وتكەن جەكسەنبى كۇنى ەلىمىزدىڭ بيىلعى فۋتبول ماۋسىمى مارەسىنە جەتتى. سوڭعى ويىندى «استانا ارەنا» ستاديونىندا تاماشالادىق. ءداستۇر بويىنشا قازاقستان كۋبوگىنىڭ جەڭىمپازى انىقتالدى. جاسىل الاڭدا «استانا» مەن «ەرتىس» كۇش سىناستى.
بۇل ويىن, شىنى كەرەك, «استانا» ءۇشىن وتە ماڭىزدى بولاتىنى الدىن الا بەلگىلىتىن. ءويتكەنى, ۇلتتىق ءبىرىنشىلىكتە ءجۇلدەسىز قالعان ەلوردالىق كوماندا الداعى جىلى ۋەفا-نىڭ ەۋروپا ليگاسى تۋرنيرىنە قاتىسۋى تەك قازاقستان كۋبوگىن جەڭىپ العان جاعدايدا عانا ءمۇمكىن بولار ەدى. ال بيىلعى چەمپيوناتتا كۇمىس ءجۇلدەگەر اتانعان «ەرتىس» ءۇشىن ەۋروپالىق ءتۋرنيردىڭ ماسەلەسى شەشىلىپ قويدى دەگەنمەن, پاۆلودارلىق كوماندانىڭ ەل كۋبوگىن ۇستاماعالى ون جىلداي بولىپ قالعان ەكەن. سوندىقتان دا تالعات بايسۋفينوۆتىڭ شاكىرتتەرى ءۇشىن دە كۋبوكتى جەڭىپ الۋ كۇن تارتىبىندە تۇرعانى ءسوزسىز ەدى.
وسىلايشا, ەكى جاقتىڭ دا جەڭىسكە دەگەن جىگەرى قاتار ءتۇسكەن تارتىستى ويىن شىنىمەن دە قىزىقتى ءوتتى. ەلوردالىق كوماندانىڭ ءارى قازاقستان ۇلتتىق قۇراماسىنىڭ باس باپكەرى ميروسلاۆ بەرانەك ءوز فۋتبولشىلارىن ءدال وسى ماتچقا ابدەن ازىرلەگەنى ءبىردەن بايقالدى. ولاي دەيتىنىمىز, ويىننىڭ بەسىنشى مينۋتىندا الاڭ يەلەرى ەسەپ اشىپ ۇلگەردى. لەگيونەر فوكسي كەتەوۆامونىڭ «ەرتىس» قاقپاسىنا قاراي باعىشتاعان ايىپدوبىن كوماندا كاپيتانى قايرات ءنۇرداۋلەتوۆ باسپەن ۇرىپ, كوتليار قورعاعان قاقپاعا تۋلاتىپ ءتۇسىردى. ودان ءارى دە استانالىقتار ويىن قارقىنىن ءباسەڭدەتكەن جوق. «ەرتىس» تە قاراپ قالمادى. بىرنەشە رەت ەريچ قاقپاسىنا قاۋىپ توندىرە ءبىلدى. الايدا, استانالىقتاردىڭ جەڭىسكە دەگەن قۇشتارلىعىندا شەك بولماعانداي. سونىڭ ءناتيجەسىندە ويىننىڭ 85-ءشى مينۋتىندا تاڭات نوسەرباەۆ تاعى ءبىر تاماشا گول سوقتى. ەسەپ 2:0! بۇل جولى دا كامەرۋندىق كەتەوۆامو ادەمى پاس شىعارىپ بەرگەنىن ايتۋعا ءتيىسپىز. ال پاۆلودارلىقتار قانشا تىرىسقانىمەن ەسەپتى وزگەرتۋگە شامالارى جەتپەدى. ءسويتىپ, «استانا» قازاقستان كۋبوگىنىڭ يەگەرى اتاندى.
قازاقستان كۋبوگى ەلوردالىق كوماندا ءۇشىن جاڭا تاريحي كەزەڭ اشتى. الداعى جىلى «استانا» ەۋروپا ليگاسىندا ونەر كورسەتەتىن بولادى.
استانالىقتارمەن قاتار 2013 جىلى ەۋروپا ليگاسى تۋرنيرىندە بيىل پرەمەر-ليگا چەمپيوناتىندا كۇمىس جۇلدەگەر اتانعان «ەرتىس» پەن قولا مەدال يەگەرى «اقتوبە» سىنعا ءتۇسەتىن بولادى. ال قاتارىنان ەكىنشى رەت ەل چەمپيونى اتانعان قاراعاندىنىڭ «شاحتەر» كومانداسى تاعى ءبىر مارتە ۋەفا-نىڭ چەمپيوندار ليگاسىندا ونەر كورسەتەدى. مۇنداي مارتەبەلى جارىسقا ءبىرىنشى رەت قاتىساتىن استانالىق كومانداعا ءساتتىلىك تىلەيمىز.
بيىلعى چەمپيوناتتىڭ قورىتىندىسىندا پرەمەر-ليگادان «وقجەتپەس» ءجانە «سۇڭقار» شىعىپ قالسا, ءبىرىنشى ليگادا توپ جارعان الماتى وبلىسىنىڭ «ىلە-ءساۋلەت» جانە ءوسكەمەننىڭ «ۆوستوك» كوماندالارى كۇشتىلەردىڭ قاتارىنا قوسىلادى.
2014 جىلى وتەتىن الەم چەمپيوناتىنىڭ ىرىكتەۋ تۋرنيرىنە قاتىسىپ جاتقان قازاقستان قۇراماسىنىڭ گەرمانيا قۇراماسىمەن وتكىزەتىن كەزەكتى ويىنى الداعى جىلدىڭ 22 ناۋرىز كۇنى بۇرىن حابارلانعانداي الماتى قالاسىندا ەمەس, ەلوردامىزداعى «استانا ارەنا» ستاديونىندا وتەتىن بولادى.
عالىم قوجابەكوۆ
