استانادا العاش رەت ءۇش سايىستان تۇراتىن ترياتلون جارىسى ءوتتى. ەلورداداعى «استانالىق» ساياباعىندا وتكەن شارادا كوپشىلىك سۋدا ءجۇزىپ, ۆەلوسيپەد تەۋىپ, ودان ءارى قاراي جۇگىرىپ جارىستى.
جارىس كەزىندە قاتىسۋشىلاردىڭ ەركىن ءارى قاۋىپسىز قوزعالىسى ءۇشىن تۇران داڭعىلىندا «تۇلپار» كوپىرىنەن باستاپ اۋەجايدىڭ اينالما جولىنا دەيىن كولىك قوزعالىسى شەكتەلدى. سپورتشىلار الدىمەن ەسىل وزەنىندە جۇزۋدەن جارىستى. سۋ ۇستىندەگى مەجە – 350 مەتر. ۇيىمداستىرۋشىلار بۇل سپورت ءتۇرىن جارىسقا ءبىرىنشى رەت قوسقاندىقتان, قاشىقتىقتى قىسقا ەتىپ بەلگىلەپتى.
سونىمەن, ستارت سۋدان باستالىپ, ءجۇزىپ شىققان جۇرت ۆەلوسيپەدكە قوندى. سۋعا مالىنعان سپورتشىلار دەرەۋ كيىمدەرىن اۋىستىرىپ, دەمدەرىن الماستان جارىستى جالعاستىرىپ كەتتى. قوس دوڭعالاقتى كولىك ءۇشىن بەرىلگەن ارالىق – 20 شاقىرىم.
اينالما جولعا دەيىن بارىپ, اينالىپ قايتقان جۇيرىكتەر ۆەلوسيپەدتەن تۇسە سالا, جۇگىرىپ جارىسا كەتتى. شارشاپ, شولىركەپ قالعان جەلاياقتارعا جولشىباي قولداپ, قيقۋ قوسقاندار سۋ ۇسىندى.
جارىستىڭ كوپ بولىگىن ارتتا قالدىرعان ولارعا ەندى 2,5 شاقىرىمدى ەڭسەرسە, جەتىپ جاتىر. وسى كەزەڭنىڭ وزىندە كىمنىڭ وزا كەلەتىنى بەلگىلى بولعانداي كورىندى. ويتكەنى ۆەلوسيپەدپەن ءبىرىنشى جەتكەن ءتورت قاتىسۋشى قالعاندارىنا قاراعاندا وق بويى وزىق تۇرعان ەدى.
«بۇگىن وسىناۋ جارىسقا قاتىسقان قالا حالقىنا ريزاشىلىعىمىزدى بىلدىرەمىز. بەلسەندى تۇرعىندار دەمالىس كۇنى تاڭعى ۇيقىلارىن قيىپ كەلىپ, كوپشىلىكپەن بىرگە بوي قىزدىرىپ, قولداۋ كورسەتىپ, كوڭىل كوتەردى. اۋا رايى دا قاراسىپ, كۇن اشىق بولدى. بارلىعى 147 ادام بۇگىنگى جارىسقا قاتىستى. ولاردىڭ ەڭ جاسى 14 جاستا بولسا, ۇلكەنى – 65 جاسقا كەلگەن قاريالار. جۇزدەن جۇيرىك شىققانداردىڭ جۇلدەلەرى دە – قوماقتى. ءبىرىنشى كەلگەندەرگە – توڭازىتقىش, ەكىنشى جەتكەندەرگە – تەلەديدار, ۇشىنشىلەرگە نوۋتبۋكتەر تابىستالادى», – دەيدى استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى بەرىك مارجىقپاەۆ.
قانشاما قاشىقتىقتى تالماي تاباندىلىقپەن باعىندىرعانداردىڭ اراسىنان جەڭىمپازدار ءتورت سانات بويىنشا انىقتالدى. سولاردىڭ ىشىندە بارىنەن اۆتۋشكو وتباسىنىڭ مەرەيى ۇستەم بولدى. وسى جارىسقا ارنايى وڭتۇستىكتەن ات تەرلەتىپ كەلگەن قالا قوناقتارىنىڭ ەڭبەگى ەش كەتپەدى. ەرلەر اراسىندا ءۇش سايىستى 54 مينۋت 48 سەكۋندتا اياقتاعان الەكساندر اۆتۋشكو ءابسوليۋتتى جەڭىمپاز اتاندى. ال ونىڭ جۇبايى اناستاسيا اۆتۋشكو بارلىق قاشىقتىقتى 1 ساعات 9 مينۋتتا باعىندىرىپ, ايەلدەر اراسىندا بارىنەن ۇزدىك بولدى. وتباسىلىق جۇپ ترياتلونمەن اينالىسقاندارىنا ون جىلدان اسا ۋاقىت بولعاندىعىن ايتىپ, وسى جارىستىڭ تاماشا ۇيىمداستىرىلعانىن اتاپ ءوتتى.
تاعى ءبىر سونداي قاتىسۋشىلاردىڭ ءبىرى استانالىق سابىرجان قوساق ءتورتىنشى ورىندا كەلىپ, العاشقى ۇزدىك ۇشتىككە ەنە الماي قالعانىنا ەش قىنجىلمايتىنىن ايتتى. ويتكەنى از عانا ۋاقىتتىڭ ىشىندە وسى جارىسقا دايىندالىپ, ءجۇزۋدىڭ قيىنعا سوققانىنا قاراماستان, وسىنداي ناتيجە كورسەتكەنىن اجەپتاۋىر جەتىستىك سانايدى ەكەن.
«ءبىزدىڭ فەدەراتسيا وسىدان ءۇش اپتا بۇرىن بۋرابايدا ترياتلوننان «قازاقستان كۋبوگىن» وتكىزدى. فەدەراتسيانىڭ قۇرىلعانىنا ەكى جىل بولدى. وسى ۋاقىت ارالىعىندا 14 جارىس وتكىزدىك. ال بۇگىن ەلورداسى استانادا قانشاما حالىقتىڭ باسىن قوسىپ, تاعى ءبىر دۋماندى جارىستى ۇيىمداستىردىق. جارىسقا اۋەسقويلارمەن بىرگە ۇلتتىق قۇرامانىڭ سپورتشىلارى دا قاتىستى. قازىر ترياتلوننان ۇلتتىق قۇرامادا بۋىن الماسىپ جاتىر. جاڭا بۋىندى انىقتاۋدا وسى جارىستاردىڭ سەپتىگى مول. بۇل ءداستۇر جالعاسىن تاۋىپ, 20 تامىز كۇنى قاپشاعاي قالاسىندا جارىس وتەدى», – دەيدى قازاقستان ترياتلون فەدەراتسياسىنىڭ پرەزيدەنتى مۇراتحان توقمادي.
ۇيىمداستىرۋشىلاردىڭ ايتۋىنشا, دۋماندى ترياتلوندى داستۇرگە اينالدىرىپ, كەلەسى جىلى دا وتكىزۋ جوسپاردا بار ەكەن.
