قازاقستان حالقى تىلدەرىنىڭ مەرەكەسىنە وراي قر قارۋلى كۇشتەرى قۇرلىق اسكەرلەرى باس قولباسشىسى باسقارماسىندا «مەملەكەتتىك ءتىل – مەنىڭ ءتىلىم» اتتى ۇلتى وزگە اسكەري قىزمەتشىلەر اراسىندا بايقاۋ ءوتتى. شارا الدىندا باسقارمانىڭ مەملەكەتتىك ءتىلدى دامىتۋ ءبولىمىنىڭ باستىعى ماناربەك يبراھيم ءسوز سويلەدى.
«ءباھادۇر باۋىرجان اتامىز ءتىلى كەدەي ەلدى مادەنيەتسىز, انايى, نادان حالىق دەپ سانايدى. ال قازاق ءتىلى – ءوزىنىڭ دالاسىنداي كەڭ پىشىلگەن جايدارى دا جالپاق ءتىل. قازاق ءسوزى قاشاندا دالانىڭ قوڭىر جەلىندەي اڭقىلداپ ەركىن ەسىپ تۇرادى. قازاق ءتىلىنىڭ بيازى ماقامى – دومبىرانىڭ كۇمبىر قاققان سازىنداي. قازاق ءتىلى – دامىعان, جەتىلگەن, باي ءتىل. بۇل ءسوزىمىزدى شىعىستانۋشى ۆ.رادلوۆتىڭ: «قازاقتاردىڭ ءتىلى جاتىق تا شەشەن ءارى وتكىر, كوبىنە ءىلىپ-قاعىپ, تاڭعالارلىقتاي ورالىمدى سويلەيدى» دەگەنى راستايدى. ۇلى اباي دا: «وتكىردىڭ ءجۇزى, كەستەنىڭ ءبىزى, ورنەگىن سەندەي سالا الماس» دەپ بەكەر ايتپاعان. سول سەبەپتى, انا ءتىلىمىزدىڭ قادىر-قاسيەتىن باعالاپ, ۇرپاقتان-ۇرپاققا قايماعى تازا كۇيىندە جەتكىزۋ – بارشامىزعا پارىز» دەدى پودپولكوۆنيك م.يبراھيم.
ەلىمىزدىڭ ءار وڭىرىندە وتكەن كونكۋرستاردىڭ جەڭىمپازدارىنان جاساقتالعان سەگىز ۇمىتكەر سايىستا ءتور اتالىم بويىنشا سىنعا ءتۇستى. قاتىسۋشىلار العاشقى كەزەڭدە ءوزىن ءان ماقامىمەن, ولەڭمەن تانىستىرسا, كەلەسى باسەكەدە بەلگىلى اقىن-جازۋشىلاردىڭ شىعارمالارىن مانەرلەپ وقىدى. ءۇشىنشى سىندا ءسوز جانە ءسوز تىركەستەرىن ورىس تىلىنەن مەملەكەتتىك تىلگە, مەملەكەتتىك تىلدەن ورىس تىلىنە اۋداردى. سوڭعى اتالىمدا اسكەري سالاعا قاتىستى سۇراقتارعا جاۋاپ بەرىپ, بىلىكتىلىكتەرىن ورتاعا سالدى.
بايقاۋدىڭ ناتيجەسىندە ەلوردالىق ءتىل جاناشىرلارىنان قۇرالعان ادىلقازىلار القاسى كەڭەسە كەلە, باس جۇلدەنى №58012 اسكەري ءبولىمىنىڭ قىزمەتكەرى, لەيتەنانت اينا لاۆرەنتەۆانىڭ قانجىعاسىنا بايلادى. «مەنىڭ بار بولمىسىم قازاققا تارتىپ كەتكەن سىڭايلى. ويتكەنى, ءۇي ىشىندە قازاق تىلىندە سويلەسەمىز, قازاق ۇلتىنىڭ كەيبىر سالت-داستۇرلەرىن ۇستانامىز. ەلباسى «قازاقستاندىقتاردىڭ ءبىر عانا وتانى بار, ول – قازاقستان» دەدى عوي. راسىندا, مەنىڭ وتانىم – تەك قازاق ەلى. بۇل جەڭىسىم – وسىنىڭ ايعاعى» دەدى ا.ۆاديمقىزى.
ەكىنشى ورىن №10228 اسكەري ءبولىمىنىڭ قاتارداعى جاۋىنگەرى ۆاديم كوروتىشقا بۇيىردى. «باتىس» وڭىرلىك قولباسشىلىعى اسكەرلەرىنىڭ كىشى سەرجانتى دميتري كوشەلەتس ءۇشىنشى ورىندى يەلەنسە, «وڭتۇستىك» وڭىرلىك قولباسشىلىعى اسكەرلەرىنىڭ سەرجانتى ليۋبوۆ تەكتىباەۆا ىنتالاندىرۋ سىيلىعىن مىسە تۇتتى.
جەڭىمپازدارعا ۇيىمداستىرۋشىلار تاراپىنان ديپلومدار مەن سىي-سياپاتتار تابىس ەتىلدى.
اسان ىستى
