استانادا پوليتسەيلەر قاتارى 100-دەن اسا جاس قىزمەتكەرمەن تولىقتى
ءتارتىپ ساقشىلارىنىڭ جۇمىسىنا جاڭادان قوسىلعانداردىڭ ىشىندە ۋچاسكەلىك پوليتسيا ينسپەكتورلارى, جەدەل ۋاكىلدەر, كريميناليستەر, انىقتاۋشىلار بار.
«بۇل – ومىرلەرىڭىزدەگى ەڭ ءبىر ەستە قالارلىق كۇن. بۇگىننەن باستاپ ىشكى ىستەر ورگاندارىنىڭ تولىق قۇقىلى قىزمەتكەرىسىزدەر. ءوز تاڭداۋلارىڭىزدى ماقتان تۇتىڭىزدار! قازاقستان رەسپۋبليكاسىنىڭ كونستيتۋتسياسىن قاتاڭ ساقتاپ, كەز كەلگەن جاعدايدا مەملەكەت زاڭنامالارىن بۇزبايتىن ەلگە ادال ازامات بولىڭىزدار!» دەدى استانا قالاسى ىشكى ىستەر دەپارتامەنتىنىڭ باستىعى, پوليتسيا گەنەرال-مايورى امانتاي اۋباكىروۆ.
جاس مامانداردى قىزمەتكە قابىلداۋ سالتاناتىندا سىبايلاس جەمقورلىق كورىنىستەرىن الدىن الۋ, ادامگەرشىلىككە تاربيەلەۋ ماقساتىندا تاقىرىپتىق فيلمدەر كورسەتىلدى. سونداي-اق, جاڭا قىزمەتكەرلەر استانا قالاسى ءىىد ارداگەرلەر كەڭەسى توراعاسىنىڭ ورىنباسارى وتستاۆكاداعى ميليتسيا پولكوۆنيگى الەكساندر كنيازەۆتىڭ اڭگىمەسىنەن كوپتەگەن قىزىقتى جايتتاردى ەستىپ, قازىرگى جانە وتكەن كەزەڭدەردەگى قىزمەت اتقارۋدىڭ ايتارلىقتاي ەرەكشەلىكتەرى تۋرالى وي ءبولىستى.
ءمادينا جاقىپ
