ەلىمىزدىڭ تاۋەلسىزدىك كۇنى قارساڭىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ەلدىڭ الەۋمەتتىك-ەكونوميكالىق جانە مادەني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى جانە بەلسەندى قوعامدىق قىزمەتى ءۇشىن ازاماتتاردى مەملەكەتتىك ناگرادالارمەن ماراپاتتاۋ تۋرالى جارلىققا قول قويدى.
كەشە استانا اكىمى ادىلبەك جاقسىبەكوۆ ەلوردانىڭ دامۋىنا زور ۇلەس قوسقان تۇلعالارعا مەملەكەتتىك ناگرادالار تابىستادى.
– سىزدەر ءتۇرلى سالالاردا قىزمەت ەتەسىزدەر. سىزدەردىڭ قىزمەتتەرىڭىز ارقاشان دا مەملەكەت پەن قوعامنىڭ يگىلىگىنە باعىتتالدى. مەملەكەتتىڭ نەگىزى سىزدەر سياقتى ادامداردىڭ ارقاسىندا قالانادى. ارقاشان دا وسىلاي بولعان, بولادى. ەلىمىز بەن حالقىمىزعا ودان ءارى قۇرمەتپەن قىزمەت ەتەتىندەرىڭىزگە سەنىمدىمىن, – دەپ جۇرەكجاردى لەبىزىن ارناعان قالا باسشىسى باسقارما باسشىلارىنا, ءبىلىم جانە دەنساۋلىق ساقتاۋ سالالارىنىڭ كورنەكتى قايراتكەرلەرىنە ناگرادالاردى ءوز قولىمەن تاپسىردى. جالپى سانى 50 ادام مەملەكەتتىك سىيلىق يەگەرى اتاندى.
