استانا كۇنى قايىرىمدىلىقپەن جالعاسادى
بۇگىنگى جەدەلسوز ايدارىنا استانا قالاسى مادەنيەت باسقارماسىنىڭ باسشىسى بولات ماجاعۇلوۆتىڭ ورتالىق كوممۋنيكاتسيالار قىزمەتىندە ەلوردا تويىنا قاتىستى تىلشىلەرگە بەرگەن جاۋابىن ۇسىنىپ وتىرمىز.
– استانا كۇنىنە وراي ۇيىمداستىرىلعان ءىس-شارالارعا قانشا اقشا ءبولىندى جانە بيلەتتەردەن تۇسكەن قارجى قايدا جۇمسالادى؟
– بيىلعى مەرەكەگە 700 ملن تەڭگە بولىنگەنىن ايتقىم كەلەدى. ال ساتىلىمداعى بيلەتتەردىڭ اقشاسى, ەڭ الدىمەن, كونتسەرتتىك باعدارلامالارعا جۇمسالعان شىعىننىڭ ورنىن جابۋعا كەتەدى. ونىڭ ىشىنە تەحنيكالىق جابدىقتاۋ سەكىلدى بىرنەشە جۇمىستار كىرەدى. سونداي-اق, قارجىنىڭ بەلگىلى ءبىر بولىگى قايىرىمدىلىق شارالارىنا بولىنەتىن بولادى.
بىلتىرعى قالا كۇنىنەن كەيىن 15 ملن تەڭگە الەۋمەتتىك جاعدايى تومەن وتباسىلار مەن مۇگەدەك بالالارعا كومەك رەتىندە جۇمسالدى. ءبىز قايىرىمدىلىق قورلارمەن بىرلەسە وتىرىپ, بيىلعى كومەكتىڭ ناقتى كىمدەرگە بەرىلەتىنى جونىندە شەشىم شىعاراتىن بولامىز. ونىمەن قازىرگى ۋاقىتتا كوميسسيا مۇشەلەرى اينالىسىپ جاتىر.
– مەرەكەلىك شارالاردى تەلەارنالار ارقىلى تىكەلەي ەفيردە تاماشالاۋ مۇمكىندىگى بولا ما؟
– وسى ماسەلەنى قاراستىرىپ كورگەنبىز. كونتسەرتتىك باعدارلامالاردىڭ بارلىعى دەرلىك جاندى داۋىستا وتەتىندىكتەن, تىكەلەي تەلەترانسلياتسيا جۇرگىزگەن كەزدە كورسەتىلىمدەردىڭ ساپاسىز بولاتىنى انىق. سول سەبەپتى, تەلەكورەرمەندەردى بەينە جانە دىبىستىق جاعىنان ساپاسىز دۇنيەلەرمەن قامتاماسىز ەتكىمىز كەلمەدى. بىراق كەيىن ارقايسىڭىز تەلەارنالار ارقىلى مونتاجدالعان نۇسقاسىن تاماشالاي الاسىزدار.
– قالا كۇنىن مەرەكەلەۋ ءۇشىن ۇيىمداستىرۋشىلار قانشا ادامنىڭ كومەگىنە جۇگىنىپ وتىر؟
– ول تۋرالى ناقتى ەشتەڭە ايتا المايمىز. بىراق استانالىق ونەر ۇجىمدارى, تاعى دا باسقا كوپتەگەن قىزمەتكەرلەر جانە ءار ءتۇرلى جاستار مەن ەرەسەكتەر قالا كۇنىن اتاپ وتۋگە ءبىر كىسىدەي اتسالىسپاق. سونىمەن قاتار, شەتەلدىك ونەرپازدار ءارى ولاردىڭ كومەكشىلەرىن قوسا ەسەپكە العاندا شامامەن بارلىعى 20 مىڭداي ادام مەيرامنىڭ مازمۇندى, ەستە قالارلىقتاي بولۋىنا ۇلەس قوسادى.
نۇريسلام قۇسپانعالي