جاز بويى جۇگىرىپ جاتتىققان ەلوردا جۇرتى ارقانىڭ سارىشۇناق ايازىندا دا قاراپ جاتقان جوق. سەنبىدە سىناپ باعاناسى -25 گرادۋسقا دەيىن تومەن تۇسسە دە, كوڭىل كۇيلەرى تۇسپەگەن مارافونشىلار ترياتلون پارككە تاڭنان جينالىپ, ساپ تۇزەدى.
ەكىنشى رەت سالتانات قۇرعان Astana winter marathon جارىسىنا 1600-دەن اسا ادام قاتىسۋعا نيەت ءبىلدىردى. ونىڭ اراسىندا الىستان ات ارىلتىپ كەلگەندەر دە بار. اشىپ ايتساق, 300-دەن اسا جەلاياق ەلىمىزدىڭ باسقا ايماقتارىنان جانە رەسەي مەن ۋكراينادان جەتتى.
سپورتتى ءومىر سالتىنا اينالدىرعان كوپشىلىك قاباعىنا قىراۋ قاتسا دا بۇل دودادان قالىس قالمادى. جاس-كارىسىنە قاراماي وسى ماڭنان تابىلعان جۇرتتىڭ ەڭ جاسى 12 جاسار بولسا, ەڭ ەگدەسى 74 جاستا بولدى.
تەمىر ءتوزىمدى, قىزۋ قاندى مارافونشىلار 5, 10 جانە 21 شاقىرىمدىق ءۇش قاشىقتىقتا باقتارىن سىنادى. ال ەڭ ۇزاق 42 شاقىرىمدىق جارىس كۇننىڭ قاتتى سۋىتۋىنا بايلانىستى شەكتەلدى. مۇندا قاتىسۋشىلاردىڭ قاۋىپسىزدىگىنە اسا ءمان بەردى. ايتپەسە 42 كيلومەتردى دە باعىنباس بەلەس دەپ بىلمەيتىندەر قوس وكپەسىن قولىنا الىپ دايىن-اق تۇر ەدى. جەلاياقتاردىڭ وسى تاباندى مىنەزىنەن مارافوننىڭ ۇرانى نەگە «شەكسىز مۇمكىندىك» دەپ اتالعانى دا ايقىن بولدى.
دوداعا دەم بەرىپ, كوپكە ۇلگى بولىپ ازيا, افريكا, اۆستراليا جانە امەريكانىڭ ءشول دالاسىن شالدىقپاي جالعىز جۇگىرىپ وتكەن ايگىلى مارافونشى مارات جىلانباەۆتىڭ ءوزى جول باستادى. ول تەك استانادا عانا ەمەس, اقتوبە, اتىراۋ, پاۆلودار, ەكىباستۇز جانە ورال قالالارىندا دا جۇرت جۇگىرۋگە شىققانىن اتاپ ءوتىپ, حالىقتى بەلسەندى قوزعالىسقا ۇندەدى.
مارافون استانا قالاسى اكىمدىگىنىڭ قولداۋىمەن ءوتتى. شارانىڭ باس دەمەۋشىسى – «BI group» كومپانياسى.
5 شاقىرىمدىق قاشىقتىقتاعى مارافوندا سەرىك يسمايلوۆ پەن ادەل شاحايدار جەڭىسكە جەتسە, 10 شاقىرىمدىق قاشىقتىقتى العاشقى بولىپ ميراس جەتىباەۆ پەن زارينا مەنتاەۆا باعىندىردى. ال 21 شاقىرىمدىق مارافوندا بازارباي داۋتاليەۆ پەن تاتيانا ميرگورودسكاياعا تەڭ كەلەر اتلەت بولمادى.
