استانا بۇگىندە رەسپۋبليكالىق قانا ەمەس, الەمدىك دارەجەدەگى سپورت جارىستارىن وتكىزەتىن حالىقارالىق ارەناعا اينالىپ وتىر. باس قالامىزدىڭ مۇنداي دەڭگەيگە كوتەرىلۋىنە تەك جاڭادان سالىنعان ءزاۋلىم عيماراتتار عانا قىزمەت ەتىپ قويماي, ءوز ىسىنە ادالدىقپەن قارايتىن بىلىكتى مامانداردىڭ دا قوسىپ وتىرعان ۇلەسى زور دەپ بىلەمىز.
كۇنى كەشە اتالىپ وتىلگەن تاۋەلسىزدىك مەرەكەسىنە وراي قازاقستان رەسپۋبليكاسى پرەزيدەنتى جارلىعىمەن مەملەكەتتىك ناگرادا العانداردىڭ قاتارىندا استانالىق سپورتشىلاردىڭ بولعانىن قۋانىشپەن جەتكىزگىمىز كەلەدى. اتاپ ايتقاندا, بۇگىندە استانا قالاسى بويىنشا كوركەم گيمناستيكادان اعا جاتتىقتىرۋشى, №1 بجسم-دە وقىتۋشى-جاتتىقتىرۋشى بولىپ ەڭبەك ەتىپ جۇرگەن ءلايلىم وماروۆا مەرەكە قارساڭىندا «قۇرمەت» وردەنىن الدى. ۇزاق جىلعى ەڭبەك جولىندا كوپتەگەن رەسپۋبليكا چەمپيوندارىن, حالىقارالىق جارىستاردىڭ جۇلدەگەرلەرىن دايىنداعان ءلايلىم حاكىمقىزى – كسرو سپورت شەبەرى, جوعارى دارەجەلى جاتتىقتىرۋشى, ۇلتتىق جوعارى دارەجەدەگى تورەشى دەگەن قۇرمەتتى اتاقتاردىڭ يەگەرى.
كوپتەگەن جىلدار استانا نامىسىن ابىرويمەن قورعاپ جۇرگەن اتلەتىمىز سەرىك ابداحين دە «قۇرمەت» وردەنىمەن ماراپاتتالدى. گير كوتەرۋدەن ەلىمىزدىڭ 13 دۇركىن چەمپيونى بولعان, ارداگەرلەر اراسىندا الەم چەمپيونى اتانعان جەرلەسىمىز ۇزاق جىلدار قالامىزداعى ستۋدەنتتەر سپورتىن دامىتۋعا ەرەكشە ۇلەس قوسقان مامان رەتىندە بەلگىلى. حالىقارالىق دارەجەدەگى سپورت شەبەرى بۇگىنگى تاڭدا استانا قالاسىنداعى «تولاعاي» جوعارى سپورت شەبەرلىگى مەكتەبىندە وقىتۋشى ءارى جاتتىقتىرۋشى بولىپ جەمىستى ەڭبەك ەتىپ كەلەدى.
مەملەكەت باسشىسى اتىنان سىيلىق العانداردىڭ قاتارىندا استانا قالاسى بويىنشا قازاق كۇرەسىنەن اعا جاتتىقتىرۋشى ءارى «استانا باتىرى» جەكپە-جەك كلۋبىنىڭ قىزمەتكەرى ەرلان ەستەك تە بولدى. ءار جىلداردا الەم چەمپيونى, الەم كۋبوگىنىڭ جەڭىمپازى, «ەۋرازيا بارىسى» ءتۋرنيرىنىڭ جەڭىمپازى, ەلىمىزدىڭ بىرنەشە دۇركىن چەمپيونى بولعان ساڭلاق بالۋانىمىزعا «قازاقستان رەسپۋبليكاسىنىڭ قۇرمەت گراموتاسى» تابىس ەتىلدى.
مەرەيى وسكەن ەلوردالىق باپكەرلەردى استانا قالاسى تۋريزم, دەنە تاربيەسى جانە سپورت باسقارماسىنىڭ باسشىسى ايتالاپ كۋرگامباەۆ ۇجىم الدىندا تاعى ءبىر قۇتتىقتاپ, ەڭبەكتەرىنىڭ جەمىستى بولا بەرۋىنە تىلەكتەستىك ءبىلدىردى.
عالىم قوجابەكوۆ
