استانا مەن ءابۋ-دابي باۋىرلاس
الداعى ۋاقىتتا بىرىككەن اراب امىرلىكتەرىنىڭ ەلورداسى استانامەن ارىپتەستىك قاتىناستار ورناتۋعا نيەتتى. بۇل تۋرالى ءابۋ-دابي قالاسىنىڭ مەرى اۆايدا مۋرشەد ءال مارار قازاقستاننىڭ ءباا-دەگى ەلشىسى قايرات لاما شاريفپەن كەزدەسۋى بارىسىندا ءمالىم ەتتى.
قالالار اراسىنداعى باۋىرلاستىق احۋال ەكىجاقتى قاتىناستاردى دامىتۋدىڭ ءتيىمدى قۇرالى بولارى ءسوزسىز. قوس شاھاردىڭ مۋنيتسيپالدىق سەرىكتەستىگى ساۋدا-ەكونوميكالىق, ينۆەستيتسيالىق, مادەني-گۋمانيتارلىق بايلانىس-تاردى نىعايتۋعا جاردەمدەسەدى.
قازاقستاننىڭ ءباا-دەگى ەلشىسى بۇگىندە استانانىڭ 42 قالامەن شارتتىق قاتىناستارى جولعا قويىلعانىن اتاپ كورسەتتى. ەكى استانا اراسىنداعى تۋىسقاندىق قاتىناستاردىڭ ايعاعى – قازىرگى تاڭدا استانادا سالىنىپ جاتقان كوپفۋنكتسيونالدى «ءابۋ-دابي پلازا» كەشەنى مەن شەيح حاليفا اتىنداعى قازاق-امىرلىك زياتكەرلىك ورتا مەكتەبىنىڭ قۇرىلىسى. استانا مەن ءابۋ-دابيدىڭ جەمىستى ىنتىماقتاستىعىنىڭ كورىنىسى رەتىندە بىلتىرعى جىلدىڭ 28 قازانىندا ۇيىمداستىرىلعان استاناداعى العاشقى قازاقستاندىق-امىرلىك ىسكەرلىك فورۋمى مەن بيىلعى جىلدىڭ 16 اقپانىندا ءابۋ-دابي قالاسىندا «ءباا جانە قازاقستان: ءبىر-بىرىنە قاراي قوزعالىس» اتتى تاقىرىپتا وتكىزىلگەن ەكىنشى قازاقستاندىق-امىرلىك ىسكەرلىك فورۋمىن ايتۋعا بولادى.