كەشە «استانا وپەرا» تەاترىنىڭ كامەرالىق زالىندا «استانا-ارقاۋ» ءداستۇرلى تۇركى مۋزىكاسى فەستيۆالى اشىلدى. ەلوردادا توعىزىنشى مارتە شىمىلدىعىن تۇرگەن فەستيۆالگە ەلىمىزدىڭ ءار وڭىرىنەن جانە رەسەي, يران, تۇركيا, ازەربايجان, قىرعىزستان, وزبەكستان, تۇركىمەنستان, قاراقالپاقستان سىندى مەملەكەتتەردەن كەلگەن ونەرپازدار قاتىسۋدا. العاشقى كۇنگى كونتسەرتتىك باعدارلاما «تابالدىرىق» اتاۋىمەن ءوتتى. بۇگىن فەستيۆال «ءتور» اتىمەن جالعاسادى. ال ەرتەڭ «حان شاتىر» ساۋدا-ويىن-ساۋىق ورتالىعىنىڭ الاڭىنداعى «مىڭجىلدىقتار توعىسىنداعى استانا» كوشپەندىلەر وركەنيەتى فەستيۆالى اياسىندا «شاڭىراق» اتاۋىمەن تۇيىندەلەدى.
«استانا-ارقاۋ» فەستيۆالىن حالقىمىزدىڭ باسىنان وتكەن قاسىرەت سىرىن شەرتەتىن «ەل ايىرىلعان» كۇيىمەن «سازگەن سازى» ەتنو-فولكلورلىق ءانسامبلى اشىپ بەردى. بۇدان سوڭ يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مودجتابا داميرچيلۋ ءسوز الىپ, اتالعان فەستيۆالدىڭ تۇركى الەمى رۋحانياتىندا الاتىن ۇلكەن ورنىنا توقتالدى. اتالمىش مۋزىكا مەرەكەسىنە يران ەلىنەن ۇلتتىق مادەنيەتى جويىلۋدىڭ الدىندا تۇرعان قاشقايلار تايپاسى قاتىسىپ وتىرعانىن ايتا كەتەيىك. وسى تايپا وكىلدەرى سامسام شاموحاممادي جانە موحامماد دجاۆيديپۋر تار, كامانچە جانە بارابان اسپاپتارىندا «دجەيران» حالىق اۋەنىن ورىنداپ بەردى.
العاشقى كۇنگى فەستيۆال باعدارلاماسىنا قاتىسقان تاعى بىرنەشە شەتەلدىك قوناقتى اتاپ وتسەك, قىرىم تاتارى دجەميل كاريكوۆ باعلاما اسپابىندا «اعلاما سارى كەلىن» حالىق ءانىن ايتتى. ساحالىق رۋسلان گابىشەۆ قىل-قىرىمپا اسپابىمەن «سارسىن سارسىن سارسىادىردا» اتتى ءوز ۇلتىنىڭ انىنە سالدى. سونداي-اق, گاگاۋىز يگور پودگورەيانۋ, التايلىق سارىماي ۇرچيماەۆ, تۇرىك ءبۇردجۋ كاراداع ونەر كورسەتتى.
بارشا تۇركى جۇرتىنا ورتاق «الپامىس» جانە «كوروعلى» داستاندارىن سايكەسىنشە وزبەك ءابدىنازار پويانوۆ پەن تۇركىمەن كەرۆەن ەۆباساروۆ ەسكە ءتۇسىردى. قىرعىز دوولاتبەك سىدىقوۆ «ماناس» ەپوسىنان ءۇزىندى ورىنداپ جينالعانداردىڭ دەلەبەسىن قوزدىردى.
قازاق ونەرپازدارىنا كەلسەك, ەلىمىزدەگى جالعىز كاسىبي سىبىزعىشى تالعات مۇقىش قابەكەيدىڭ «سارىالا قاز» كۇيىن سىزىلتتى. شاشۋباي, اسەتتەردىڭ جۇرناعى قاراعاندىلىق داۋرەنبەك اركەنوۆ ماناربەك ەرجانوۆتىڭ «باقىت جىرى» ءانىن قۇيقىلجىتتى. سايان اقمولدا قىلقوبىزدا ىقىلاستىڭ «شىڭىراۋ» كۇيىن بوزداتتى. ۇلجان بايبوسىنوۆا وڭعار جىراۋدىڭ «باستاۋ» جىرىمەن سۋسىنداتتى. كەشتىڭ اياعىنا قاراي ساۋلە جانپەيىسوۆا «ماحامبەتتىڭ تەرمەسىنە» سالىپ, اقىن رۋحىن اتويلاتتى.
«تۇندە ۇيىقتامادىم, كۇندىز وتىرمادىم. قىزىل قانىمدى جۇگىرتتىم, قارا تەرىمدى توكتىم, ءبۇتىن تۇرىك جۇرتى ءۇشىن». العاشقى كۇننىڭ فينالىندا «سازگەن سازى» ءانسامبلى مەن «ارلان» تەاترى ارتىستەرىنىڭ جانە بارلىق ونەرپازداردىڭ قاتىسۋىمەن وتكەن ساحنالىق قويىلىم جوعارىدا كەلتىرىلگەن كۇلتەگىن جازبالارىنىڭ وسى جولدارىن جاڭعىرتتى.
فەستيۆالدىڭ ەكىنشى كۇنىنىڭ باعدارلاماسى بۇگىن ساعات 19.00-دە «استانا وپەرا» تەاترىنىڭ كامەرالىق زالىندا جالعاسادى. وعان شەتەلدىك ونەرپازدارمەن قاتار ءبىلال ىسقاقوۆ, تولعانباي سەمباەۆ, نۇرىم اسقانوۆ سىندى مۋزىكا مايتالماندارى, ت.ب. قاتىسادى.
امانعالي قالجانوۆ
