استانادا تەننيستەن قر پرەزيدەنتى كۋبوگى ءۇشىن تۋرنير باستالدى
تۋرنير 31 شىلدەگە دەيىن جالعاسادى.
استانادا تەننيستەن Challenger ATP جانە ITF Women’s سەرياسىنىڭ «قر پرەزيدەنتى كۋبوگى-2016» حالىقارالىق ءتۋرنيرى باستالدى. بۇگىن ىرىكتەۋ ويىندارى مەن نەگىزگى سەتكانىڭ ماتچتارى وتەدى. قازاقستاندىقتاردان جارىس الاڭىنا كاميلا كەرىمباەۆا, گوزال اينيتدينوۆا, دەنيس ەۆسەەۆ, ساگادات اياپ پەن رومان حاسانوۆ شىعادى.
سايىستىڭ ەرلەر اراسىنداعى 1-ءشى راكەتكاسى رەسەيلىك ەۆگەني دونسكوي (اتر رەيتينگىسىندە 80-ورىن), ودان كەيىنگى ورىندا وزبەكستاندىق دەنيس يستومين (اتر رەيتينگىسىندە 97-ورىن) جانە ءتۋرنيردىڭ 3-ءشى راكەتكاسى تاعى ءبىر رەسەيلىك تەيمۋراز گاباشۆيلي (اتر رەيتينگىسىندە 101-ورىن).
ال قىزدار اراسىنداعى دودانىڭ 1-ءشى راكەتكاسى رەسەيلىك ناتەلا دزالاميدزە, 2-ءشى الەنا تاراسوۆا (رەسەي) جانە 3-ءشى تۇركيالىق پەمرا وزگەن.
ايتا كەتەيىك, بيىل 18-ءشى رەت ۇيىمداستىرىلىپ وتىرعان بايراقتى باسەكەنىڭ جۇلدە قورى – 125 مىڭ اقش دوللارى. سونىمەن قاتار, تۋرنير بارىسىندا كاسىپقوي تەننيسشىلەرمەن قاتار بالالار اراسىنداعى «Astana Masters 12 & under President’s Cup» جانە اۋەسقويلار اراسىندا «Astana Open» جارىستارىن وتكىزۋ جوسپارلانعان.
تۋرنير 31 شىلدەگە دەيىن جالعاسادى. ويىندار كۇندەلىكتى ساعات 11:00-دە باستالادى. جانكۇيەرلەر ءۇشىن كىرۋ – تەگىن.