«قايسار تۇلعا» ۇلتتىق سىيلىعىن تاپسىرۋ اياسىندا استانا قالاسىنا «ەڭ ۇزدىك سپورتتىق ايماق» سىيلىعى بەرىلدى.
قازاقستاننىڭ پاراليمپيادالىق قۇراماسى بيىل ينچحوندا وتكەن ءحى ازيا ويىندارىندا 7 جارىستان التىن, 6 كۇمىس جانە 11 قولا جۇلدە يە بولدى. وسى كورسەتكىشپەن كوماندالىق ەسەپتە 11-ورىننان كورىندى. ال ەلوردالىق سپورتشىلار جەتى التىن مەدال, ءبىر كۇمىس جانە ءۇش قولا جۇلدەمەن ورالدى.
قۇرلىقتىڭ بايراقتى باسەكەسىندە ەل نامىسىن ابىرويمەن قورعاعان استانالىق سپورتشىلار تۋرالى ايتار بولساق, جۇلدەگە قول سوزعان سايىپقىرانداردىڭ ءبارى استانا قالاسىندا وسىدان ون ەكى جىل بۇرىن قۇرىلعان «قايسار» مۇمكىندىگى شەكتەۋلى جاندارعا ارنالعان سپورت كلۋبىنىڭ مۇشەلەرى. اتالمىش كلۋبتىڭ ءجۇزۋ سپورتى بويىنشا جاتتىقتىرۋشىسى «قايسار تۇلعا» سىيلىعىمەن ەكىنشى مارتە ماراپاتتالسا, اربادا وتىرىپ بيلەۋ باپكەرى ءاليا تۇسىپبەكوۆا دا ۇزدىك جاتتىقتىرۋشى اتاندى.
ازيا ويىندارىندا ءابسوليۋتتى رەكورد جاساعان دا استانالىق سپورتشى بولدى. اتاپ ايتقاندا, ءجۇزۋ جارىستارىندا سىنعا تۇسكەن ءانۋار احمەتوۆ ازيا ويىندارىنىڭ بەس دۇركىن چەمپيونى اتاندى. سونىمەن قاتار, ءۇش رەت ازيادا رەكوردىن جاڭارتتى. مۇنداي كورسەتكىشتى بۇعان دەيىن بىردە-ءبىر سپورتشى باعىندىرعان ەمەس. ءدۇبىرلى جارىستىڭ جەڭىمپازدارىن ماراپاتتاۋ بارىسىندا انۋارعا «قايسار تۇلعا» سىيلىعىمەن قاتار جەڭىل اۆتوكولىك تارتۋ ەتىلدى. ينچحون ايدىنىندا جۇزۋدەن ەكى دۇركىن چەمپيون اتانعان الىبەك ۋاقپاەۆ, جۇلدەگەرلەر قاتارىنان كورىنگەن سيازبەك داليەۆ پەن رۋسلان وتەباليەۆ تە ارنايى سىيلىققا يە بولدى.
قازاقستان قۇراماسى ساپىندا ەل نامىسىن قورعاعان استانالىق بيشىلەر دە جاقسى ءناتيجەلەرىمەن قۋانتا ءبىلدى. ماسەلەن, اربامەن بيلەيتىن ارداق وتارباەۆ, ايدانا بەگلەنوۆا جانە قارلىعاش تىنابەكوۆا كورەرمەننىڭ كوزايىمىنا اينالدى. جەڭىس تۇعىرىنان كورىنگەن بۇل بيشىلەر دە «قايسار تۇلعا» سىيلىعىن الدى. سونداي-اق, بىرقاتار استانا-لىق سپورتشىلار ارنايى جۇلدەلەرگە يە بولدى. اتاپ ايتقاندا, رۋسلان وتەباليەۆ «سپورت ءۇمىتى», ارداق وتارباەۆ «پاراليمپيادالىق سپورتتىڭ مەديالىق تۇلعاسى», ال قارلىعاش تىنابەكوۆا «پاراسپورت ارۋى» اتاندى.
استانا قالاسىنىڭ تۋريزم, دەنە تاربيەسى جانە سپورت باسقارماسىنا پاراليمپيادالىق سپورت تۇرلەرىن دامىتۋعا قوسقان ۇلەسى ءۇشىن «العىس حات» تابىس ەتىلدى.
– ءبىزدىڭ سپورتشىلاردىڭ جەڭىستى ناتيجەلەرى – تەك ەلوردامىز عانا ەمەس, بۇكىل قازاقستان ءۇشىن دە ۇلكەن ابىروي. سپورتشىلار مەن باپكەرلەردىڭ اتىنان استانا قالاسىنىڭ اكىمدىگىنە العىس ايتامىن. سپورتشىلار وليمپيادالىق ليتسەنزيالاردى دا جەڭىپ الدى. ريو-دە جانەيرودا وتەتىن پاراليمپيادالىق ويىنداردا دا وسىنداي ۇزدىك ناتيجەلەرگە قول جەتكىزەتىنىمىزگە سەنىمدىمىن, – دەيدى استانا قالاسىنداعى مۇمكىندىگى شەكتەۋلى سپورتشىلارعا ارنالعان «قايسار» سپورت كلۋبىنىڭ ديرەكتورى اللابەرگەن الدوڭعاروۆ.
عالىم قوجابەكوۆ
