استانا كاسىپكەرلەرى العىرلىق تانىتتى
قازاقستان رەسپۋبليكاسىنىڭ ۇلتتىق قورىنان وڭدەۋشى ونەركاسىپ سالاسىنداعى شاعىن جانە ورتا بيزنەستى قولداۋعا بولىنگەن 100 ملرد تەڭگە تولىق يگەرىلدى. جالپى العاندا, ۇلتتىق قوردان بولىنگەن قارجىنىڭ 20 پايىزى استانا جانە الماتى قالالارى كاسىپكەرلەرىنىڭ يگىلىگىنە بەرىلسە, 80 پايىزى وزگە وڭىرلەرگە تيەسىلى. سونىڭ ىشىندە استانا كوشباسشى ورىنعا شىقتى. كەشە ورتالىق كوممۋنيكاتسيالار قىزمەتىنىڭ بريفينگىنە قاتىسقان «بايتەرەك» ۇلتتىق باسقارۋشى حولدينگىنىڭ باسقارما توراعاسى قۋاندىق بيشىمباەۆ وسىلاي مالىمدەدى.
قۋاندىق ءۋاليحانۇلىنىڭ ايتۋىنشا, اتالعان قاراجاتقا 437 جوبا قارجىلاندىرىلىپ, 23 جاڭا كاسىپورىن اشىلدى. 144 زاەمشى 27 ملرد تەڭگە سوماسىنا قايتا قارجىلاندىرىلۋعا مۇمكىندىك الدى. كاسىپورىنداردا سونىڭ ەسەبىنەن جاڭا جۇمىس ورىندارى اشىلىپ, جۇمىسشىلار سانى
4,5 مىڭعا جەتتى.
– اتالعان قاراجاتتى ءبىز جارتى جىل ىشىندە يگەرۋىمىز قاجەت بولاتىن. بۇگىنگى تاڭدا ءبىز مەملەكەت باسشىسىنىڭ تاپسىرماسى تولىققاندى ورىندالدى دەپ ايتا الامىز: اقشا يگەرىلدى, شاعىن جانە ورتا بيزنەس ەكىنشى دەڭگەيلى بانكتەردەن بۇرىن العان نەسيەلەردى جەڭىلدەتىلگەن تۇردە قايتا قارجىلاندىرۋعا مۇمكىندىك الىپ, جۇمىستارىن جالعاستىرا الدى. جاڭا كاسىپورىندار قۇرىلىپ, سايكەسىنشە جاڭا جۇمىس ورىندارى اشىلدى. باعدارلاما, شىنىندا دا, تابىستى بولىپ, قازاقستاندىق كاسىپكەرلەرگە اسا قاجەت ەكەنىن كورسەتتى, – دەدى قۋاندىق بيشىمباەۆ.
سپيكەرگە سەنسەك, ۇلتتىق قور قاراجاتىنان بەرىلەر سومانىڭ تورتتەن ءبىر بولىگى, ياعني 25 ملرد تەڭگە تاماق ونەركاسىبىمەن اينالىساتىن كاسىپورىندارعا بەرىلدى. ءسويتىپ, تاماق ونەركاسىبى – قارجىنى مول العان سالاعا اينالدى. ەكىنشى ورىنعا قۇرىلىس سالاسى شىقتى. وسى سالا كاسىپكەرلەرىنە 23 ملرد تەڭگە ءبولىندى.
ۇلتتىق قوردان قارجىلاندىرىلعان باسقا جوبالار اراسىندا مەتاللۋرگيا مەن ماشينا جاساۋ, سونداي-اق, حيميا, اعاش وڭدەۋ جانە توقىما ونەركاسىبى, جيھاز ءوندىرۋ سالالارى بار.
سونداي-اق, ءباسپاسوز بريفينگىندە ايماقتار بەلسەندىلىگىنە قاتىستى اقپار بەرىلەدى. مىسالى, استانا كاسىپكەرلەرى 17 ملرد تەڭگەگە قول جەتكىزدى. ال, قىزىلوردا وبلىسى بەلسەندىلىگى ەڭ تومەن وڭىرلەردىڭ ءبىرىنە اينالدى. سىر بويىنىڭ كاسىپكەرلەرى 430 ملن تەڭگەدەن استام قارجىعا عانا ۇسىنىس بەرگەن. مۇنداي مالىمەتتى «دامۋ» كاسىپكەرلىكتى قولداۋ قورىنىڭ باسقارما ءتورايىمى ءلاززات يبراگيموۆا كەلتىردى.
اتالعان باعدارلاما شارتتارىن ايتا كەتەيىك, ۇلتتىق قور قولداۋ كورسەتكەن كاسىپكەرلەر 10 جىلعا دەيىن 6 پايىزدىق مولشەرمەن جە-ءڭىلدەتىلگەن نەسيە الا الادى. شارت بويىنشا كاسىپورىن جۇمىسشىلارى 250 ادامنان اسپاۋى ءتيىس. زايمنىڭ ەڭ ۇلكەن مولشەرى 1 850 ملن تەڭگەنى قۇرايدى. سونىمەن قاتار, باعدارلاما قايتا قارجىلاندىرۋ باعىتى بويىنشا دا جۇزەگە اسادى.
امانعالي شميتۇلى