«استانا كەشتەرىندە» ءان قالىقتايدى
قالا كۇنى قارساڭىندا وتەتىن حالىقارالىق شارالاردىڭ ءبىرى – «استانا كەشتەرى» ونەر فەستيۆالى. تالاي ءدۇلدۇل باعىن سىنايتىن دودا بيىل ءۇشىنشى رەت شىمىلدىعىن تۇرمەك.
بيىلعى شارا 20-22 ماۋسىمدا بەلگىلى ساياساتكەر داريعا نازارباەۆانىڭ قامقورلىعىمەن جانە باستاماسىمەن قولعا الىنادى. «استانا كەشتەرى» ونەر فەستيۆالى اياسىندا ۇيىمداستىرىلاتىن ءۇش كونتسەرتتە قازاقستاننىڭ, رەسەيدىڭ, ازەربايجان مەن يتاليانىڭ بەلگىلى انشىلەرى ونەر كورسەتەدى. «Life» فورماتىنداعى كونتسەرتتەردە لاريسا دولينا, ولەگ پوگۋدين جانە نينو لەجاۆا سىندى ساحنا جۇلدىزدارىن كورەتىن بولامىز.
«استانا كەشتەرى» – قايىرىمدىلىق شارا, بيلەتتەر تەگىن تاراتىلادى. ۇيىمداستىرۋشىلاردىڭ ايتۋىنشا, فەستيۆال تۇرعىنداردىڭ ءتۇرلى الەۋمەتتىك توپتارىنىڭ الەمدىك مۋزىكا جاۋھارلارىمەن سۋسىنداۋىنا باعىتتالعان.
وسىعان دەيىنگى وتكەن ەكى فەستيۆال ءساتتى ۇيىمداستىرىلدى. ونىڭ ءبىرىن ەلباسى نۇرسۇلتان نازارباەۆ تاماشالاعانى ەسىمىزدە. قازىرگى جوبا بۇرىنعىدان دا اۋقىمدى دا ايشىقتى بولماقشى.
اسحات رايقۇل