استانا اكىمى كوممۋنالدىق قىزمەتتەردىڭ جۇمىسىن باقىلاۋدى كۇشەيتتى
كەشە استانا قالاسى اكىمى ادىلبەك جاقسىبەكوۆتىڭ توراعالىعىمەن كەزەكتى اپپارات جينالىسى بولدى.
ەلوردا باسشىسىنىڭ تۇرعىنداردان كەلىپ تۇسكەن ءوتىنىش-تىلەكتەردى جەكە باقىلاۋىنا العاندىعى تۋرالى وسىعان دەيىن حابارلانعان بولاتىن. ءوتىنىش-تىلەكتەردىڭ باسىم بولىگى قالا اۋماعىنداعى اشىق جاتقان قۇدىقتار مەن جول قوزعالىسى بولىكتەرىنىڭ ساپاسىنا قاتىستى. قالا باسشىسى بۇل جاعدايدى تەز ارادا قالىپقا كەلتىرۋدى تاپسىرعانىمەن, ءتيىستى شارالار اتقارىلماعان. وسىعان بايلانىستى بۇگىن قالا اكىمى الماتى جانە سارىارقا اۋداندارىنىڭ اكىمدەرىنە, سونىمەن قاتار قالانىڭ كوممۋنالدىق شارۋاشىلىق باسقارماسىنىڭ باسشىسىنا ەسكەرتۋ جاسادى.
ءا.جاقسىبەكوۆ قالانى ازىق-تۇلىكپەن قامتاماسىز ەتۋ ماسەلەسىنە باسا نازار اۋدارىپ, ازىق-تۇلىك باعاسىنىڭ وسۋىنە جول بەرمەۋ جونىندە كەشەندى ءىس-شارالار جوسپارىن ازىرلەۋدى جانە قالانىڭ ازىق-تۇلىك ينفراقۇرىلىمىن سالۋدى تاپسىردى.
اۋدان اكىمدەرىنىڭ كوممۋنالدىق قىزمەتتەردىڭ دايىندىعى تۋرالى باياندامالارىن تىڭداپ, قىس كەزىندە كاسىپورىنداردىڭ جۇمىس ىستەۋ كەستەسىنىڭ ساقتالۋىنا باقىلاۋدى كۇشەيتۋدى, سونىمەن قاتار, قالا اۋماعىندا قار جيناۋدى ۋاقتىلى قامتاماسىز ەتۋدى تاپسىردى.
قالا باسشىسى بارلىق قالالىق قىزمەتتەردەن سەنىپ تاپسىرىلعان نىسانداردىڭ تەحنيكالىق جاعدايىنا جانە قىستا جۇمىس ىستەۋ كەستەلەرىن ساقتاۋىنا باقىلاۋدى كۇشەيتۋدى, قاردى جيناپ, ۋاقتىلى شىعارۋ بويىنشا مەحانيكالاندىرىلعان بريگادالاردىڭ تەحنولوگيالىق تاسىمدەرى مەن جۇمىس كەستەلەرىن وڭتايلاندىرۋدى تالاپ ەتتى.
– بۇگىن قارالعان ماسەلەلەر وتە ماڭىزدى ءارى باقىلاۋ جاساپ, جەدەل شەشىم قابىلداۋدى قاجەت ەتەدى. قالالىق شارالار مەن كاسىپورىندار باسشىلارىنىڭ بارلىعى مەنىڭ تاپسىرمالارىمدى ساپالى جانە ۋاقتىلى ورىنداماعاندارى ءۇشىن جەكە جاۋاپ بەرەتىن بولادى, – دەپ اتاپ ءوتتى ءا.جاقسىبەكوۆ.
قالا باسشىسى ەلباسىنىڭ «نۇرلى جول – بولاشاققا باستار جول» اتتى قازاقستان حالقىنا جولداۋىندا بەلگىلەنگەن مىندەتتەردى جۇزەگە اسىرۋعا ەرەكشە نازار اۋداردى. وندا استاناعا ينفراقۇرىلىمدى جاقسارتىپ, قالانىڭ يندۋستريالىق الەۋەتىن دامىتۋ جونىندەگى اۋقىمدى ءمىندەتتەر قويىلدى.
