حالىقارالىق كونكۋرستىڭ ۇيىمداستىرۋشىلارى استانا قالاسىنىڭ اكىمدىگى مەن «Accordi di Astana» قوعامدىق قورى بايقاۋدىڭ جۇلدە قورىن كوبەيتۋ تۋرالى شەشىم قابىلدادى. بۇل تۋرالى astana-app.kz cايتىندا حابارلاندى. ەندى بايقاۋدىڭ جۇلدە قورى 60 000 اقش دوللارىن قۇرايتىن بولدى.
جۇلدە قورىن كوبەيتۋدىڭ باستى سەبەبى تالانتتى پيانيستەردى دايارلايتىن ۇستازداردىڭ ەڭبەگىن ىنتالاندىرۋعا بايلانىستى بولىپ وتىر. بۇدان بىلاي بايقاۋدا كىشى, ورتا جانە ۇلكەن جاس ارالىعى بويىنشا 1, 2 جانە 3 ورىنعا يە بولعان جۇلدەگەرلەردىڭ ۇستازدارى 1 000 اقش دوللارى كولەمىندە سىياقى الاتىن بولادى. بۇرىن تەك ءبىرىنشى ورىن العان جەڭىمپازدىڭ ۇستازى عانا ماراپاتقا يە بولاتىن.
«Astana Piano Passion» ەكىنشى حالىقارالىق كلاسسيكالىق مۋزىكا فەستيۆالى مەن جاس پيانيستەر كونكۋرسى 2014 جىلدىڭ 10 – 16 مامىر كۇندەرى وتەدى. بايقاۋدىڭ كوركەمدىك جەتەكشىسى ءارى قازىلار القاسىنىڭ قۇرمەتتى توراعاسى – رەسەيدىڭ حالىق ءارتيسى دەنيس ماتسۋەۆ.
