بۇگىن – «استانا اقشامىنىڭ» تۋعان كۇنى
تاۋەلسىزدىك تاڭى الدىندا «اقمولا اقيقاتى» اتاۋىمەن دۇنيەگە كەلگەن بۇل باسىلىمنىڭ اقپارات كەڭىستىگىنەن وز ورنىن العانىنا تۋرا جيىرما ەكى جىل تولدى.
ازدى-كوپتى وسىناۋ ۋاقىت ارالىعىندا گازەت بەتتەرىندە وقىرماننىڭ رۋحاني ولجاسىنا اينالعان نەبىر تۇشىمدى دۇنيەلەر جارىق كورىپ, كوزى قاراقتى كوپشىلىكتىڭ كوڭىلىنەن شىققان كوپتەگەن كوكەيتەستى ماسەلەلەر كوتەرىلدى.
ۇلت ءسوزىن ۇستاعان بارلىق قازاقتىلدى باسىلىمدار قاتارىندا ەل, جەر, ءتىل تاقىرىبىن تالماي قاۋزادى.
رەداكتسيامىزدىڭ قۇتتى شاڭىراعىندا ەسىمى ەلگە تانىمال تارلان جۋرناليستەر جۇمىس ىستەپ, قالامىنىڭ جەلى بار قابىلەتتى جاستار تۇلەپ ۇشتى.
باس قالانىڭ ءباسپاسوز شەجىرەسى ىسپەتتى «استانا اقشامىنىڭ» ارعى-بەرگى تىگىندىلەرىن اقتارعان ادامنىڭ تالاي تاريحتى تابارى انىق.
ەرتەڭى نۇرلى ەلوردا ومىرىندەگى جاعىمدى جاڭالىقتار, وزەكتى پروبلەمالار, باعالى باستامالار ەڭ اۋەلى بىزدىڭ ۇنجاريادا جارىق كورىپ جاتاتىنى تاعى تالاسسىز.
جاقسى ءداستۇر جالعاسىن تاۋىپ, جازار كوبەيگەي!
