دەنساۋلىق ساقتاۋ باسقارماسىنىڭ باستىعى ايگۇل سەگىزباەۆانىڭ ايتۋىنشا, ەلوردالىقتاردىڭ اۋرۋعا شالدىعۋ دەڭگەيى مەن قاتەرلى دەرتتەن كوز جۇمۋ كورسەتكىشى سوڭعى جىلدارى ءبىرشاما تومەندەپ كەلەدى. ايتالىق, قاتەرلى ىسىككە شالدىعۋشىلار كورسەتكىشى 3,2 پايىزعا, ودان كوز جۇماتىندار سانى 0,5 پايىزعا ازايعان.
2011 جىلى 100 مىڭ تۇرعىنعا شاققاندا 175 ادامنىڭ قاتەرلى ىسىككە شالدىققانى انىقتالسا, بۇل كورسەتكىش 2012 جىلى 169-عا ءتومەندەپتى. جۇرەك اۋرۋلارى سالدارىنان بولاتىن ءولىم كورسەتكىشى دە 49 پايىزعا ازايعان.
باسقارما باستىعى قۇرت اۋرۋىنىڭ قۇرساۋىنا ىلىنگەندەر سانىنىڭ دا استانادا 19 پايىزعا كەمىگەنىن ايتادى. ايتسە دە, الەۋمەتتىك سالماعى باتپانداي كەسەلدى كەمىدى دەپ كەسىپ ايتۋعا ەرتە بولار. 2012 جىلى ءجۇز مىڭ ادامعا شاققاندا 111 اۋرۋ دەرەگى تىركەلگەن. بۇل باس قالا ءۇشىن از كورسەتكىش ەمەس, ارينە. سوندىقتان, تۋبەركۋلەزدى بەلگىلى ءبىر دەڭگەيدە اۋىزدىقتاۋ ءۇشىن ءتۇسىندىرۋ جۇمىستارىن, ۇگىت-ناسيحات شارالارىن ءالى دە ارتتىرۋ كەرەك.
ەلوردادا كۇنىنە شامامەن 60-قا جۋىق ءسابي دۇنيە ەسىگىن اشادى ەكەن. «ءوتكەن جىلى قالادا جالپى سانى 21 مىڭ 266 بالا دۇنيەگە كەلدى. بۇل ايىنا 1772 نەمەسە تاۋلىگىنە 59 ءسابيدىڭ دۇنيە ەسىگىن اشقاندىعىن ءبىلدىرەدى», – دەدى باسقارما باسشىسى. ءناتيجەسىندە, 2012 جىلى استانادا تۋ كورسەتكىشى 2,5 پايىزعا ءوستى. ال, اعىمداعى جىلدىڭ 1 قاڭتارىنداعى ستاتيستيكالىق مالىمەتتەر قالا حالقىنىڭ سانى 778 مىڭنان اسقانىن كورسەتىپ وتىر.
تۇرعىنداردىڭ ءومىر ءسۇرۋ ۇزاقتىعىن ارتتىرۋ, بالالار ءولىمىن ازايتۋ «استانا قالاسى دەنساۋلىق ساقتاۋ باسقارماسىنىڭ 2011-2015 جىلدارعا ارنالعان ستراتەگيالىق جوسپارىنىڭ» باسىم باعىتىنىڭ ءبىرى بولىپ تابىلادى.
ەلوردانىڭ باس دارىگەرىنىڭ ءسوزىنە سەنسەك, استانالىقتاردىڭ ورتاشا ءومىر ءسۇرۋ ۇزاقتىعى 73 جاستى قۇرايدى ەكەن. رەسپۋبليكالىق دەڭگەيدە الىپ قاراساق, ءبىزدىڭ قالا تۇرعىندارىنىڭ ءبىرشاما ۇزاق جاسايتىنىن بايقاۋعا بولادى.
2012 جىلدىڭ قورىتىندىسى بويىنشا انا ءولىمى 4 ەسەگە ءتومەندەپ, سابيلەردىڭ شەتىنەۋى 12 پايىزعا ازايىپتى. مۇنداي كورسەتكىشتى باعىندىرۋىمىزدىڭ ءبىر سەبەبى ايەلدەردىڭ جوعارى مامانداندىرىلعان مەديتسينالىق كومەككە دەگەن قولجەتىمدىلىگىنىڭ ارقاسى بولسا كەرەك. 2012 جىلى دەنساۋلىق ساقتاۋ باسقارماسىنىڭ كۆوتاسى بويىنشا رەسپۋبليكالىق كلينيكاعا 1140 ايەل ەمدەۋگە جاتقىزىلعان. جۇكتى ايەلدەر جەرگىلىكتى بيۋدجەت ەسەبىنەن تەگىن ءدارى-دارمەكتەرمەن قامتاماسىز ەتىلەدى. ماسەلەن, II, III دارەجەلى تەمىر تاپشىلىعى انەمياسىنا شالدىققان اياعى اۋىر كەلىنشەكتەرگە قاجەتتى ءدارى-دارمەك تەگىن بەرىلەدى. ۋچاسكەلىك گينەكولوگتا ەسەپتە تۇراتىن جۇكتى ايەلدەر ءۇشىن استانا ەمحانالارىندا انتەناتالدى-بيوحيميالىق سكرينينگ, سكرينينگتىك ۋلترادىبىستى زەرتتەۋ, مامانداردىڭ كەڭەسى, جىنىس جولدارى اۋرۋلارىنىڭ دياگنوستيكاسى تەگىن جاسالادى. ال, پەرزەنتحانادان ۇيىنە شىققان جاس انالار ءۇش كۇن بويى مەديتسينالىق قىزمەتكەردىڭ باقىلاۋىندا بولادى.
2013 جىلدىڭ العاشقى ەكى ايىندا استانادا 2868 ايەل بوسانعان. سونىمەن قاتار, وتكەن جىلى استانادا ەكستراكورپورالدى ادىسپەن بالا كوتەرگەن 44 ايەل وپەراتسيالىق جولمەن ءسابيلى بولدى.
«بالا ءسۇيۋ قابىلەتىنەن ايىرىلعان كەز كەلگەن وتباسى ءبىر جىلدا ءبىر رەت بەرىلەتىن ارنايى كۆوتا ارقىلى تەكسەرۋدەن وتۋگە مۇمكىندىگى بار» دەيدى باسقارما باستىعى.
قالانىڭ امبۋلاتوريالىق-ەمحانالىق مەنەجمەنتىنىڭ زاماناۋي تەحنولوگيالارى تاقىرىبىندا بايانداما جاساعان №5 قالالىق ەمحانانىڭ باس ءدارىگەرى التىنشاش تابۋلدينا دا سوڭعى جىلدارى ەلورداداعى مەديتسينالىق قىزمەت كورسەتۋ ساپاسىنىڭ ارتقانىن ايتادى. ماسەلەن, تاياۋدا عانا ەمحانادا مەديتسينالىق قىزمەت كورسەتۋ ساپاسىن جاقسارتۋ جانە ەمحاناداعى كەزەكتى قىسقارتۋ ماقساتىندا ەلەكتروندى كەزەك جۇيەسى قولدانىسقا ەنگىزىلدى. مۇندا 5 تىركەۋ تەرەزەسى جۇمىس ىستەيدى. ولاردىڭ بىرەۋى – انىقتاما قىزمەتى, قالعان تورتەۋى ماماندار مەن دياگنوستيكالىق زەرتتەۋلەرگە جازىلۋعا ارنالعان.
ەمحانا باسشىسىنىڭ ايتۋىنشا, №5 ەمحانا – ازىرگە استاناداعى ەلەكتروندىق كەزەك جۇيەسى ىسكە قوسىلعان جالعىز مەديتسينالىق مەكەمە. الايدا, بۇل جۇيە تاياۋ ۋاقىتتا قالانىڭ بارلىق ەمحانالارىندا جۇمىس ىستەيتىن بولادى.
ال, استانا قالاسىنىڭ بالالارعا ارنالعان مامانداندىرىلعان ستاتسيونارلىق مەديتسينالىق كومەك كورسەتۋدى دامىتۋدىڭ تاجىريبەسى مەن بولاشاعى تۋرالى №2 قالالىق بالالار اۋرۋحاناسىنىڭ باس دارىگەرى قارشىعا قۇلمۇحانوۆ ايتىپ ءوتتى.
باس-اياعى ءبىر ساعاتقا سوزىلعان باياندامالاردان ۇققانىمىز, دەنساۋلىق ساقتاۋ سالاسىندا كۇرمەۋلى ماسەلەدەن گورى قول جەتكىزگەن جەتىستىگىمىز كوپ. سولاي-اق بولسىن. سولاي بولۋى ءتيىس تە. ويتكەنى, دەنساۋلىق ساقتاۋ ءمينيسترى ساليدات قايىربەكوۆانىڭ ايتۋىنشا, استانا قالاسىنىڭ دەنساۋلىق ساقتاۋ سالاسىنا الداعى 3 جىلعا وتكەن جىلدارمەن سالىستىرعاندا ەداۋىر كوپ قارجى ءبولىنىپ وتىر.
شىنار دوسان
