىرىمدەر جانە بۇقارالىق سپورتتى دامىتۋ بولىپ تابىلادى. اۋلادا فۋتبول ويناعاندار سپورت مەكتەپتەرىنە بارادى. سپورت مەكتەپتەن, اۋلادان باس-تاپ بارىنە دە قولجەتىمدى بولۋى كەرەك. استانا قالاسىنىڭ اكىمدىگى ءبىزدى قولداپ, باعدارلاما جۇزەگە اسىرىلا باستادى, الداعى ۋاقىتتا قازاقستاننىڭ بارلىق قالالارىنداعى اۋلالار قامتىلادى, – دەيدى قفف پرەزيدەنتى ەرلان قوجاعاپانوۆ.
قفف باپكەرلەردى ىرىكتەپ, ەڭبەكاقى تولەۋ بويىنشا بارلىق شىعىنداردى كوتەرەدى, قاجەتتى مۇلىكپەن قامتاماسىز ەتەدى. جاقىندا عانا پرەمەر-ليگا مەن ءبىرىنشى ليگادا كاسىپقوي كلۋبتاردىڭ ساپىندا ونەر كورسەتىپ جۇرگەن, قازاقستاننىڭ جاسوسپىرىمدەر قۇرامالارىنا تارتىلعان جاس باپكەرلەر ۇل-قىزدارعا فۋتبولدىڭ قىر-سىرىن ۇيرەتەدى. بالالارعا سىيلىق رەتىندە فۋتبولكالار, دوپتار تابىستالادى.
جاقىن ارادا قوسشى, جىبەك جولى جانە قالانىڭ باسقا دا بولىگىندە ورنالاسقان ءۇش فۋتبول الاڭىندا دا فۋتبولدان تەگىن جاتتىعۋلار وتكىزىلەتىن بولادى. قازىرگى كەزدە ءۇش اۋداندا 287 سپورت الاڭى بار, سونىڭ ىشىندە 212-ءسى – فۋتبول الاڭى. استانا قالاسىنىڭ اكىمى بالالار مەن جاسوسپىرىمدەر جانە بۇقارالىق سپورتتى دامىتۋدىڭ ماڭىزدىلىعىن اتاپ ءوتتى.
– بولاشاقتا اتالعان باعدارلامامەن اۋلالاردى بارىنشا قامتۋ قاجەت. قازىرگى كەزدە اۋلا اۋماقتارىن اباتتاندىرۋدىڭ جاڭا باعدارلاماسى ازىرلەنىپ جاتىر, وندا بالالار جانە سپورت الاڭدارى, ترەناجەرلار جانە تاعى باسقا قاراستىرىلعان, – دەيدى قالا باسشىسى اسەت يسەكەشەۆ. ونىڭ ايتۋىنشا, اۋلالىق, وتباسىلىق سپورتتى دامىتۋ ەلوردا اكىمدىگى قىزمەتىنىڭ باسىم باعىتتارىنىڭ ءبىرى بولماق.

تومەندە قالا بويىنشا بەلگىلەنگەن اۋلالارداعى فۋتبولدان تەگىن جاتتىعۋلار كەستەسى.

بۇركىت نۇراسىل