ەلوردادا «شابىت», «جاس قانات» سىندى جاس ونەرپازداردىڭ تالانتىن تانىپ, باعىن اشاتىن ءداستۇرلى بايگەلەر بارشىلىق. سولاردىڭ ءبىرى دە بىرەگەيى – «ايالاعان استانا» مۋزىكالىق بالالار بايقاۋى. قالا كۇنى قارساڭىندا رەسپۋبليكالىق كونكۋرس وسىمەن ءتورتىنشى رەت ءوز شىمىلدىعىن تۇرەدى. ىرىكتەۋدەن سۇرىنبەي وتكەن 12 قاتىسۋشى كەشە استانادا العاش رەت كەزدەسىپ, اقتىق سايىسقا قىزۋ دايىندىعىن باستاپ كەتتى.
بيىلعى بايقاۋدا 7 مەن 13 جاس ارالىعىنداعى بالالار سىنعا تۇسەدى. بۇگىندە ولار استانالىق مۋزىكا مەكتەبىندە ۆوكالدىق قابىلەتتەرىن شىڭداپ, «Red Jam» مۋزىكالىق توبىنىڭ سۇيەمەلدەۋىمەن ءان شىرقاۋعا دايىندالۋدا.
جىلداعىداي «ايالاعان استانانىڭ» قازىلار القاسى جوبانىڭ باس پروديۋسەرى لينا اريفۋلينا تورەلىك ەتەتىن تانىمال ەسترادا جۇلدىزدارى بولماق. سونداي-اق, كورەرمەندەردىڭ ۇمىتكەرلەرگە sms-حابارلاما ارقىلى داۋىس بەرۋ مۇمكىندىگى بولادى.
الداعى بايقاۋلاردان ەرەكشەلىگى – بۇل جولى «ايالاعان استانانىڭ» فينالىندا بالالار ءبىر-ءبىر اننەن شىرقايدى. جەڭىمپاز دا سول كۇنى انىقتالادى.
«جاس دارىنداردى تابا وتىرىپ, شىعارماشىلىق قابىلەتتەرىن اشۋدى باستى ماقسات ەتكەن جوبا قازاقستاندىق بۇلدىرشىندەرگە مول تاجىريبە جيناۋعا, شىعارماشىلىق تۇرعىدان كەمەلدەنۋگە ىقپالىن تيگىزەدى» دەيدى بايقاۋدىڭ باس پروديۋسەرى لينا اريفۋلينا. سونداي-اق, گران-پري يەگەرى ادەتتەگىدەي «ارتەك» لاگەرىندە وتەتىن حالىقارالىق «جاڭا تولقىن-2016» ءان بايقاۋىنا جولداما الىپ, ەل نامىسىن قورعايدى.
اتاپ وتەيىك, رەسپۋبليكالىق ءان بايقاۋىنا استانا قالاسى اكىمدىگى, «نۇر وتان» پارتياسى مەن رەسەيلىك «ارس» كومپانياسى قولداۋ ءبىلدىرىپ وتىر.
ۇيىمداستىرۋشىلاردىڭ مەرەكەلىك باعدارلاماسى بويىنشا, فينالعا وتكەن 12 قاتىسۋشى ەرتەڭ «بايتەرەكتەن» باستاپ, باس شاھاردىڭ بارلىق كورىكتى جەرىن ارالاماقشى.
استاناداعى وقۋشىلار سارايىندا وتەتىن فينال شىلدەنىڭ ەكىسى ساعات 13:00-دە باستالماق. تەلەۆيزيالىق شوۋ تىكەلەي ەفيردەن «قازاقستان» ۇلتتىق تەلەارناسىندا كورسەتىلەدى.
ءمادينا جاقىپ
